1 Âgbɔ̂ əpʉ nə̂ Mayïzə nə sə̂ kʉ tə srɨyʉ aə̂rɔ̂ aərə ə̂në ə na gu nə je kɔ â ə sə sə tə djatra aərə nə ne. Âdârə ə̂në ə lï lï bale ndə kə pa, tə̂ äwä kʉtə̂ aəkrɔ nə ə̂në azü ə to alɔnɔ̂ də ə̂ngû də ə̂ngû kɔ, ə mbrə azü nə ə̂në əndje na gâ tə̂ Ndjapä nə kɔ tə azü ə̂në əndje lï nɔ̂ gâ ye ne. 2 Də̂ ne, əndje sə̂ kəmə kə katə̂ äwä kə to aəkrɔ nə gâ ye, mbrə ə̂në azü nə ə̂në əndje vrɔ Ndjapä nə kɔ sə̂ kə sə kəmə mvo äwä bale gbrä gâ ye â əndje sə̂ sə̂ kə wu kəmə kwatəndje ə pa alabə̈ aəpʉ daka pə lə kumu alane ne. 3 Kandää, tə̂ äwä aəkrɔ səkɔ, azü nə sə kə li tshelə əndje də ə̂ngû də ə̂ngû gâ tə̂ anyaka ə̂në əndje mbrə̂ gâ ye kɔ. 4 Mbrə ə̂në ə̈ndjï aäkɔ̈ apagra nə də ə̈ndjï aäkɔ̈ ayabru nə lï lï bale ndə kə pa ə gba tshelə anyaka nə ne.

5 Âdârə ə̂në, Kristə nə pâ əpʉ kə Ndjapä, alɔ ə̂në tshə sə̂ kə na gâ pâ ashɔ kɔ ə pa:

«Tshelə zə mɔ̂ mɔ̂ tə̂ əkrɔ ə̂në əndje tô kɔ wala aərə ə̂në əndje kô kɔ ne,

bale bə mbrə̂ ə̈bə̈ tshekotə̂ kə əmə gâ ye.

6 Tshelə zə mɔ̂ mɔ̂ tə̂ aagia ə̂në əndje sho əndje pâ gblaka kɔ

wala aəkrɔ ə̂në əndje to mbrə anyaka kɔ ne.

7 Bale mə pa:

"Mə na ndə kə mbrə ərə ə̂në tshelə zə yində nə, wââ Ndjapä,

ə lï də əpʉ ə̂në əndje tâ gâ pâ əpʉ nə̂ əmə lə Fraka nə̂ Ndjapä kɔ."»*

8 Tshə pâ angbʉlînə ə pa: «Tshelə zə mɔ̂ mɔ̂ tə̂ aəkrɔ wala aərə ə̂në əndje kô wala aagia ə̂në əndje shô əndje pâ gblaka kɔ wala aəkrɔ anyaka ne ə fʉ̂ fʉ̂ tə̂ zə ne.» Kandää, azü nə tô aəkrɔ səkɔ Lïndə̂ ndəma âgbɔ̂ əpʉ nə̂ Mayïzə nə. 9 Mandânə, tshə pâ: «Mə na ndə kə mbrə ərə ə̂në tshelə zə yində nə kɔ.» Rəkɔ, Kristə nə lîwu aangbʉlî aərə nə ndə kə pa tshə za bishi nə gâ mandânə. 10 Jezu Kristə nə mbrə̂ ərə sə̂ ə̂në tshelə Ndjapä nə yində nə kɔ; tshə kâ ə̂tə̂ ye də ə̂tə̂ ye äwä bale gbrä gâ ye, â rə də̂ Ndjapä nə yûtu nyaka tə̂ əzə̂ gâ ye kɔ.

11 Awotokrɔ bale bale sə kə ka alɔnɔ̂ gâ tə̂ ama kosəra nə̂ ye ndə kə pa, alɔnɔ̂ tshə to kʉtə̂ marä aəkrɔ səkɔ, ə̂në ə lï lï alɔ bale ndə kə pa ə gba tshelə anyaka ne kɔ. 12 Bale, Kristə nə tô əkrɔ kʉ bale mbrə anyaka, â mandânə, tshə sə̂ gâ tʉ gâ ndə ndəkɔ Ndjapä nə piii gâ ye. 13 Mandânə səye, tshə ka ə ka ə pa Ndjapä ko alayïkowɔ nə̂ əne tə mbata ə̈nü əne.* 14 Mbrə ə̂në, tə̂ äwä kə za tə̂ ye kə Ndjapä nə kʉ äwä bale kɔ, tshə mbrə̂ azü ə̂në Ndjapä nə kô əndje kpî gâ ye kɔ tə azü ə̂në əndje lï nɔ̂ gâ ye piii.

