1 Ndʉʉmɛ, mɔ lɛ́nə nyíɛ mbʉ Vaabinjyʉʉ ndə ɔ tə́nə ndəŋ Kwɔŋ Sayɔŋ ghɔŋbə bʉə 144,000 ndə bɔ̂ŋ kie yie-e, leʼnə yie-Tie-e, ndə bə nyɔ̀ʼ chutəyi-bɔŋ. 2 Mɔ yʉ́ gyʉʉbɛʼ yuo kə́ gìe nə gyʉʉ muu buŋmbi ndə i tʉʼ gwù nə ghʉəʼkə leʼnə fuu-yuo shʉ́əshʉ́ə. Mbʉ gyʉʉ ndə mɔ yʉ́ i bɛ nə gyʉʉ ŋkyitə ndə bʉə bʉ́ʼ ŋkyitə tʉʼ bʉ́ʼ.

3 Bɔ̂ŋ kə́ yùɔ lyuu fefe bəshʉ mbʉ kəyetə, leʼnə fɔ-ŋɛnə-bə-īŋ kwi ghɔŋbə mbʉ bəntəŋbəshʉ ghəŋ ndə bɔ̂ŋ kie kuŋhə. Wo kə bɛ ghɔ ndə bəkɔ ɔ yétə mbʉ lyuu fɛ yaʼkɛŋ haʼ bʉə-bīŋ 144,000 ndə bə nɔʼ kə chʉ̀ʼ tʉkə-ʉə kəchisê. 4 Nɔ bɛ bʉə ndə bɔ̂ŋ gòʼ təmə nɔʼ bʉ́əhə ŋwɔŋtə-ʉə nə bəke fɛ, bʉʼka bɔ̂ŋ nɔ bíe bəŋgwɔŋ. Nɔ bɛ bʉə-bɔ̄ŋ ndə bɔ̂ŋ kə́ gɛ̀ hə bɔ̌ŋ mbʉ Vaabinjyʉʉ ndə yəŋkə təmiyɔŋ ndə ɔ kə́ gɛ̀ chɔ. Bə nɔʼ chʉ̀ʼ tʉkə-ʉə mu bʉəməsʉʉ ndə məbɛ fəŋ bəfɔ ndə bə kɔ́ tʉ Nyii leʼnə mbʉ Vaabinjyʉʉ. 5 Lɛɛŋkə chʉʼ nə fyú hə chu-bɔŋ fɛ. Bɔ̂ŋ kie kwɔtəkə mu məchimbi-bɔŋ fɛ.

6 Ndʉʉmɛ, mɔ nyíɛ ibɛʼ-yə wontəŋNyii, ɔ kə́ tíe tíŋ kətʉ-bʉʼʉ nə ntəŋjyujyu ndə i gòʼ təmə kie liʼ-i fɛ, ndə məgwè lɔ̀ʼ tʉ bʉə-kəchisê, tʉ lɔʼ-bətə̂ŋ-tə inchəŋ, lɔŋbə inchəŋ, ŋgie-bətə̂ŋ-bə leʼnə nuɔ-bʉə-tə. 7 Ɔ gìe nə gyʉʉ dədə mbɔ, "B̈ii fàa Nyii bɔŋleʼ kɔ́ kuŋhə tʉ ɔŋ bʉʼka ndʉʉ chʉ̀ə ŋkwɛ-ɛ nɔʼ kʉ̀ʼnə, b̈ii lə̀ʼtə ɔŋ ndə ɔ chìi yuo, chìi chisêkə, chìi muukwɛʼtəŋmə leʼnə vâabəlʉ̂ʉ muu."

8 Ibɛʼ-yə wontəŋNyii tyúnə bɔ̌ŋ fəŋ kə́ ghɔ̀ŋ mbɔ, "Ɔ nɔʼ gwù, Babilɔŋ ndə ɔ bɛ fɔŋ kəyəŋkwɛʼtəŋ nɔʼ gwù, mbəŋ-ɛŋ ndə ɔ chìi lɔʼ-bətə̂ŋ-tə bənchəŋ nú ndʉʼ-məntɔ-bəsəŋ-mə-i ndə i gwè nə tʉʉbʉə-Nyii."

9 Ibɛʼ-yə wontəŋNyii ndə ɔ tyúnə bɔ̌ŋ fəŋ vɛʼ bûu gwè hə bɔ̌ŋ bɔŋ kə́ gìe nə gyʉʉ dədə mbɔ, "Kaʼ wo lə̀ʼtə mbʉ nyaa bʉəbʉə ghɔŋbə finə-i, ndə bə chìi, bɔŋleʼ fí cheʼkə-i chutəyi-ɔ, byuunɔ ndəŋ kwii-i, 10 təmə ɔ bu leʼ nú ndʉʼ-tɛ́ŋ-tʉʉbʉə-Nyii-mə ndə ɔ nɔʼ véʼ nə ghʉəʼkə nchəŋnchəŋ-ɛŋ mu ndʉ̂ʉ tʉʉbʉə-e, bə bɔŋleʼ chɔ́ŋhə ɔŋ nə viʼi ndə i tʉʼ kyʉ́ʉ kie yɔʼ-məkɔŋ-kə bəshʉ bʉəntəŋNyii ndə bɔ̂ŋ bɛ ŋkʉʉ leʼnə mbʉ Vaabinjyʉʉ. 11 Ndyʉʼ-viʼi-kə ndə i tʉʼ chɔ́ŋhə bɔŋ bu kə́ kóʼ təmə liʼ-i nə bɛ ghɔ fɛ, i bu bɛ ndʉʉbətyuʼ ghɔŋbə ndʉʉnəchî təmə bɔ̂ŋ nə káa fɛ, tʉ bʉə ndə bɔ̂ŋ tʉʼ lə̀ʼtə mbʉ nyaa bʉəbʉə ghɔŋbə finə-i ndə bə chìi leʼnə wotəmiyɔŋ ndə ɔ fí cheʼkə ndə i tə́nə ndəŋ yie-e."

