1 Ndʉʉmɛ, mɔ yʉ́ gyʉʉ dədə mu njaafɛ̀ʼndɛŋNyii i kə́ gìe tʉ mbʉ bʉəntəŋNyii təkwiitia mbɔ, "B̈ii gɛ̀, véʼ mbʉ bəbaŋ gheghe təkwiitia ndə i kie tʉʉbʉə-Nyii muŋgɔ kəchisê le."

2 Nɔ, fəŋ wontəŋNyii gɛ̀ véʼ yi-yə kəchisê. Mbaa-shʉ́əshʉ́ə-bə ndə i tʉʼ líŋ daa yátə bʉə ndə bɔ̂ŋ nɔʼ fí cheʼ-mbʉ-nyaa-bʉəbʉə-kə bɔŋleʼ kə́ lə̀ʼtə finə-i ndə bə kə chìi.

3 WontəŋNyii ndə ɔ tyúnə bɔ̌ŋ fəŋ, véʼ yi-yə baŋ mu muukwɛʼtəŋmə. Mbʉ muu kíahə bɛ nə fɔbʉə-kəŋkwu-wo-kə, fɔ-ŋɛnə-bə ndə bɔ̂ŋ bɛ mbʉ mu muu kwútə bənchəŋ.

4 WontəŋNyii ndə ɔ tyúnə bɔ̌ŋ fəŋ vɛʼ bûu, véʼ yi-yə baŋ mu ŋgwɛŋhə leʼnə vâabəlʉ̂ʉ muu, mbʉ muu bə̀ŋ fɔbʉəkə. 5 Mɔ yʉ́ wontəŋNyii ndə ɔ kie mbʉ muu ghɔ̀ŋ tʉ Nyii mbɔ,

"Oo Wo ndə a bɛ Ŋkʉʉ, mbəŋ-aŋ ndə a bɛ ghɔ, bɔŋ-nɔʼ-leʼ kə bɛ ghɔ,

ntɛ ndə a kwɛ̀ nubə-ɔ̄ŋ nɔ bɛ ndyʉndyʉ.

6 Bʉʼka bɔ̂ŋ nɔʼ tyù fɔbʉə-bʉə-Nyii-kə ghɔŋbə bʉəyʉkəŋgieNyii,

nɔ a nɔʼ kɔ́ fɔbʉəkə tʉ bɔŋ ndə mənú.

Nɔ bɛ ntɛ bəkɛŋ ndə i kʉ̀ʼnə tʉ bɔŋ."

7 Mɔ yʉ́ gyʉʉ ndə i gwè hə ndəŋ kəyəŋfɛ̀ʼndɛŋNyii kə́ ghɔ̀ŋ mbɔ,

"Ɔŋ, Nyii Tiekətʉ, ndə a kie ghʉəʼkə inchəŋ,

a nɔ kwɛ̀ nubə-ɔ̄ŋ nə shʉəŋ, i bɔŋ-kə́-leʼ bɛ ndyʉndyʉ."

8 WontəŋNyii ndə ɔ tyúnə bɔ̌ŋ fəŋ vɛʼ tia, véʼ yi-yə baŋ ndəŋ sʉʉchi, Nyii mɛ̀ʼtə i tɔ̀ŋtə bʉə nə viʼi shʉ́əshʉ́ə. 9 Məyíʼhə shʉ́əshʉ́ə tɔ̀ŋtə bɔŋ, bɔ̂ŋ chɛ̀ŋ yie-Nyii ndə ɔ kə kie ghʉəʼkə ndə mətə́ŋ ntɛ-ŋgʉəʼ-hə-ɔ̄ŋ. Təmə bɔ̂ŋ shìe liɛŋ ndəŋ bʉ̂ʼtə-ʉə ndə məkɔ́ məgʉ́ə tʉ ɔŋ fɛ.

10 WontəŋNyii ndə ɔ tyúnə bɔ̌ŋ fəŋ vɛʼ kwi, véʼ yi-yə baŋ ndəŋ yetə-mbʉ-nyaa-bʉəbʉə-ghɔ̄-kə, njəŋkə gwù lɔʼɔ-ghɔ̄ ndə ɔ kə́ sɔ́ʼ. Bʉə kwó lɛɛŋhəbə-ʉə bʉʼka mbʉə liŋnə shʉ́əshʉ́ə. 11 Bɔ̂ŋ chɛ̀ŋ yie-Nyii ndə ɔ bɛ yuo bʉʼka mbʉə liŋnə-yʉə ghɔŋbə mbʉ bəmbaa. Təmə bɔ̂ŋ shìe liɛŋ ndəŋ fɔʼtə-ʉə fɛ.

