1 Rəkɔ, a kä kä kʉ gâ pâ aangbʉlî aəpʉ ə̂në əndje yîsə̂ nə kə əzə̂ gâ ye gâ pâ əpʉ nə̂ Kristə nə kɔ ne. A dö ala əzə̂ gâ tə̂ ərə ə̂në ə lï də âgbɔ̂ əzü kɔ ə kwä tə̂ əzə̂ kwä ə gü gâ tə̂ aangbʉlî aəpʉ nə ne, mata əpʉ kə tshi äwä aərə ə̂në ə na də əzü gâ tə̂ äwä kuzu kɔ tʉ də əpʉ kə za lɔsu kə Ndjapä, 2 əpʉ kə yisə̂ ərə gâ pâ əpʉ abatamo də əpʉ kə za kəna gâ pâ azü, əpʉ kə she akuzu də əpʉ ngbanga ə̂në Ndjapä ə wa gâ lə kumu azü gbrä je kɔ. 3 Ərə ə̂në a mbrə je kɔ kə sə̂, kədə Ndjapä kə yində nə.

4 Mbrə ə̂në, azü ə̂në əndje lîshi ndə ə̂yîtshe ndə ə̈bə̈ alɔ gâ ye, ə̂në əndje djî atshɔ âkrâ tshelafɔ gâ ye, ə̂në əndje sɔ̂tə̂ Âgbɔ̂ Yîrə̂ gâ ye kɔ, 5 ə̂në əndje djî atshɔ ə̂rɔ̂ Əpʉ nə̂ Ndjapä gâ ye ə wûsə̂ aawlra tsheshu ə̂në ə wutu je kɔ gâ ye kɔ, 6 â bale, ə̂në əndje tshî äwä əpʉ lɔsu nə tʉ gâ ye kɔ, əndje lï lï bale ndə kə pa əndje tshi äwä angbrɔ kə mbrə tə̂ əndje nə tʉ ə do tə̂ əndje gu nə kwatəndje ne. Mbrə ə̂në əndje sə kə ku Ɨrɨ Ndjapä nə gâ ala masheyɔ nə mbrə ənə̂ əndje də ə̂tə̂ əndje, gâ ətshi azü nɔ̂ tə ərə gana.

7 Alɔ ə̂në yavrɨ ni alɔnɔ̂ gâ pâ ə̈bə̈ ashɔ â arəgo ko lə ashɔ səkɔ mbrə azü nə ə̂në əndje djô ashɔ səkɔ, Ndjapä tô ngwarə tə̂ nə gâ ye. 8 Bale, kədə aəshi də gonge kə ko lə ashɔ nə, ashɔ səkɔ tɔ tɔ gâ tə̂ ə̈bə̈ ərə bale ne, â Ndjapä sə trö ndə kə dra nə â əndje sə kə yi əwo lə nə.

9 Alaye ə̂në mə yində e wââ kɔ, ə̂në ä sə kə pa əpʉ səye rə kɔ, ä wûsə̂ nə mâ tə̂ lɔsu ä ə pa ä wu aə̂rɔ̂ aərə, mbrə e, ə̂në e sə tə̂ äwä kə she lə kuzu kɔ. 10 Mbrə ə̂në Ndjapä sə sə tə əyïgəwlanga ndə kə pa kosəra ə̂në e mbrə kɔ, də kə yində azü ə̂në e yində əndje də əɨrɨ ye kɔ â mbrə ə̂rɔ̂ nə kə azü nə̂ Ndjapä â daka pə kə mbrə nə kɔ, ə̂sə̂ nə ro ətshə ne. 11 Ä yində nə ə pa əzü bale bale lə takpa tə̂ e sə pə kʉ də əgo kə mbrə ə̂rɔ̂ ərə nə rə ndə kə pa e bata äwä lɔsu e ə̂në e zâ gâ pâ Ndjapä nə kɔ ʉrrr ndjɔ gâ tə̂ ama nə. 12 E mɔ̈ mɔ̈ tə̂ äwä nə bale ne, ə mbrə̈ ərə mata azü ə̂në, tə̂ äwä lɔsu əndje də kə ru tshelə əndje lə aərə kɔ, əndje sə kə sɔtə̂ aərə ə̂në Ndjapä zâ ama leme-e də əpʉ nə gâ ye kɔ.

13 Alɔ ə̂në Ndjapä nə sə̂ kə za ama kə Abraamo də əpʉ səkɔ, ə̈bə̈ əzü bale ə̂në tshə rô Ndjapä nə kɔ gûta gû ne â Ndjapä nə drâ ama ye də əɨrɨ ye də ə̂tə̂ ye, 14 â pâ: «Djatra əpʉ, mə sə kə to ngwarə gâ pâ zə â angwa zə sə kə ngba nə ngâ.»* 15 Â rə də̂ Abraamo nə kânga tshelə ye â kâ ʉrrr, â sɔ̂tə̂ ərə nə ə̂në Ndjapä nə zâ ama də əpʉ nə kə ətshə gâ ye kɔ. 16 Kandää, azü sə kə dra ama əndje də əɨrɨ ə̈bə̈ âgbɔ̂ əzü ə̂në tshə rô əndje gâ ye kɔ, â əpʉ kə dra ama nə sə tə ə̈bə̈ ərə ə̂në əndje ka gâ pâ nə ndə kə pa aashera nɔ̂ nglɔ lə takpa tə̂ əndje. 17 Äwä bale ndje, Ndjapä nə drâ ama ye nə rə ndə kə yisə̂ nə orâ gashu kə azü nə ə̂në əpʉ ama səkɔ sə mbrə əndje kɔ ə pa ama sə̂ ə̂në əne zâ gâ ye kɔ, əne sə sə kə do tshelə ama əne bale ne. 18 Rəkɔ, lə əpʉ aərə sə̂ bishi* ə̂në ə daka pə kpə mandânə gbrä, ə̂në Ndjapä nə lï lï ndə kə pa tshə pa əterə lə nə bale ne kɔ, a sɔ̂tə̂ ə̈bə̈ âgbɔ̂ ərə ndə kə pa ə gbɔgbɔ lɔsu əzə̂, əzə̂ ə̂në ərə kə bata əzə̂ nə tshî kə də̂ kə pa a za lɔsu əzə̂ gâ pâ ərə ə̂në Ndjapä nə pâ ndə nə kə əzə̂ gâ ye kɔ. 19 Əpʉ ərə sə̂ ə̂në a za lɔsu əzə̂ gâ pâ nə kɔ, ə sə mata əgerə əndu kowɔ ə̂në lɔsu əzə̂ ə ka kpirə̂ mbrə nə mata ə̂në bato ə ka kpirə̂ la ə̂ngû mbrə nə kɔ, ə̂në ə sə nge nge nge â a za lɔsu əzə̂ gâ tə̂ nə kɔ; ə li sɔ lə əgerə ləba tshelə Anda Ndjapä nə 20 ndjɔ mâ tə̂ ətshe ə̂në Jezu lî tə̂ nə, ətshinə mbrə əzə̂ kɔ, ə̂në tshə dô tə̂ ye tə âgbɔ̂ awotokrɔ piii, a pa də Meləkisedekə kɔ.