1 Əpʉ lɔsu nə kə də̂ ərə ə̂në a za lɔsu əzə̂ gâ pâ nə â sɔ̂tə̂ nə gâ ye kɔ, kə də̂ kə yerɔ aərə ə̂në a wu wu ne kɔ tə djatra aərə. 2 Mbrə əpʉ lɔsu alätä azü tshe leme-e də̂ Ndjapä pâ ə̂rɔ̂ əpʉ nə̂ əndje kɔ.

3 Tə̂ äwä əpʉ lɔsu, a wusə̂ nə ə pa Ndjapä sô tsheshu tə̂ äwä əpʉ ama ye, â ərə ə̂në azü ə wu kɔ to lə ərə ə̂në əndje wu ə wu kɔ ne.

4 Tə̂ äwä əpʉ lɔsu də̂ Abalə tô əkrɔ ə̂në ə lʉ̂ ə rô ənə̂ Kayinə gâ ye kɔ kə Ndjapä kɔ. Mbrə əpʉ lɔsu nə, Ndjapä pâ kə ətshə ə pa tshə sə tə ə̂rɔ̂ əzü; Ndjapä nə də ə̂tə̂ ye pâ ə̂rɔ̂ əpʉ aərə nə ə̂në tshə kô kɔ. Mbrə əpʉ lɔsu nə, Abalə nə daka pə kə pa əpʉ, ə̂në tshə tshû kəmə gâ ye kɔ.*

5 Tə̂ äwä əpʉ lɔsu də̂ Ndjapä zâ Enɔkə gu nə gâ ngotə̂ ye â tshə wûsə̂ ərə ə̂në ə də̂ kuzu kɔ wû ne kɔ. Əndje sɔ̂tə̂ ye sɔ̂ kwatəndje ne, mbrə ə̂në Ndjapä zâ ətshə ro nə gâ ye. Fraka nə̂ Ndjapä pâ əpʉ ə pa, angbʉlînə ndə kə pa Ndjapä nə zâ Enɔkə nə ro na ye, Ndjapä nə pâ kə mbrə tə̂ Enɔkə nə fʉ̂ lə ala əne.* 6 Kandää, əzü â za lɔsu ye za kə Ndjapä ne, tshə lï lï bale ndə kə pa tshə fʉ lə ala Ndjapä nə ne, mbrə ə̂në əzü ə̂në tshə na gâ tə̂ Ndjapä, tshə lï ndə kə pa tshə wusə̂ nə mâ tə̂ lɔsu ə pa Ndjapä nə sə je â tshə sə kə ko aə̂rɔ̂ aərə kə azü ə̂në əndje sə kə pra äwä ye kɔ.

7 Tə̂ äwä əpʉ lɔsu də̂ Nɔwe djî əpʉ ə̂në Ndjapä pâ kə ətshə ətshinə gâ ye gâ pâ əpʉ aərə ə̂në ə wutu je kɔ, ə̂në azü te te pa ə wu ne kɔ. Tshə wâ ndə əpʉ səkɔ â mbrə̂ bato ndə kə she azü tshelə anda nə̂ ye lə kuzu tə̂ äwä nə. Rəkɔ, mbrə əpʉ lɔsu ye nə, tshə wâ ngbanga gâ lə kumu azü tshepashɔ nɔ̂, â Ndjapä nə wû ətshə tə ə̂rɔ̂ əzü lə ala ye.

8 Tə̂ äwä əpʉ lɔsu də̂ Abraamo djî əpʉ ama Ndjapä alɔ ə̂në Ndjapä nə ê ətshə kɔ. Tshə âfɔ ə rô tə̂ äwä ə̈bə̈ əgɔ ə̂në Ndjapä ə za kə ətshə tə ənə̂ ye je kɔ. Tshə rô ə wûsə̂ ətshe nə ə̂në tshə na gâ tə̂ nə kɔ wû ne. 9 Tə̂ äwä lɔsu də̂ tshə nâ ə sə̂ tə tshângâ lə ashɔ əgɔ ə̂në Ndjapä zâ ama də əpʉ nə kə ətshə kɔ mata ə̈bə̈ əgɔ tshângâ. Tshə lô gâ lə agbanda, ətshə də Izakə gâ ndə Jakɔbə, ə̂në əndje də aəndje sə̂ tə alayïnga kʉtə̂ əgɔ sə̂ ə̂në Ndjapä nə zâ ama də əpʉ nə gâ ye kɔ. 10 Mbrə ə̂në tshə sə̂ kə ka mbrə kə mbrə əgɔ lə gala ə̂në aə̈nü nə sə nge nge nge kɔ*, gala nə ə̂në Ndjapä kə sə tə awoyisə̂ äwä kə mbrə nə ndje tə awombrə nə kɔ.

