21 Mbrə ə̂në, mata ə̂në Abä sə kə she akuzu â sə kə mbrə əndje tə asorô kɔ, Ɨrɨ nə sə kə mbrə əzü ə̂në tshelə ye yində nə kɔ tə sorô rə ndje. 22 Gâ pâ nə kwatəndje, Abä sə sə kə wa ngbanga gâ lə kumu ə̈bə̈ əzü bale ne, bale tshə kâtə̂ əpʉ kə wa ngbanga nə nɔ̂ gâ lə kəna Ɨrɨ nə gâ ye, 23 kanika azü nɔ̂ lʉ Ɨrɨ nə mata ə̂në əndje sə kə lʉ Abä kɔ. Əzü ə̂në tshə lʉ Ɨrɨ Abä nə lʉ ne, tshə lʉ ndje Abä ə̂në tshə wlâ ətshə kɔ lʉ ne.

24 «Djatra əpʉ, mə pa kə e, əzü ə̂në tshə dji əpʉ nə̂ əmə â za lɔsu ye kə ətshə ə̂në tshə wlâ əmə kɔ, tshə sə də sorô nə̂ alɔnɔ̂. Əndje sə sə kə wa ngbanga gâ lə kumu ye ne, bale tshə rô lə kuzu gâ tə̂ sorô gâ ye. 25 Djatra əpʉ, mə pa kə e, alɔ sə kə na gu nə, â ə tə nə kə səke, ə̂në asorô ə̂në əndje sə mata akuzu lə ala Ndjapä kɔ, sə kə dji tshema Ɨrɨ Ndjapä, â əndje nə ə̂në əndje sə kə dji tshema ye nə â za lɔsu əndje kə ətshə kɔ, əndje sə kə sə tə asorô piii. 26 Mbrə ə̂në mata ə̂në Abä sə tə əyïnga sorô kɔ, tshə za äwä kə Ɨrɨ nə ndə kə pa tshə sə ndje tə əyïnga sorô. 27 Â tshə za awlra kə ətshə ndə kə pa tshə wa ngbanga, mbrə ə̂në tshə sə tə Əgblə nə̂ Əzü. 28 Kumu e kpë kpë pâ əndu e ne, mbrə ə̂në alɔ sə kə na gu nə, ə̂në azü nɔ̂ ə̂në əndje sə lə aə̂dû kɔ sə kə dji tshema ye 29 â wutu gashu je. Â əndje ə̂në əndje mâ ə̂rɔ̂ ərə kɔ sə kə she mbrə sorô, â əndje ə̂në əndje mâ əmbrʉ ərə kɔ, əndje sə kə she mbrə ndə kə pa əndje wa ngbanga gâ pa əndje.»

30 «Əmə, mə lï lï ndə kə pa mə mbrə ə̈bə̈ ərə bale ndə kumu əmə də ə̂tə̂ əmə ne. Mə sə kə wa ngbanga ə lï də äwä əpʉ ə̂në mə sə kə dji lə ama Abä kɔ, â kə wa ngbanga nə̂ əmə nə sə də äwänə, mbrə ə̂në mə sə sə kə pra ərə ə̂në tshelə əmə yində nə kɔ ne, bale mə sə kə pra ərə ə̂në tshelə ətshə ə̂në tshə wlâ əmə kɔ yində nə kɔ.

31 «Kədə əmə kə pa əpʉ gâ pâ əpʉ nə̂ əmə də ə̂tə̂ əmə, əpʉ nə̂ əmə nə sə sə tə djatra əpʉ ne.