12 WontəŋNyii ndə ɔ tyúnə bɔ̌ŋ fəŋ vɛʼ taa, véʼ yi-yə baŋ mu lɔkɔʼ ŋgwɛŋ Yufelete, muumə-i yə́ŋ, ndə məŋɔ́ʼhə fia tʉ bəfɔŋ ndə bɔ̂ŋ lɔ̀ hə ndə byûu mbi, kwii ndə chichi sɔ́ʼ chɔ. 13 Mɔ nyíɛ lyʉʉhənyaatəbə itia, ndə bɔ̂ŋ tʉʼ fyú hə chu mbʉ dalagɔŋ, kə́ fyú chu mbʉ nyaa bʉəbʉə bɔŋleʼ fyú chu mbʉ yʉkəŋgieNyii nə mbii kə́ bɛ nə ŋɔʼnchɔŋbə. 14 Nɔ kə bɛ lyʉʉhəbʉəbʉəbə ndə bɔ̂ŋ kə́ chìi nufinəbə ndə bɔ̂ŋ wɔ̀ʼnə gɛ̀ tə bəfɔŋ kəwʉʉnəmbi inchəŋ ndə məchə̀ŋtə bɔŋ ndə chɔ̂ ndə i bu bɛ ndəŋ fɔŋ-kəchî-Nyii ndə ɔ kie ghʉəʼkə inchəŋ.

15 Jiso Tiekətʉ ghɔ̀ŋ mbɔ, "B̈ii yʉ́, mɔ nɔ tʉʼ gwè nə lʉʼ! Tʉʉjyu nɔ bu bɛ yi-wo-yə

ndə ɔ gòʼ nə tʉkə-i ghɔʼ, shʉ̀tə ndyihə-i kə́ chyìichyìi,

bʉʼka ɔ mə yi tòʼ kənchiʼtʉʉ, bə nyíɛ nchiʼtʉʉkə-i."

16 Bɔ̂ŋ chə̀ŋtə bɔŋ kəyəŋ ndə bə kə́ tíi kəŋgie-Hibulu nə Amagɛdɔŋ.

17 WontəŋNyii ndə ɔ tyúnə bɔ̌ŋ fəŋ vɛʼ ntʉʼʉ, véʼ yi-yə baŋ mu yuo, gyʉʉ dədə gìe mu njaafɛ̀ʼndɛŋNyii, ndəŋ mbʉ kəyetə, kə́ ghɔ̀ŋ mbɔ, "I nɔʼ mì." 18 Bə nyíɛ leʼnə-wyuu-bə, mədùŋtə ghɔŋbə məbɔ̀ʼtə fuu-yuo leʼnə fɔŋ məŋɛ̀nə kəchisê shʉ́əshʉ́ə. Mbʉ kəchisê kə́ ŋɛ̀nə shʉ́əshʉ́ə ndə ntɛ ndə i chʉʼ nə ŋɛ̀nə nɔ fɛ lʉ̀ hə ndə woməsʉʉ nə bɛ kəchisê. 19 Mbʉ fɔŋ kəyəŋkwɛʼtəŋ sáanə ndəŋ viabə itia, yəŋkwɛʼtəŋbə ndə i bɛ mu lɔʼ-bətə̂ŋ-tə inchəŋ kùunə. Nyii kwɛ́nə Babilɔŋ ndə ɔ shʉ́ə daa, chìi ɔ nú ndʉʼ-tɛ́ŋ-tʉʉbʉə-shʉ́əshʉ́ə-Nyii-mə inchəŋ. 20 Ŋkʉə-sê-bə ndə i bɛ ntəŋntəŋ muu sə̀ʼnə inchəŋ bɛ́, kwɔŋhə bɔŋleʼ mì inchəŋ. 21 Bəlɔkɔʼɔ vii ndə mbyu imɔʼ dìe tə bɛ nə bəkiluŋ njuɔ taa nə wuŋ kwi, gwùtə hə yuo ndəŋ bʉə, bɔ̂ŋ chɛ̀ŋ Nyii bʉʼka ŋgʉəʼ ndə bɔ̂ŋ kə nyíɛ ndə vii kə́ gwùtə ndəŋ bɔŋ, bʉʼka mbʉ ŋgʉəʼ nɔ kə shʉ́ə daa.