1 Kə yi tə̂ e tə alaye azü däka pə lə takpa tə̂ e. 2 Ə̂sə̂ kə bata ayirə rö e rö ne: alabə̈ azü ə̂në əndje sə kə ko ayirə nə gâ ndə əndje kɔ, əndje kô atrawaya nə̂ Ndjapä gâ lə aanda nə̂ əndje ə wûsə̂ nə wû ne. 3 E lï tshelə e tə̂ alayïkânga, a pa də e də aəndje kə sə̂ lə kânga nə kɔ, ndje tə̂ azü ə̂në angâ əndje ə mbrə əndje tə akanga kɔ, mbrə ə̂në e-e ndje, e sə lə akwa əzü â sə kɔ.

4 Azü nɔ̂ lʉ̈ kə ko tə̂ ətshe, akoshe də yashe prä ə̈bə̈ yashe wala koshe prä kpî tə̂ əwɔ nə wala tə̂ äkɔ̈ nə ne. Ndjapä ə wa ngbanga gâ lə kumu azü ə̂në əndje za tə̂ əndje gâ tə̂ ə̂trû də kə pra ayashe də akoshe kpî tə̂ alawɔ əndje də aläkɔ̈ əndje kɔ je.

5 Kə mbrə tə̂ e sə̈ sə̈ tə̂ äwä əgo ngendja ne. E zä tshelə e kʉ gâ tə̂ ərə ə̂në e sə də nə kɔ, mbrə ə̂në Ndjapä də ə̂tə̂ ye pâ: «Mə sə sə kə katə̂ zə bale ne, mə sə sə kə tshi əbə tʉ bale ne.»* 6 Âdâ nə ə̂në əzə̂ lï ndə kə pa a pa:

«Âgbɔ̂ Əyïngerə sə tə awotɨ əmə gâ lafɔ,

awa sə sə kə mbrə əmə ne.

Əzü sə kə mbrə yekɔ tə̂ əmə?»*

7 E lï tshelə e tə̂ azü ə̂në əndje sə kə yisə̂ äwä kə e, ə̂në əndje pâ Əpʉ Ndjapä kə e gâ ye kɔ. E wü äwä ə̂në əndje mbrə̂ tə̂ əndje ʉrrr ndjɔ gâ tə̂ ama nə kɔ, e mbrə̈ ərə tə̂ äwä əpʉ lɔsu mata əndje. 8 Jezu Kristə daka pə kʉ tə ətshə wɔlumə, kpəsəye, ndje də ə̂ngû də ə̂ngû piii. 9 E kätə̂ äwä kä kə adongo aərə ə̂në əndje yisə̂ nə kpî kɔ ə djingli äwä tə̂ e ne. Ə sə tə ə̂rɔ̂nə ndə kə pa ə̂rɔ̂tə̂ Ndjapä kanika ə gbɔgbɔ lɔsu e, ə də̂ arəgo də̂ ne, ə̂në ə mbrə̂ ə̈bə̈ ərə mbrə̂ bale kə azü nə ə̂në əndje sə kə bata aəpʉ arəgo nə kɔ ne kɔ.