7 Kandää, əmə, mə sə kə pa djatra əpʉ kə e: ə sə tə ə̂rɔ̂nə mbrə e ndə kə pa, əmə, mə ro. Mbrə ə̂në kədə mə ro ro gu na ye ne, Awotɨ azü nə sə sə kə na gâ tə̂ e ne. Bale, kədə mə ro gu na ye, mə sə kə wla ətshə kə e. 8 Alɔ ə̂në tshə â na, tshə sə kə yisə̂ nə gashu kə azü tshepashɔ ə pa əndje djîngli äwä gâ pâ əpʉ nyaka, gâ pâ əpʉ ərə ə̂në ə sə də äwänə kɔ, gâ pâ əpʉ ngbanga gâ ye. 9 Azü nə djîngli äwä gâ pâ əpʉ nyaka nə, mbrə ə̂në əndje za lɔsu əndje za kə əmə ne,

30 Jezu pâ kwatə̂ye ə pa: «Ə də̂ mbrə əmə də̂ tshema sə̂ kɨ̂ kɔ ne, bale mbrə e də̂ ə kɨ̂ kɔ. 31 Alɔ kə wa ngbanga azü tshepashɔ kə sə̂ kpəsəye kɔ; alɔ kə wli makɔndji tshepashɔ gashu kə sə̂ kpəsəye kɔ. 32 Â ənə̂ əmə, alɔ ə̂në əndje zâ əmə pâ ashɔ ə zâ əmə tɔ gâ lafɔ gâ ye, mə sə kə mbrə ndə kə pa azü nɔ̂ na gâ tə̂ əmə.»

38 Bale, koshe nə pâ: «Âgbɔ̂ Əyïngerə, mə yində nə də lɔsu əmə gâ ye.» Â tshə zâ kumu ye su ashɔ gâ ətshi Jezu nə.

39 Mandânə Jezu pâ əpʉ ə pa: «Əmə, mə nâ gâ pâ ashɔ səye ndə kə pa ngbanga sə je, kanika azü ə̂në əndje lishi li ne kɔ, əndje lishi, ka azü ə̂në əndje sə kə lishi kɔ, əndje do tə̂ əndje tə alayïbula.»

1 E zä əzü ə̂në tshə daka pə tə̂ kə mɔ ə mɔ lə əpʉ lɔsu kɔ gâ tə̂ e, ə pä ashera pä gâ pâ aəpʉ ə̂në tshə pa kɔ ne. 2 Ayə səke wusə̂ nə tə̂ lɔsu ye ə pa əne lï ndə kə pa əne zɨ aərə nɔ̂. Ayə, ə̂në tshə mɔ ə mɔ kɔ, zɨ ənə̂ ye kʉtə̂ akako gûsû. 3 Ətshə ə̂në tshə sə kə zɨ aərə nɔ̂ kɔ, tshə në nëke ətshə nə ə̂në tshə zɨ aərə nɔ̂ zɨ ne kɔ ne, â ətshə ə̂në tshə zɨ aərə nɔ̂ zɨ ne kɔ, tshə wä ngbanga wä gâ pâ ətshə nə ə̂në tshə sə kə zɨ aərə nɔ̂ kɔ ne. Mbrə ə̂në Ndjapä zâ ətshə gâ tə̂ ye gâ ye. 4 Əbə, bə sə tə əde, ə̂në bə wa ngbanga gâ pâ əyïkosəra nə̂ ə̈bə̈ əzü kɔ? Kədə tshə ka pə lafɔ wala kədə tshə te, ə wu kʉtə̂ əyïnga nə. Bale, tshə sə kə ka pə lafɔ, mbrə ə̂në Âgbɔ̂ Əyïngerə sə də awlra ndə kə pa tshə gbɔgbɔ ətshə.

