Nu-kɛ̀ʼ-bə 8

Məbɔ̀ʼ ibɛʼ-yə mbəʼ-mʉə-kə ndə bɛ vɛʼ təkwiitia

1 Ndʉʉ ndə mbʉ Vaabinjyʉʉ bɔ̀ʼ ibɛʼ-yə mbəʼ-mʉə-kə ndə vɛʼ təkwiitia, yəŋbə líitə yuo mbɔ loʼo ndə kʉʉkə məniʼ. 2 Ndʉʉmɛ, mɔ nyíɛ mbʉ bʉəntəŋNyii təkwiitia ndə bɔ̂ŋ tə́nə bəshʉ-Nyii, bə kɔ́ gyʉəʼ-vaa-tə tʉ bɔŋ təkwiitia.

3 Ibɛʼ-yə wontəŋNyii gwè tə́nə bəshʉ kəyəŋfɛ̀ʼndɛŋNyii nə baŋ tɔ̀ŋ kəlyii kəghɔ-ɔ ndə bə chìi nə goo. Bə kɔ́ lyiikə tʉ ɔŋ buŋmbi mbɔ ɔ fìnə ghɔŋbə məgháaNyii bʉə-Nyii bənchəŋ tɔ̀ŋ ndəŋ kəyəŋfɛ̀ʼndɛŋNyii ndə bə chìi nə goo i kə́ tə́nə bəshʉ mbʉ kəyetə. 4 Ndyʉʼkə ndə i fyú hə ndəŋ mbʉ kəlyii ndə bə tɔ̀ŋ, ghɔŋbə məgháaNyii bʉə-Nyii, fyú hə mu mbʉ baŋ ndə i bɛ kəghɔ-mbʉ-wontəŋ, kóʼ gɛ̀ bəshʉ-Nyii. 5 Ndʉʉmɛ, mbʉ wontəŋNyii byíi viʼi ndəŋ kəyəŋfɛ̀ʼndɛŋNyii véʼ mu mbʉ baŋ tɔ̀ŋ kəlyii ilə́ŋnə yʉ̀ʼ kəchisê. Fuu yuo bɔ̀ʼtə bɔŋleʼ dùŋtə, leʼnə-wyuu-bə kə́ leʼnə, ŋkʉə-sê-bə kə́ ŋʉ̀ʼnə.

Fəŋ gyʉəʼ-vaa-tə kwi

6 Ndʉʉmɛ, mbʉ bʉəntəŋNyii təkwiitia ndə bɔ̂ŋ kie gyʉəʼ-vaa-tə təkwiitia shʉ̀tə ŋwɔŋtə-ʉə ndə mətʉ̀ʉ.

7 Fəŋ wontəŋNyii tʉ́ʉ yi-yə gyʉəʼə, bə yʉ̀ʼ mbəʼ-viʼi-bə ghɔŋbə vii ndə i fìnə ghɔŋbə fɔbʉəkə, kəchisê. Viakə imɔʼ ndəŋ chisêkə ndə bə nɔʼ gyʉ̀əhə yəŋbə itia kyʉ́ʉ, via-kətyʉ-kə imɔʼ ndə tyʉbə inchəŋ ndə bə nɔʼ gyʉ̀əhə ndə yəŋbə itia kyʉ́ʉ leʼnə ŋkɔ nchʉnchʉ inchəŋ ndə i bɛ chɔ kyʉ́ʉ ghɔ.

8 WontəŋNyii ndə ɔ tyúnə bɔ̌ŋ fəŋ tʉ́ʉ yi-yə gyʉəʼə, fɔbɛʼkə ndə i bɛ nə kwɔŋkwɛʼtəŋ ndə viʼi kə́ kyʉ́ʉ chɔ, bə chɔ̀ʼhə mɛ̀ʼ mu muukwɛʼtəŋmə, viakə imɔʼ ndə mbʉ muukwɛʼtəŋ ndə bə gyʉ̀əhə yəŋbə itia kíahə bə̀ŋ fɔbʉəkə. 9 Viakə imɔʼ ndə fɔ-ŋɛnə-bə ndə bɔ̂ŋ bɛ mu mbʉ muu kwútə haʼ ghʉə ghɔ, bə bʉ́əhə buukwɛʼtəŋbə mu mbʉ muu haʼ ghʉə ghɔ.

10 WontəŋNyii ndə ɔ tyúnə bɔ̌ŋ fəŋ vɛʼ bûu tʉ́ʉ yi-yə gyʉəʼə, lɔʼkwɛʼtəŋ shíʼ hə yuo, kə́ kyʉ́ʉ nə nduukə, gwù ndəŋ viakə imɔʼ mu ŋgwɛŋhə ndə bə gyʉ̀əhə yəŋbə itia ghɔŋbə vâabəlʉ̂ʉ ndə i kə bɛ chɔ. 11 Yie mbʉ lɔʼ-ghɔ̄ kə́ bɛ Məchʉ́ʼ*8:11 Fɔkə ndə bə kə́ tíi nə Məchʉ́ʼ fɛ̄ŋ, nɔ kə bɛ ntɛ kətyʉbɛʼ ndə i kə́ chʉ́ʼ.. Viakə imɔʼ mu mbʉ muu ndə bə nɔʼ gyʉ̀əhə yəŋbə itia kíahə kə́ chʉ́ʼ, bʉə buŋmbi nɔ kə kwútə ndə bɔ̂ŋ nú mbʉ muu bʉʼka bə nɔʼ kə chìi i kə́ chʉ́ʼ.

12 WontəŋNyii ndə ɔ tyúnə bɔ̌ŋ fəŋ vɛʼ tia tʉ́ʉ yi-yə gyʉəʼə, via-chichi-kə imɔʼ leʼnə via-chisuu-kə imɔʼ leʼnə via-bəlɔʼɔ-kə imɔʼ mu viabə itia ndə bə nɔʼ gyʉ̀əhə bɔŋ chɔ, bə kwɔ̀ŋ bɔŋ mbɔ bɔ̂ŋ mə leʼ báa fɛ. Bə chìi via-mbi-kə haʼ ghʉə nɔ mbɔ chichi məbáa chɔ ndʉʉnəchî fɛ bɔŋleʼ chìi via-ndʉʉbətyuʼ-kə haʼ ghʉə nɔ mbɔ chisuu məbáa chɔ fɛ.

13 Ndʉʉmɛ, mɔ lɛ́nə bɔŋleʼ yʉ́ mbʉʼməghe kə́ tíi tíe kweghɔʼ mu yuo nə gyʉʉ dədə mbɔ, "Ŋgʉəʼ, ŋgʉəʼ, ŋgʉəʼ ndəŋ bʉə ndə bɔ̂ŋ bɛ kəchisê ndʉʉ ndə bəbɛʼbʉəntəŋNyii bətia bu tʉ́ʉ gyʉəʼə!"