10 A sə də ə̈bə̈ gblaka* ə̂në aawotokrɔ tə Ajuwufu ə̂në əndje sə kə vrɔ Ndjapä lə anda kɔ lï lï ndə kə pa əndje ko arəgo pâ nə ə zɨ ne. 11 Mbrə ə̂në aəko aagia nə ə̂në âgbɔ̂ awotokrɔ nə̂ Ajuwufu nə kô ə̈ndjï əndje nə â nâ də nə gâ lə anda tə̂ ətshe ə̂në ə sə kpî ə rô bale nə sə̂ kɔ, mbrə nyaka kɔ, əndje kô ə shô ngrʉ̂ gashu tə̂ tshelə bâda nə.* 12 Âdâ ərə ə̂në Jezu nə ndje tshû gashu tə̂ tshelə gala Jeruzalamə* nə, ndə kə pa tshə djɔ azü lə nyaka tə̂ äwä ə̈ndjï ye də ə̂tə̂ ye nə kɔ kə sə̂. 13 Rəkɔ, a wütu gashu tə̂ tshelə bâda nə ndə kə pa a na gâ tə̂ ye ə ru ə ru lə kʉtə̂ marä tə̂ aə̂gû ə̂në əndje gû ətshə də nə kɔ. 14 Mbrə ə̂në a sə sə də gala kotəye ə̂në ə daka pə je kɔ ne, bale a sə kə pra äwä ənə̂ sə̂ ə̂në ə wutu je kɔ. 15 Rəkɔ, tə̂ äwä Jezu nə, a mbë Ndjapä nə alɔnɔ̂ a pa də əkrɔ də̂ a to kɔ, ə̂në ə sə tə aəpʉ tshelə ama əzə̂ ə̂në ə sə kə pa ndə əɨrɨ ye gashu lə ala azü nɔ̂ kɔ. 16 Bale, ə̂sə̂ kə mbrə ə̂rɔ̂ ərə kə azü də kə yi kəna e kə angâ e lə takpa tə̂ e rö e rö ne, mbrə ə̂në marä tə̂ kə to aəkrɔ rə də̂ ə fʉ tə̂ Ndjapä kɔ.

17 E djï əpʉ ama azü ə̂në əndje sə kə yisə̂ äwä kə e kɔ ə mbrə̈ tə̂ e teashe ətshi əndje. Ala əndje sə kə gbɔ ə gbɔ tə̂ e, ə̂në əndje wusə̂ nə ə pa alane pa əpʉ e gâ ətshi Ndjapä je kɔ. Əndje mbrə̈ kosəra nə də ə̂rû, ə də̂ də kə kɨ lə ədro tə̂ əndje də̂ ne, mbrə ə̂në ə sə sə kə sə tə ə̂rɔ̂ ərə mbrə e ne.

18 E yü Ndjapä mbrə ä. Ä wusə̂ nə mâ tə̂ lɔsu ä ə pa ə̈bə̈ əpʉ sə sə lə kumu ä ne, â ä yində kə pa ä mbrə tə̂ ä də äwänə lə aərə nɔ̂. 19 Mə gbɔgbɔ e ndə kə pa e yu Ndjapä nə ndə kə pa mə gu katshä gâ lə takpa tə̂ e.

20 Ndjapä ə̂në tshə za blatshe kə azü, ə̂në tshə shê Âgbɔ̂ Əyïngerə nə̂ əzə̂ də Jezu, lə takpa tə̂ akuzu gâ ye kɔ, tə âgbɔ̂ awobata azü tə̂ äwä ə̈ndjï mbʉkʉ ə̂në ə sə piii kɔ, 21 tshə mbrə̈ e tə azü lə kə mbrə ə̂rɔ̂ ərə nɔ̂ ndə kə pa e mbrə ərə ə̂në tshelə ye yində nə kɔ. Tshə mbrə̈ ərə ə̂në ə fʉ lə ala ye kɔ lə əzə̂ tə̂ äwä Jezu Kristə. Azü mbë ətshə də ə̂ngû də ə̂ngû piii! Asərəmə!

22 Alaye əmə, mə pa e ru ə ru ə dji əpʉ kə gbɔgbɔ e sə̂ ə̂në mə pa kɔ. Mbrə ə̂në mə tâ əpʉ nə kʉ ndo â tâ kɔ. 23 E wüsə̂ nə ə pa əndje kâtə̂ aye əzə̂ də Timɔte gâ ye. Kədə tshə yi kumu ye katshä, ä də ətshə ə na ə wu e je.

24 E blä azü nɔ̂ ə̂në əndje sə kə yisə̂ äwä kə e kɔ də azü nə̂ Ndjapä nɔ̂ kə əmə. Azü nə̂ Kristə lə ashɔ əgɔ Itali bla e.

25 Ə̂rɔ̂tə̂ Ndjapä sə̈ də e nɔ̂!