12 Yɔ̄ŋ-yə nɔ dʉ̀ʼ mbɔ b̈ʉə Nyii yá fyiihə-ʉə, lyʉ̀ʉtə́nə ndʉʉ ndə bɔ̂ŋ tʉʼ nyíɛ ŋgʉəʼ, bʉə ndə bɔ̂ŋ tʉ́ʼ bəŋkahə-Nyii bɔŋleʼ mɔ̀ʼfyiihə-ʉə ndəŋ Jiso.

13 Mɔ yʉ́ gyʉʉ yuo i kə́ ghɔ̀ŋ mbɔ, "Nyɔ̀ʼ nukə-ɔ̄ŋ, tʉʉjyu nɔ bɛ yi-bʉə-yə ndə bɔ̂ŋ nə kə̂ kwú kə́ fɔ̀ʼ tʉ Nyii!" LyʉʉhəNyiikə bɛ́ŋ mbɔ, "Ɔŋ, kɛŋ shʉəŋ, bɔ̂ŋ bu kie tʉʉjyu, bʉʼka bɔ̂ŋ bu káa ndə fɔʼɔ-shʉ́əshʉ́ə-yʉə, bʉʼka fɔʼtə-ʉə bu gɛ̀ hə bɔ̌ŋ bɔŋ."

14 Nɔ ndʉʉmɛ, mɔ lɛ́nə nyíɛ, ŋkʉə-kəmbɔʼ-kəfyuʼ-kə wobɛʼ kə́ dùʼ ndəŋ ghɔ nə vaa-woməsʉʉ, nə bɛnə kətʉ-ɔ ndə bə chìi nə goo, ɔ yá setəkə kəghɔ-ɔ ndə i bɛ nə setə-síi-lɛshi-kə.

15 Ibɛʼ-yə wontəŋNyii fyú hə mu njaafɛ̀ʼndɛŋNyii tíi nə gyʉʉ dədə ghɔ̀ŋ tʉ ɔŋ mbɔ, "Lʉ̀ setəkə-a chʉ́ə mbʉ ŋgwiehə nə yɔŋ bʉʼka mbʉ ndʉʉ kwètə nɔʼ kʉ̀ʼnə, bʉʼka chisêkə nɔʼ tə̀ŋ kʉ̀ʼnə ndə məkwètə!" 16 Nɔ, mbʉ wo ndə ɔ dùʼ ndəŋ mbɔʼ-yuo-kə, gháhə setəkə-i chʉ́ə chisêkə.

17 Ibɛʼ-yə wontəŋNyii fyú ghɔ mu njaafɛ̀ʼndɛŋNyii yuo, kie setə-chyʉ́ʉ-kə ghɔ kəghɔ-ɔ haʼ ndə maa-yīŋ. 18 Ibɛʼ-yə wontəŋNyii fyú ghɔ mu kəyəŋfɛ̀ʼndɛŋNyii ndə kie ɔ kie viʼi, ɔ tíi yīŋ-yə ndə ɔ kie setə-chyʉ́ʉ-kə kəghɔ-ɔ le nə gyʉʉ dədə kə́ ghɔ̀ŋ mbɔ, "Gháhə setəkə-a síi nchyuu-məntɔŋ-geleb-bə ndəŋ lyʉʼʉ kəchisê bʉʼka ntɔŋmə-i nɔʼ tə̀ŋ." 19 Ndʉʉmɛ, mbʉ wontəŋNyii gháhə setəkə-i tíŋ nə yɔŋ kəchisê chètə mbʉ məntɔŋ geleb ndəŋ lyʉʼtə-i, yíɛʼhə mɔ̀ʼ mu lɔkɔʼ kəŋkyʉʉ tʉʉbʉə-Nyii ndə bə lyúʼ ntɔŋ-kətyʉ-mə chɔ ndə ndʉʼmə. 20 Bə kɔ́ŋ mbʉ məntɔŋ mu kəŋkyʉʉ ndə mə-kə́-lyúʼ ntɔŋmə muŋgɔ kəyəŋ ndə i fyú hə mu kəyəŋkwɛʼtəŋ, fɔbʉəkə fyú chɔ kè nə ŋgwɛŋ tə gɛ̀ dàa nə ŋkɔŋ-bəghǔu-hə ghyʉʉ nə wuŋ taa bɔŋleʼ dɔ̀ŋnə tə bɛ nə saafyii nə njuʼ kwii.