11 Tə̂ äwä əpʉ lɔsu ndje də̂ Sara tə yashe märä dô tə̂ ye tə yashe ə̂në tshə lï ndə kə zu əgblə, ə̂në ə̂ngû ye rô gâ ye kɔ, mbrə ə̂në tshə zâ Ndjapä nə ə̂në tshə zâ ama də əpʉ nə gâ ye kɔ tə awombrə tshelə ndəma ye. 12 Âdârə ə̂në lə əzü kʉ kpiabale, əzü ə̂në kuzu zâ kəna ye gâ ye kɔ, əndje zû azü ə̂në əndje ngba mata ambrepe lafɔ ndje mata mindu ə̂në ə sə tə̂ ama ə̂ngû əngbrʉ kɔ, ə̂në əzü lï lï ndə kə dɨ nə ne kɔ.

13 Azü sə̂ nɔ̂ kɔ tshû tə̂ äwä əpʉ lɔsu, əndje tê tê pa ə sɔtə̂ aərə nə ə̂në Ndjapä nə zâ ama də əpʉ nə gâ ye kɔ ne. Bale, əndje wû kʉ pə ngrʉ̂ ə blâ kʉ pə ngrʉ̂; əndje pâ orâ ə pa alane sə̂ tə atshângâ də ayirə gâ pâ ashɔ.* 14 Azü ə̂në əndje sə kə pa əpʉ rə kɔ, əndje yisə̂ nə lə ala azü nɔ̂ ə pa alane sə kə pra äwä ə̈bə̈ əgɔ. 15 Kədə əndje lî kəmə tshelə əndje tə̂ əgɔ nə ə̂në əndje tshî tʉ gâ ye kɔ, əndje sə̂ kə sɔtə̂ äwä kəmə ə do tə̂ əndje gu na ye. 16 Bale, əndje ma əgo ə̈bə̈ əgɔ ə̂në ə rô ənə̂ səkɔ gâ ye, ə̂në ə sə mâ lafɔ kɔ. Âdârə ə̂në gana ngɔ Ndjapä ngɔ ndə kə pa əndje e ətshə tə Ndjapä nə̂ əndje ne. Mbrə ə̂në tshə gâmba ə̈bə̈ gala mbrə əndje gâ ye.

17 Tə̂ äwä əpʉ lɔsu də̂ Abraamo zâ Izakə ə tô əkrɔ də ətshə kɔ, alɔ ə̂në Ndjapä trâ lɔsu ye kɔ. Ɨrɨ nə kpiabale də̂ tshə zâ ətshə ndə kə to əkrɔ nə də ətshə kɔ, ətshə ə̂në tshə yîndə əpʉ ə̂në Ndjapä nə zâ ama də nə kɔ gâ ye 18 â ə̂në Ndjapä nə pâ kə ətshə ə pâ: «Tə̂ äwä Izakə də̂ bə sɔtə̂ angwa zə je.»* 19 Tshə wû ə pa Ndjapä nə sə də awlra ndje ndə kə pa tshə she kuzu. Âdârə ə̂në Ndjapä nə zâ əndʉ Ɨrɨ nə kə ətshə kɔ kə sə̂: ə̈bə̈ əpʉ kəwû sə kôto.

20 Tə̂ äwä əpʉ lɔsu də̂ Izakə tô ngwarə gâ pâ Jakɔbə gâ ndə Esawu mbrə əpʉ tshe dambʉ kɔ.

21 Tə̂ äwä əpʉ lɔsu də̂ Jakɔbə yɔ̂ ə̂ngû tə̂ aləvu Jozafu bale bale tə̂ alɔ ə̂në tshə ndô trö ndə kə tshu nə kɔ; tshə zâ tə̂ ye tɨ ama tshɔngblɔ nə̂ ye ə vrɔ̂ Ndjapä.

22 Tə̂ äwä əpʉ lɔsu də̂ Jozafu sə̂ kə tshu nə â pâ ndə kə wutu azü əgɔ Isərayalə lə əgɔ Ejipətə â zâ ama də əpʉ agbagbi ye kɔ.

23 Tə̂ äwä əpʉ lɔsu də̂ tə̂ alɔ kə zu Mayïzə, alabä nə də əyï nə zâ ətshə wû lə yipʉ vəta: əndje wû ə pa əgblə nə fʉ ə fʉ â əndje mbrə̂ awa ama ə̂në əyïngerə nə zâ kɔ mbrə̂ ne.

