1 Angbʉlî mbʉkʉ nə sə ndje də aâgbɔ̂ aəpʉ nə̂ ye gâ pâ əpʉ kə vrɔ Ndjapä nə ə sə ndje də anda kə vrɔ Ndjapä nə lə nə pâ ashɔ. 2 Mbrə ə̂në əndje zâ ə̈bə̈ angbʉlî tshelə gbafa nə tɔ gâ lafɔ, ə̂në əndje ê ə pa «ətshe ə̂në ə sə kpî» kɔ, ə̂në ə̈nü alamba də ndabâ ə̂në amapa sə pâ nə kɔ sə̂ lə nə kɔ. 3 Djoko mandâ bishi ləba tshelə gbafa nə, kə də̂ bishi tshelə gbafa nə ə̂në əndje ê ə pa «ətshe ə̂në ə sə kpî ə rô angbʉlînə gâ ye» kɔ. 4 Ə̈bə̈ gblaka kə sho yombo pâ nə ə̂në əndje mbrə̂ tshepa nə də lɔrə kɔ gâ ndə sandugu mbʉkʉ nə ə̂në tshepa nə nɔ̂ sə kʉ də lɔrə kɔ sə̂ lə bishi tshelə gbafa səkɔ, â ə̈bə̈ ləsû lɔrə ə̂në rəgo ə̂në əndje ê ə pa manə* kɔ sə̂ lə nə kɔ gâ ndə tshɔngblɔ nə̂ Aarɔ ə̂në ndɔkɔ nə tɔ̂ tə̂ nə kɔ gâ ndə aəkpʉ ə̂në əndje tâ aəpʉ mbʉkʉ nə gâ pâ nə kɔ sə̂ lə sandugu nə. 5 Djoko pâ sandugu nə, asheruba kə yisə̂ ə̂yî Ndjapä kâ gâ lafɔ â tshekojerɔ əndje sə̂ gâ pâ ətshe ə̂në Ndjapä ə gba tshelə anyaka tə̂ nə kɔ. Bale, äwä kə pa ndə əpʉ nə bale bale sə sə je ne.Sandugu mbʉkʉ nə̂ Ndjapä

6 Ə̂në əndje gâmba aərə sə̂ nɔ̂ gâ ye kɔ, aawotokrɔ nə sə̂ kə li alɔnɔ̂ gâ lə angbʉlî tshelə gbafa nə ndə kə pa əndje mbrə kosəra Ndjapä nə. 7 Bale, âgbɔ̂ awotokrɔ nə tshî kə li gâ lə bishi tshelə gbafa nə, äwä bale lə ə̂ngû bale. Tshə li mâ je də ə̈ndjï agia nə mbrə ətshə də ə̂tə̂ ye, ndje mbrə anyaka nə̂ azü nə nɔ̂. 8 Âgbɔ̂ Yîrə̂ yisə̂ nə ngâ kôto ə pa äwä ətshe nə ə̂në ə sə̂ kpî ə rô angbʉlînə gâ ye kɔ tê tê ə pa ə krɔ ne, kədə angbʉlî tshelə gbafa nə kə daka pə je. 9 Ə sə tə ə̈bə̈ əpʉ kəwû mbrə tshe kpəsəye: ə yisə̂ nə ə pa aərə də aagia ə̂në əzü tô də əkrɔ kə Ndjapä nə kɔ lï lï ndə kə pa ə mbrə lɔsu əzü nə ə̂në tshə vrɔ̂ Ndjapä nə kɔ tə lɔsu ə̂në ə lï nɔ̂ ne. 10 Ə sə kʉ tə aâgbɔ̂ aəpʉ nə̂ azü gâ pâ əpʉ arəgo də kə ndju ərə gâ ndə dongo kə yɔ tshekotə̂ azü də aərə, ə̂në ə sə də awlra ʉrrr ndjɔ gâ tə̂ alɔ ə̂në Ndjapä dô tshelə aərə nɔ̂ gâ ye kɔ.

11 Bale, Kristə nə wûtu mata âgbɔ̂ awotokrɔ ndə kə pa tshə ko aə̂rɔ̂ aərə ə̂në ə sə̂ je gâ ye kɔ kə əzə̂. Tshə rô sɔ lə gbafa nə ə̂në ə sə tə âgbɔ̂ nə kɔ â ə lî nɔ̂ gâ ye ə rô ənə̂ azü kɔ, ə̂në ə də̂ kəna azü də̂ kə mbrə̂ kɔ ne, wala ə sə sə tə ənə̂ tshepashɔ səye ə̂në Ndjapä mbrə̂ kɔ ne. 12 Kristə nə lî gâ tə̂ ətshe nə ə̂në ə sə kpî ə rô ə̈bə̈ nə gâ ye kɔ äwä bale gbrä, â lî lî də ə̈ndjï aäkɔ̈ ayabru wala də ə̈ndjï amɔdɔ aäkɔ̈ apagra ne, bale tshə lî də ə̈ndjï ye də ə̂tə̂ ye. Â rə də̂ tshə djɔ̂ əzə̂ gbrä gâ ye kɔ. 13 Əndji aäkɔ̈ ayabru nə də ə̈ndjï aäkɔ̈ apagra nə wala mvrowo əyï pagra* ə̂në əndje wulu gâ pâ azü ə̂në əndje mbrə̂ alabə̈ aəmbrʉ aərə lə ala Ndjapä kɔ yutu azü nə mvo pâ akwa əndje ndə kə pa əndje vrɔ Ndjapä nə kwatəndje. 14 Kədə ə sə tə djatra əpʉ rə, ə̈ndjï Kristə nə lï ndə kə pa ə mbrə ərə kwatəndje ə ro ə̈ndjï aagia nə. Mbrə ə̂në tshə kâ tə̂ ye də ə̂tə̂ ye kə Ndjapä, mata ə̈bə̈ ərə əkrɔ ə̂në əmbrʉ ərə sə sə tə̂ nə ne kɔ, tə̂ äwä Yîrə̂ ə̂në ə sə piii kɔ. Rəkɔ, tshə sə kə yutu aəmbrʉ aərə ə̂në ə na də əzü gâ tə̂ kuzu kɔ tə̂ lɔsu əzə̂, ndə kə pa a vrɔ Ndjapä nə ə̂në tshə sə tə sorô kɔ.