15 Əpʉ ə̂në Âgbɔ̂ Yîrə̂ ə pa kə əzə̂ ndje kɔ kə sə̂. Mbrə ə̂në tshə pâ angbʉlînə ə pa:

16 «Əyïlingû pâ:

"E wü-a, mbʉkʉ ə̂në ä də aəndje sə kə mbrə nə,

mandâ aəlo səkɔ kɔ kə səye:

mə sə kə ko aâgbɔ̂ aəpʉ nə̂ əmə gâ tə̂ lɔsu əndje

â mə sə kə ta nə gâ lə akrɔ əndje."»

17 Mandânə, tshə pâ:

«Mə sə sə kə li tshelə əmə kwatə̂mə bale gâ tə̂ anyaka nə̂ əndje

wala aəmbrʉ aərə nə̂ əndje ne.»*

18 Kandää, tə̂ ətshe ə̂në tshelə anyaka gbâ gâ ye kɔ, kə to əkrɔ mbrə nyaka sə sə je kwatə̂ye ne.

19 Â rəkɔ, alaye, a wusə̂ ngâ ə pa äwä krɔ̂ kə əzə̂ gâ ye ndə kə pa a li gâ tə̂ ətshe ə̂në ə sə kpî ə rô ə̂dû nə kɔ gâ ye, mbrə ə̈ndjï Jezu nə ə̂në ə tû gâ ye kɔ. 20 Tshə krɔ̂ ə̈bə̈ tafa äwä sorô kə əzə̂ sɔ lə əgerə ləba tshelə Anda Ndjapä nə, ə̂në ə tə nə kə də̂ tshekotə̂ ye tə əzü kɔ. 21 Â a sə də ə̈bə̈ âgbɔ̂ awotokrɔ ə̂në tshə sə gâ tə̂ kumu anda Ndjapä nə kɔ. 22 Rəkɔ, a nä trö tə̂ Ndjapä nə də lɔsu əzə̂ bale, də lɔsu ə̂në a zâ nɔ̂ kə ətshə gâ ye kɔ, lɔsu ə̂në Ndjapä nə yûtu əmbrʉ ərə tə̂ nə gâ ye kɔ də əndu əzə̂ ə̂në tshə yûtu də ə̈bə̈ ə̂ngû ə̂në ə sə mvo gâ ye kɔ. 23 A däka pə tə̂ kə yerɔ ərə ə̂në a za lɔsu əzə̂ nə gâ pâ nə kɔ lə ala azü nɔ̂ tə djatra ərə, a mɔ̈ mɔ̈ tə̂ äwä nə ne, mbrə ə̂në ətshə ə̂në tshə zâ ama də əpʉ ərə nə kɔ, tshə lï ndə kə pa a za lɔsu əzə̂ gâ tə̂ əpʉ nə̂ ye nə. 24 Ala əzə̂ gbɔ̈ tə̂ angâ əzə̂ lə takpa tə̂ əzə̂ ndə kə pa a mbrə angâ əzə̂ nə gâ tə̂ äwä kə yi tə̂ əndje də azü ə mbrə âtshɔ̂ aərə. 25 A tshï tshï äwä aangbɔ nə̂ əzə̂ tʉ, mata ə̂në alabə̈ azü nə ə mbrə tə mandʉ nə kɔ ne. Bale, a gbɔ̈gbɔ lɔsu angâ əzə̂ lə takpa tə̂ əzə̂, ə mbrə̈ rə ə ro ənə̂ sə̂ ə̂në a mbrə̂ ətshinə kɔ, ə̂në e wu ə pa əlo Âgbɔ̂ Əyïngerə ndô trö gâ ye kɔ.

