1 Meləkisedekə nə sə̂ tə əyïngerə gala Salamə, tə awotokrɔ nə̂ Ndjapä ə̂në tshə sə mâ ngâ lafɔ kɔ. Ətshə kə sə̂ â nâ â tê Abraamo â tô ngwarə gâ pâ ye, alɔ ə̂në Abraamo nə tô ndə kowɔ ə̂në tshə tɔ̂ də alabə̈ alayïngerə aəgɔ â wâ əndje gâ ye â sə̂ kə gu nə kɔ. 2 Ətshə də̂ Abraamo nə kô adimə aərə ə̂në tshə sɔ̂tə̂ nə kɔ kə ətshə kɔ. Mbrə ə̂në Meləkisedekə nə sə̂, angbʉlînə tə əyïngerə kə mbrə ərə də äwänə, Lïndə̂ tshelə âdâ əɨrɨ ye nə, gâ mandânə tə əyïngerə gala Salamə*, âdâ nə kə də̂ əyïngerə blatshe. 3 Abä nə wala əyï nə wala alätä nə sə sə tə̂ nə ne; əlo kə zu ətshə wala əlo kuzu ye sə sə tə̂ nə ne. Bale, tshə sə mata Ɨrɨ Ndjapä, ə sə tə awotokrɔ də ə̂ngû də ə̂ngû piii.

4 E wü äwä ə̂në tshə sə tə âgbɔ̂ əzü tə̂ nə kɔ, ətshə ə̂në ätä əzə̂ də Abraamo nə kô adimə aərə ə̂në tshə sɔ̂tə̂ nə lə kowɔ kɔ kə ətshə kɔ. 5 Kandää, âgbɔ̂ əpʉ nə̂ Mayïzə zâ äwä kə aləvu Levi ə̂në əndje sə̂ kə mbrə kosəra kə to əkrɔ nə kɔ ndə kə pa əndje ko adimə lə kəna azü əgɔ Isərayalə nɔ̂*, ə̂në əndje sə ndje tə alaye əndje nə kɔ, â ə̂në əndje sə ndje tə angwa Abraamo nə kɔ. 6 Meləkisedekə nə ə̂në tshə sə̂ sə̂ lə marä əndje nə ne kɔ, tshə kô adimə aərə lə kəna Abraamo nə â tô ngwarə gâ pâ ye, ətshə nə ə̂në Ndjapä zâ ama də əpʉ aərə kə ətshə gâ ye kɔ. 7 Kandää, əngʉ əzü də̂ âgbɔ̂ əzü ə to ngwarə gâ pâ ye, â ashera sə sə je lə nə ne. 8 Aangwa Levi nə ə̂në əndje kô adimə nə lə kəna alaye əndje nə kɔ, əndje sə̂ tə azü ə̂në əndje sə kə tshu ə tshu. Bale, ənə̂ Meləkisedekə nə, ə̂në Fraka nə̂ Ndjapä nə pâ ndə ye kɔ, tshə sə tə sorô. 9 Gâ pâ nə, Levi nə ə̂në tshə daka pə ndə kə ko adimə lə kəna azü əgɔ Isərayalə nə, tə̂ äwä aləvu nə kɔ, tshə kô adimə aərə nə ə̂në tshə sɔ̂tə̂ nə kɔ kə Meləkisedekə nə tə̂ äwä Abraamo nə, a lï ndə kə pa rə. 10 Mbrə ə̂në Levi nə sə̂ pə lə ätä nə də Abraamo, alɔ ə̂në Meləkisedekə nə nâ ə tê Abraamo nə kɔ.

11 Âgbɔ̂ əpʉ ə̂në Mayïzə zâ kə azü əgɔ Isərayalə nə kɔ kâ gâ pâ əpʉ kosəra kə to əkrɔ nə̂ aləvu Levi nə. Kədə äwä kə tɔ gâ tə̂ ərə ə̂në ə lï nɔ̂ gâ ye kɔ kə sə̂ kəmə je, tə̂ äwä kosəra kə to əkrɔ səkɔ, âdâ kə za ə̈bə̈ ata awotokrɔ a pa də Meləkisedekə nə, â ə də̂ mata Aarɔ də̂ ne kɔ kə də̂ yekɔ? 12 Mbrə ə̂në əndje zâ ə̈bə̈ ata äwä kə to əkrɔ gâ mandâ angbrɔ ənə̂ sə̂ nə gâ ye kɔ, ə lï ndə kə pa əndje za ndje ə̈bə̈ ata âgbɔ̂ əpʉ kpî. 13 Ətshə nə ə̂në Fraka nə̂ Ndjapä nə pâ əpʉ gâ pâ ye kɔ, tshə sə̂ lə ə̈bə̈ marä kpî, ə̂në ə̈bə̈ əzü lə nə mbə̂ mbrə̂ kosəra nə̂ awotokrɔ nə pâ gblaka alɔ bale ne kɔ. 14 Mbrə ə̂në azü nɔ̂ wusə̂ nə ə pa Âgbɔ̂ Əyïngerə nə̂ əzə̂ tô lə marä Juda â wûtu kɔ, â Mayïzə pâ pâ ə̈bə̈ əpʉ bale gâ pâ əpʉ kosəra nə̂ awotokrɔ lə marä sə̂ ne.