15 Âdârə ə̂në Kristə nə sə tə əyïkɔkɔ̂ lə ə̈bə̈ tafa mbʉkʉ kɔ kə sə̂: tshə tshû gâ ye ndə kə pa tshə djɔ azü lə aəmbrʉ aərə ə̂në əndje mbrə̂ gâ ye lə angbʉlî mbʉkʉ nə kɔ, kanika azü ə̂në Ndjapä nə ê əndje gâ ye kɔ, əndje lï ndə kə pa əndje sɔtə̂ aə̂rɔ̂ aərə ə̂në ə sə piii kɔ ə̂në tshə zâ ama də əpʉ nə kə azü nə̂ ye gâ ye kɔ.

16 Kədə fraka əpʉ tshelə ə̈bə̈ əzü kə sə je, ə lï ndə kə pa əndje yisə̂ nə gashu ə pa əzü nə tshû gâ ye kane. 17 Mbrə ə̂në fraka əpʉ tshelə ə̈bə̈ əzü sə də awlra kədə əzü nə kə tshû gâ ye kane. Kədə əzü nə kə daka pə tə sorô, fraka nə sə sə kə sə tə ə̈bə̈ ərə bale ne. 18 Âdârə ə̂në angbʉlî mbʉkʉ nə vɔ̂tə̂ kə mbrə ərə tə̂ äwä ə̈ndjï ə̂në ə tû gâ ye kɔ. 19 Mbrə ə̂në Mayïzə dɨ̂ əpʉ tshelə âgbɔ̂ əpʉ nə bale bale kə azü əgɔ Isərayalə nɔ̂ â mandânə tshə zâ ə̈ndjï amɔdɔ aäkɔ̈ apagra də ənə̂ aäkɔ̈ ayabru də ə̂ngû â zâ ndje ə̈bə̈ yana ayɔ izɔpə də ə̈bə̈ ə̂drɔ̂ ləba â wûlu gâ pâ fraka âgbɔ̂ əpʉ nə, ndje gâ pâ azü nə nɔ̂, 20 â pâ: «Ə̈ndjï mbʉkʉ ə̂në Ndjapä zâ ama də nə kə e kɔ kə səye.»* 21 Äwä bale ndje, tshə wûlu ə̈ndjï nə gâ tə̂ gbafa nə gâ ndə aərə kosəra Ndjapä nə nɔ̂. 22 Lïndə ndəma âgbɔ̂ əpʉ nə, aga aərə nɔ̂ sə̂ mvo tə̂ äwä ə̈ndjï, â ə̈ndjï â tu tu ne, tshelə nyaka sə sə kə gba nə ne.

23 Rəkɔ, ə lï ndə kə pa əndje yutu aərə ə̂në ə sə tə yîrə̂ aərə tshelafɔ nə kɔ rə â aərə tshelafɔ nə də ə̂tə̂ əndje nə, ə lï ndə əndje yutu tə̂ äwä kə to aəkrɔ ə̂në ə rô aənə̂ səkɔ gâ ye. 24 Mbrə ə̂në ə də̂ gâ lə ə̈bə̈ tshelə anda ə̂në ə sə kpî kɔ, ə̂në kəna azü kə mbrə̂ kɔ, ə̂në ə sə kʉ tə foto djatra anda nə kɔ də̂ Kristə nə lî gâ lə nə kɔ ne; bale tshə lî ndjɔ mâ lafɔ, kanika ə ka kpəsəye gâ ətshi Ndjapä nə mbrə əzə̂. 25 Ə̂ngû bale bale, âgbɔ̂ awotokrɔ nə̂ Ajuwufu nə sə kə li gâ lə anda tə̂ ətshe ə̂në ə sə kpî kɔ də ə̈ndjï ə̂në ə sə sə tə ə̈ndjï ye ne kɔ. Bale, Kristə nə, ənə̂ ye, lî lî ndjɔ mâ lafɔ nə ndə kə pa tshə ka tə̂ ye nə alɔnɔ̂ ne. 26 Də̂ ne, tshə lî kəmə ndə kə wu əyo äwä ngbatshe kerə pə tə̂ alɔ kə mbrə tshepashɔ. Ngâ, kpəsəye, ə̂në ə sə tə ə̂dû alɔ kɔ, Kristə nə mâ tə̂ ye gashu äwä bale gbrä gâ ye â rə də̂ tshə lîwu nyaka gâ ye tə̂ äwä kə ka tə̂ ye tə ərə əkrɔ nə kɔ. 27 Â mata ə̂në əndje za äwä kə azü ndə kə pa əndje tshu kʉ äwä bale kɔ, â mandânə ngbanga sə kə sə je kɔ, 28 äwä bale ndje, Kristə nə kâ tə̂ ye kʉ äwä bale gâ ye ndə kə pa tshə ko anyaka nə̂ ə̂kpû azü lə kumu əndje. Tshə wutu tə̂ bishi nə je, ə də̂ ndə kə pa tshə ko anyaka nə̂ azü də̂ ne, bale ndə kə pa tshə she azü ə̂në əndje sə kə ka mbrə ətshə kɔ lə kuzu.