26 Mbrə ə̂në, kədə əzə̂ mbrə nyaka tə mblä ə̂në a wûsə̂ djatra əpʉ gâ ye kɔ, ə̈bə̈ kə to əkrɔ mbrə anyaka nə da daka pə je kwatə̂ye ne. 27 Bale, ərə ə̂në ə daka pə je kə də̂ kə ka mbrə ngbanga nə̂ Ndjapä də âgbɔ̂ awa, gâ ndə âgbɔ̂ əwo ə̂në ə ju azü ə̂në əndje wə̂ra tə̂ əndje tə̂ Ndjapä gâ ye kɔ je. 28 Leme-e, kədə ə̈bə̈ əzü kə wə̂ra tə̂ ye ndə kə mbrə ərə Lïndə̂ âgbɔ̂ əpʉ nə̂ Mayïzə, əndje sə kə wo ətshə ə sə sə kə wu əyo ye bale ne, kədə azü bishi wala vəta kə pa əpʉ nə â əndje wusə̂ nə ə pa ə sə tə djatra əpʉ.* 29 Ənə̂ əzü ə̂në tshə wu Ɨrɨ Ndjapä nə tə ashɔ ə̈nü ye, ə̂në tshə wu ə̈ndjï mbʉkʉ nə ə̂në ə yûtu ətshə gâ ye kɔ kʉ tə amba ərə lə ala ye, ə̂në tshə gû Yîrə̂ ə̂rɔ̂tə̂ Ndjapä nə kɔ, ngbanga nə̂ ye nə sə sə kə ro pâ nə ne a! E wü lə kumu e je o! 30 Mbrə ə̂në a wusə̂ ətshə ə̂në tshə pâ: «Əmə kə piyi ködä əmbrʉ ərə kə azü! Əmə kə piyi tshe mandâ əmbrʉ ərə kə əndje je!» Tshə pâ kwatə̂ye ə pa: «Əyïlingû ə wa ngbanga azü nə̂ ye je.»* 31 Ə sə tə əmbrʉnə ndə kə te gâ lə kəna Ndjapä nə ə̂në tshə sə tə sorô kɔ.

32 E lï tshelə e tə̂ aangbʉlî aəlo sə̂ ə̂në Ndjapä krâ tshelə ala e â e vɔ̂tə̂ kə wu əyo tə bandanə ə rû tshelə e ə mbrə̂ awlra ngbatshe kɔ. 33 Ndə ə̈bə̈ alɔ, azü gû e ə gî əyo tə̂ e lə ala azü nɔ̂; ndə ə̈bə̈ alɔ, e tɨ̂ azü ə̂në əndje gi əyo tə̂ əndje rə kɔ gâ lafɔ. 34 Ngâ, əyo alayïkânga mbrə̂ e â e yində nə də ə̂rû tə̂ lɔsu e ndə kə pa azü ko aə̂rɔ̂ aərə nə̂ e də awlra, ə̂në e wusə̂ nə ə pa e sə də aə̂rɔ̂ aərə ə̂në ə daka pə je piii, ə̂në ə rô aənə̂ səkɔ gâ ye kɔ. 35 Rəkɔ, e tshï tshï äwä lɔsu ə̂në e zâ nɔ̂ kə Ndjapä nə kɔ tʉ ne, mbrə ə̂në e sɔtə̂ ə̈bə̈ âgbɔ̂ ərə tshemandâ nə je. 36 Ngâ, e lï ndə kə pa e wusə̂ kə ru tshelə e ka ə mbrə ərə ə̂në tshelə Ndjapä yində nə kɔ, kanika ə sɔtə̂ ərə nə ə̂në Ndjapä nə zâ ama də əpʉ nə gâ ye kɔ. 37 Mbrə ə̂në Fraka nə̂ Ndjapä pâ:

«Alɔ daka pə teashe, kʉ teashe,

â ətshə ə̂në tshə lï ndə kə na nə kɔ

tshə sə kə yi kumu ye,

əndʉ ye sə sə kə dɨ nə ne.»

38 Ndjapä pâ əpʉ ə pa:

«Ə̂rɔ̂ əzü lə ala əmə sə kə sə də sorô tə̂ äwä lɔsu ye.

Bale, kədə tshə do tshepa ye gbo äwä nə,

tshelə əmə sə sə kə mɔ tə̂ ye ne.»*

39 Ənə̂ əzə̂, a sə sə tə azü ə̂në əndje sə kə gi tə̂ əndje gâ mandânə ndə kə yu nə kɔ ne, bale a sə tə azü ə̂në əndje za lɔsu əndje kə Jezu ndə kə she lə kuzu kɔ.