1 Ndʉʉmɛ, mɔ nyíɛ ibɛʼ-yə cheʼkə yuo, i gʉ́ə bɔŋ-kə́-leʼ bɛ nu-chíechu-kə, bʉəntəŋNyii təkwiitia nə ŋgʉəʼ təkwiitia, ndə bɛ ndyiʼtəbə, bʉʼka nɔ bɛ ndyiʼtə-tʉʉbʉə-Nyii-bə ndə ɔ bu dʉ̀ʼ. 2 Mɔ nyíɛ fɔbɛʼkə ndə i bɛ nə muukwɛʼtəŋ-galashi-mə ndə bə fínə ghɔŋbə viʼi leʼnə bʉə ghɔ ndə bɔ̂ŋ nɔʼ ghɔ́ʼ mbʉ nyaa bʉəbʉə ghɔŋbə finə-i ndə bə kə chìi leʼnə ntyʉʉ shʉ-ŋwɔʼnə-tə ndə i bɛ ndəŋ yie-e. Bɔ̂ŋ kə́ tə́nə mbʉə muukwɛʼtəŋ-galashi-mə, nə bəŋkyitə Nyii kəghɔ-bɔŋ. 3 Bɔ̂ŋ kə́ yùɔ lyuu Mushi vaafɔ̀ʼ-Nyii leʼnə lyuu mbʉ Vaabinjyʉʉ mbɔ,

"Fɔʼtə-a nɔ gʉ́ə bɔŋ-kə́-leʼ bɛ nu-chíechu-kə

Oo Nyii Tiekətʉ ndə a kie ghʉəʼkə inchəŋ!

Fiatə-a nɔ bɛ ndyʉndyʉ bɔŋ-kə́-leʼ bɛ shʉəŋ

Oo Fɔŋ ndə ɔ tʉʼ sɔ́ʼ lɔʼ-bətə̂ŋ-tə!

4 Bɛ nda ndə ɔ bu gòʼ təmə fàa a, Tiekətʉ,

kɔ́ kuŋhə a fɛ?

Mbəŋ-aŋ tətɛʼ a nɔ bɛ ŋkʉʉ.

Lɔʼ-bətə̂ŋ-tə nchəŋnchəŋ bu gwè lə̀ʼtə a,

bʉʼka a nɔʼ kɛ̀ʼ fɔʼtə-a ndə i bɛ ndyʉndyʉ."

5 Yɔ̄ŋ-yə kʉ̂ʉ tíŋ, mɔ lɛ́nə, nyíɛ njaafɛ̀ʼndɛŋNyii ndə bɛ lɛʼkə ndə i bɛ ndə mənú gwù-i kə́ bɛ yuo i kə́ tə́nə ighʉ́ʉnə. 6 BʉəntəŋNyii təkwiitia ndə bɔ̂ŋ kie ntɛ-ŋgʉəʼ-hə kəghɔ-bɔŋ təkwiitia fyú hə mu njaafɛ̀ʼndɛŋNyii, mɔ̀ʼ kɛŋ vâa ndyi-kəfyuʼ-chɛŋ-hə mbʉə-bɔŋ, kɔ́ʼtə kwɔbə ndə bə chìi nə goo ghɔʼ-bɔŋ. 7 Mbyu kəfɔ mu fɔ-ŋɛnə-bə-īŋ kwi kɔ́ bəbaŋ gheghe təkwiitia ndə bə chìi nə goo tʉ mbʉ bʉəntəŋNyii təkwiitia ndə i bɛ i lə́ŋtə nə tʉʉbʉə-Nyii ndə ɔ chí mbi təmə liʼ-i ghɔ fɛ. 8 Ndyʉʼkə lə́ŋ mu mbʉ njaafɛ̀ʼndɛŋNyii ndə i lɔ̀ hə ndə məgʉə-Nyii ghɔŋbə ghʉəʼkə-i, təmə wo bɛ ghɔ ndə bəkɔ ɔ sʉ́ʉ mu mbʉ njaafɛ̀ʼndɛŋNyii fɛ, tə mbʉ ntɛ-ŋgʉəʼ-hə təkwiitia ndə mbʉ bʉəntəŋNyii təkwiitia kə gwè nə yɔŋ le yi mì.