1 Âdârə ə̂në əzə̂ lï ndə kə pa a tɔ popo aərə ə̂në a djî əpʉ nə gâ ye kɔ kwatəndje ro pâ nə, kanika a ro ro ngrʉ̂ tə̂ nə ne. 2 Mbrə ə̂në əpʉ ə̂në Ndjapä pâ leme-e lə ama atrawaya nə̂ Ndjapä kɔ, ə sə̂ tə djatra ərə gâ ye. Â azü nɔ̂ ə̂në əndje mbrə̂ ərə mbrə̂ Lïndə̂ âgbɔ̂ əpʉ səkɔ ne, wala əndje wə̂ra tə̂ əndje tə̂ kə dji nə, əndje wâ ngbanga gâ lə kumu əndje gâ ye ə lï də ərə ə̂në əndje mbrə̂ gâ ye kɔ. 3 Rəkɔ, a sə kə kpe ngbanga nə atâ, kədə a wu əpʉ kə she azü lə kuzu, ə̂në ə sə tə âgbɔ̂ ərə kɔ, tə amba ərə lə ala əzə̂? Mbrə ə̂në Âgbɔ̂ Əyïngerə kə mʉ̂ əpʉ nə angbʉlînə â azü ə̂në əndje djî əpʉ nə kɔ, əndje pâ kə əzə̂ ə pa əpʉ nə sə tə djatra əpʉ. 4 Â Ndjapä nə yîsə̂ nə gashu ə pa əpʉ nə ə̂në əndje pâ kɔ sə tə djatra əpʉ â mbrə̂ aərə kə ro pâ kumu azü də aərə kə za awa gâ lə azü də adongo aâgbɔ̂ aərə ə̈lü, tə̂ äwä aâkrâ ə̂në Âgbɔ̂ Yîrə̂ krû tshelə nə tə̂ əndje bale bale ə lï də ərə ə̂në tshelə ye yində nə kɔ.

5 Mbrə ə̂në tshepashɔ ə̂në ə sə kə na gu nə, ə̂në ä pa əpʉ nə kɔ, ə də̂ atrawaya nə̂ Ndjapä nə də̂ Ndjapä nə zâ gâ tshekudu əndje kɔ ne. 6 Kandää, ə̈bə̈ əzü pâ ə̈bə̈ əpʉ tə̂ ə̈bə̈ ətshe lə Fraka nə̂ Ndjapä ə pa:

«Əzü sə tə yea,

ndə kə pa bə li tshelə zə gâ tə̂ ye?

Əzü ə̂në əndje zû ətshə ə zû kɔ sə tə yea,

ndə kə pa bə ga ndə ye?

7 Bə mbrə̂ ətshə teashe gâ tshekudu atrawaya nə̂ Ndjapä lə ə̈bə̈ alɔ teashe,

â bə zâ ndje kə mbe ətshe də kə lʉ ətshe kə ətshə.

8 Bə kô aərə nɔ̂ gâ tshekudu ə̈nü ye gâ ye.»*

Ngâ, ə̂në Ndjapä nə kô aərə nə nɔ̂ gâ tshekudu ye gâ ye kɔ, tshə zâ ə̈bə̈ ərə zâ tʉ gashe ne ə̂në ə sə sə tshekudu ye ne kɔ. Bale, a te te pa ə wu kpəsəye ə pa aərə nə nɔ̂ sə gâ tshekudu ye nə ne.

9 Bale, ərə ə̂në ä wu kɔ kə səye: mandânə ə̂në Ndjapä nə mbrə̂ ətshə teashe gâ tshekudu atrawaya nə̂ Ndjapä nə lə ə̈bə̈ alɔ teashe kɔ, Ndjapä nə zâ ə̂yî də kə lʉ ətshe gâ pâ Jezu kpəsəye, mbrə kuzu ə̂në tshə tshû kɔ. Rəkɔ, tə̂ äwä ə̂rɔ̂tə̂ Ndjapä nə, Jezu nə tshû kuzu nə mbrə azü nɔ̂. 10 Mbrə ə̂në Ndjapä nə ə̂në tshə mbrə̂ aərə nɔ̂ gâ ye â aərə nə nɔ̂ sə mbrə ətshə kɔ, yində nə ə pa əne ko aləvu ngbatshe ə li də əndje gâ lə ə̂yî nə̂ əne. Tshə wu ənə̂ ye ə lï ndə kə pa Jezu nə sə tə ə̂rɔ̂ nə nɔ̂ tə̂ äwä aəyo nə ə̂në tshə wû kɔ, ndə kə pa tshə krɔ äwä kə she lə kuzu kə azü nə.

11 Jezu nə ə̂në tshə kô azü kpî mbrə Ndjapä nə kɔ gâ ndə azü nə ə̂në əndje sə kpî kɔ, əndje nɔ̂ to lə Abä bale. Âdârə ə̂në gana ngɔ ətshə ngɔ ndə kə pa tshə e əndje tə alaye nə ne 12 alɔ ə̂në tshə pâ əpʉ ə pa:

«Mə sə kə mʉ əɨrɨ zə kə alaye əmə,

mə sə kə tɔlɔ əbə lə aangbɔ.»*

13 Tshə pâ kwatə̂ye ə pa:

«Mə sə kə za lɔsu əmə nɔ̂ kə Ndjapä.»

 kwatəndje, tshə pâ:

«Əmə də aneshe ə̂në bə kô əndje kə əmə kɔ kə səye.»*

14 Â rəkɔ, ə̂në aneshe nə sə lə ə̈ndjï də dɔ̂ngɔ̂ nə kʉ bale kɔ, ətshə də ə̂tə̂ ye, tshə sə mata əndje tə əzü, kanika, tə̂ äwä kuzu ye, tshə liwu awlra nə̂ djablo ə̂në tshə sə̂ də nə leme-e gâ pâ kuzu gâ ye kɔ. 15 Tshə djɔ̂ ndje azü nɔ̂ ə̂në, leme-e, əndje mbrə̂ awa kuzu â sə̂ tə akanga lə sorô tə̂ əndje nɔ̂ kɔ gâ ye. 16 Mbrə ə̂në, ngâ, ə də̂ atrawaya nə̂ Ndjapä də̂ tshə nâ ndə kə tɨ əndje gâ lafɔ kɔ ne, bale tshə nâ ndə kə pa tshə tɨ aləvu Abraamo gâ lafɔ. 17 Âdârə ə̂në Jezu lï ndə kə pa tshə do tə̂ ye mata alaye nə nə, lə aərə nɔ̂, kanika ə do tə̂ ye tə âgbɔ̂ awotokrɔ ə̂në tshə sə kə wu əyo azü, ə̂në ə sə kə mbrə kosəra nə̂ Ndjapä nə də äwänə kɔ, ndə kə pa tshə ka tə̂ ye də sorô ye nɔ̂ ka ə gba tshelə anyaka nə̂ azü nə̂ ye nə. 18 Ngâ, tshə lï ndə kə pa tshə tɨ azü ə̂në aərə sə kə tra əndje kɔ gâ lafɔ, mbrə ə̂në, ətshə də ə̂tə̂ ye, ərə trâ ətshə gâ ye, lə aərə ə̂në tshə wû əyo lə nə gâ ye kɔ.