15 Ə̈bə̈ ərə ə̂në azü nɔ̂ wusə̂ nə kwatəndje rô pâ nə kɔ kə də̂ əpʉ səye: ə̈bə̈ ata awotokrɔ, ə̂në tshə sə mata Meləkisedekə kɔ, wûtu gâ ye. 16 Tshə sə sə tə awotokrɔ nə tə̂ äwä ə̈bə̈ âgbɔ̂ əpʉ gâ pâ aləvu Levi ne; bale, tshə sə tə awotokrɔ nə tə̂ äwä ə̈bə̈ awlra sorô ə̂në ə ro ro tə̂ ərə ne kɔ. 17 Mbrə ə̂në Fraka nə̂ Ndjapä pâ əpʉ gâ pâ əpʉ nə̂ ye ə pa:

«Bə sə tə awotokrɔ piii,

a pa də Meləkisedekə.»*

18 Rəkɔ, tshelə angbʉlî âgbɔ̂ əpʉ nə gbâ gâ ye, mbrə ə̂në ə sə sə də awlra ne â tɔ tɔ gâ tə̂ ə̈bə̈ ərə bale ne. 19 Mbrə ə̂në âgbɔ̂ əpʉ nə̂ Mayïzə nə mbə̂ mbrə̂ ə̈bə̈ əzü ʉrrr ndjɔ tə̂ əzü ə̂në tshə lï nɔ̂ gâ ye kɔ ne, â ə̈bə̈ ərə, ə̂në a za lɔsu əzə̂ gâ pâ nə, ə̂në ə rô ənə̂ ətshinə gâ ye kɔ, wûtu gâ ye, ə̂në tə̂ äwä nə a sə kə na trö gâ tə̂ Ndjapä kɔ. 20 Â ərə səkɔ wû wûtu ambanə tə̂ kə dra ama Ndjapä nə ne. Kandää, tə̂ alɔ kə za kosəra nə̂ ə̂dû aawotokrɔ nə, Ndjapä nə drâ ama ye drâ ne. 21 Bale, tə̂ alɔ ənə̂ Jezu nə, Ndjapä nə drâ ama ye ə pâ:

«Əyïlingû drâ ama ye gâ ye,

tshə sə sə kə do tshelə əpʉ ama ye ne:

bə sə tə awotokrɔ piii.»*

22 Jezu nə sə, tə̂ äwä əpʉ ama səkɔ, ndje tə əzü ə̂në mbʉkʉ ə̂në ə rô ənə̂ ətshinə kɔ ka gâ pâ ye.

23 Gâ pâ nə, aawotokrɔ ngbâ ngbatshe, mbrə ə̂në kuzu gbɔ̂ tə̂ äwä tə̂ əndje ndə kə pa əndje daka pə gbrä tə̂ kosəra nə. 24 Bale, ənə̂ Jezu nə, mbrə ə̂në tshə sə də ə̂ngû də ə̂ngû piii kɔ, tshə sə də kosəra nə̂ awotokrɔ nə ə̂në ə̈bə̈ əzü kpî sə sə kə za mandâ ye bale ne. 25 Âdârə ə̂në tshə lï ndə kə pa tshə she azü ə̂në əndje na trö tə̂ Ndjapä tə̂ äwä ye kɔ lə kuzu gbrä, mbrə ə̂në tshə sə tə sorô piii ndə kə pa tshə yu Ndjapä nə mbrə əndje.

26 Mbrə ə̂në âgbɔ̂ awotokrɔ nə ə̂në tshə lï də əzə̂ kɔ kə sə̂. Tshə sə kpî mbrə Ndjapä, ə̈bə̈ əpʉ bale sə sə lə kumu ye ne, nyaka sə sə lə kumu ye ne, tshelə takpa tə̂ ye də alayïnyaka sɔ̂ gâ ye, Ndjapä zâ ətshə mâ ngâ lafɔ ə rô tshelafɔ. 27 Tshə sə sə də əgo ndə kə pa tshə to ndje əkrɔ alɔnɔ̂, mata ə̂dû aâgbɔ̂ aawotokrɔ nə, mbrə anyaka nə̂ ye nə ətshinə gâ ye kane, ka gâ mandânə, tshə to əkrɔ nə mbrə anyaka nə̂ ə̂dû azü nə ne. Mbrə ə̂në tshə kâ tə̂ ye də ə̂tə̂ ye tə ərə əkrɔ äwä bale gbrä gâ ye. 28 Mbrə ə̂në aâgbɔ̂ aawotokrɔ nə ə̂në âgbɔ̂ əpʉ nə̂ Mayïzə nə ə ko əndje kɔ, əndje sə̂ tə azü ə̂në əndje mɔ ə mɔ lə alabə̈ aərə. Bale, ətshə nə ə̂në Ndjapä nə zâ ətshə mandâ âgbɔ̂ əpʉ nə tə âgbɔ̂ awotokrɔ nə, tə̂ äwä kə dra ama ye nə kɔ, tshə sə tə Ɨrɨ nə â tshə lï nɔ̂ də ə̂ngû də ə̂ngû piii.