12 Rəkɔ, əzü bale bale lə takpa tə̂ əzə̂ ə pa əpʉ də ama də ə̂tə̂ ye kə Ndjapä gâ pâ aərə ə̂në tshə mbrə̂ gâ ye kɔ je.

13 Rəkɔ, a kätə̂ kə wa ngbanga gâ lə kumu angâ əzə̂ lə takpa tə̂ əzə̂ gâ ye. Bale, e lï də̂ tshelə e gâ tə̂ ərə ə̂në e lï ndə kə mbrə nə ndə kə pa e sə sə tə ə̈bə̈ ərə ndə kə pa aye e ə gbətɔ ə̈nü ye tə̂ nə wala ə te ne. 14 Ənə̂ əmə, mə wusə̂ nə ngâ mâ tə̂ lɔsu əmə tə̂ äwä Âgbɔ̂ Əyïngerə Jezu ə pa ə̈bə̈ ərə bale sə sə tə̂ əmbrʉ nə ne, â ə̈bə̈ ərə sə tə əmbrʉ ərə kʉ lə ala əzü nə ə̂në tshə wû tə əmbrʉ nə kɔ.

17 Mbrə ə̂në alɔ ndə kə pa ngbanga vɔtə̂ nə tə̂ tshelə anda nə̂ Ndjapä kɔ kə sə̂. Kandää, kədə ə vɔtə̂ nə ətshinə tə̂ əzə̂, yekɔ kə wutu gâ tə̂ azü ə̂në əndje wəra tə̂ əndje ndə kə yində Ə̂rɔ̂ Əpʉ nə̂ Ndjapä də lɔsu əndje kɔ?

5 Rəkɔ, e wä ngbanga wä bale gâ lə kumu əzü əlînə ndə kə pa alɔ nə lï, alɔ kə gu Âgbɔ̂ Əyïngerə ne. Ətshə kə yisə̂ ərə ə̂në ə zâ tə̂ ye wû lə əbutshe kɔ gashu lə ala azü nɔ̂ je, ə yisə̂ âdâ aərə ə̂në ə sə tə̂ lɔsu azü kɔ gashu je. Bale, Ndjapä ə tra əzü bale bale ə lï də ərə ə̂në tshə mbrə̂ gâ ye kɔ je.

2 Mbrə ə̂në, Ndjapä sə kə wa ngbanga gâ lə kumu e Lïndə̂ ngbanga ə̂në e wa gâ lə kumu azü kɔ. Ərə ə̂në e sə kə za ndə kə to də ərə kə angâ e kɔ də̂ Ndjapä sə kə za ndə kə to də ərə kə e. 3 Mbrə yekɔ də̂ bə wu aya ebe ə̂në ə sə lə ala aye zə â wu ayɔ ə̂në ə sə lə ala zə kɔ wu ne kɔ? 4 Mbrə yekɔ də̂ bə pa kə aye zə ə pa: "Kä ə kä mə ma aya ebe ə̂në ə sə lə ala zə kɔ", əbə ə̂në bə wu ndje ayɔ ə̂në ə sə lə ala zə kɔ wu ne kɔ?

1 Mandâ ərə səkɔ, mə djî ə̈bə̈ ərə mata tshema ə̈bə̈ âgbɔ̂ ə̂kpû azü mâ lafɔ, ə̂në ə pâ əpʉ tə âgbɔ̂ ə pa:

«Aleluya! A tɔ̈lɔ Əyïlingû!

Əpʉ kə she azü lə kuzu

də kə mbe ətshe gâ ndə awlra sə̈ tə ənə̂ Ndjapä nə̂ əzə̂,

2 mbrə ə̂në aəpʉ kə wa ngbanga nə̂ ye sə tə djatra kə wa ngbanga

â sə də äwänə.

Tshə wâ ngbanga gâ pâ yashe ə̂trû nə

ə̂në tshə ndɨ̂ tshepashɔ də ə̂trû nə̂ ye nə ə̂në tshə mbrə̂ gâ ye kɔ,

â tshə wâ ngbanga ə̈ndjï alayïkosəra nə̂ ye gâ ye,

ə̂në tshə yû tshuku nə lə kəna ye kɔ.»

3 Ə̂kpû azü nə pâ kwatəndje ə pa:

«Aleluya! A tɔ̈lɔ Əyïlingû!

Ngâwo əwo ə̂në ə ju gala nə kɔ,

ə sə kə da o na ye gâ lafɔ piii!»