24 Tə̂ äwä əpʉ lɔsu də̂ Mayïzə nə wə̂ra tə̂ ye ndə kə pa əndje e ətshə tə ɨrɨ əgblə yashe nə̂ Faraɔ, ə̂në tshə gêrə gâ ye kɔ. 25 Tshə yî ənə̂ ye ndə nə ə pa əne də azü nə̂ Ndjapä nə wu əyo lə kəna azü ə ro ndə kə pa əne sə lə ə̂rû lə nyaka kʉ teashe. 26 Tshə wû lə ala ye ə pa ərə gana ə̂në azü ə mbrə gâ tə̂ əne mata ənə̂ Kristə nə kɔ sə tə âgbɔ̂ rishi ə rô arishi əgɔ Ejipətə nə gâ ye, mbrə ə̂në tshə lîshi ngrʉ̂ gâ tə̂ ə̂rɔ̂ ərə tshemandâ əyo nə.

27 Tə̂ äwä əpʉ lɔsu də̂ tshə âfɔ lə əgɔ Ejipətə nə â rô â mbrə̂ awa əkɔ nə̂ əyïngerə nə mbrə̂ ne kɔ; mbrə ə̂në lɔsu ye sə̂ kpirə̂ mata ə̈bə̈ əzü ə̂në tshə sə kə wu Ndjapä ə̂në əzü wu ətshə wu tə̂ ərə ne kɔ. 28 Tə̂ äwä lɔsu də̂ tshə zâ əpʉ sandaga Pakə gâ tʉ â pâ azü mbrə ə̈ndjï gâ tə̂ akûlû amanda, ndə kə pa trawaya nə̂ Ndjapä ə̂në tshə na ndə kə wo azü əgɔ Ejipətə kɔ nə goro ayiya aneshe nə̂ azü əgɔ Isərayalə nə goro ne.

29 Tə̂ äwä əpʉ lɔsu də̂ azü əgɔ Isərayalə nə gbô Ə̂drô ə̂ngû əngbrʉ a pa də ə̈kü ashɔ â azü əgɔ Ejipətə nə ə̂në əndje trâ ndə kə gbo ə̂ngû nə mata əndje kɔ lî ə̂ngû nɔ̂ kɔ.

30 Tə̂ äwä əpʉ lɔsu əndje də̂ adati dji gala Jerikɔ ngɔ̂ gâ tʉ, alɔ ə̂në əndje nâ dji nə lə əlo mindû amanə bishi kɔ. 31 Tə̂ äwä əpʉ lɔsu də̂ Rahabə, âgbɔ̂ yashe kumbamba, tshû tshû gâ ndə azü ə̂në əndje wə̂ra tə̂ əndje tə̂ Ndjapä kɔ ne, mbrə ə̂në tshə kô aawokpia ətshe tə azü əgɔ Isərayalə mâ ndə ye lə blatshe.*

32 Əpʉ yekɔ də̂ mə pa kwatə̂mə? Äwä kə pa ndə əpʉ a-Jedeyɔ də Barakə də Saməsɔ də Jefəte də Davidə də Samuwalə gâ ndə aawopandəma Ndjapä sə sə je tə̂ əmə ne. 33 Tə̂ äwä əpʉ lɔsu, əndje tɔ̂ kowɔ ə rô pâ alabə̈ aəgɔngerə, əndje wûsə̂ kə mbrə ərə də äwänə, əndje sɔ̂tə̂ alabə̈ aərə ə̂në Ndjapä zâ ama də əpʉ nə gâ ye kɔ, əndje ngbô ama abamara gâ tə̂ nə, 34 əndje rɨ̂ gupu aâgbɔ̂ aəwo, əndje kpê tə̂ kuzu ə̈ngrʉ̈ kamba, əndje sɔ̂tə̂ awlra mandâ arəka, əndje gbɔ̂ ə gbɔ̂ lə akowɔ ə grɔ̂ alabə̈ atrugu aəgɔ tshângâ. 35 Alabə̈ ayashe sɔ̂tə̂ akuzu nə̂ əndje ə̂në əndje shê gâ ye kɔ.

Bale, alabə̈ aata əndje wû djatra əyo kuzu* lə kəna azü ə wə̂ra tə̂ əndje tə̂ kə pa azü she alane lə kuzu, kanika ə sɔtə̂ äwä kə she nə ka ə sə də sorô ə̂në ə rô ənə̂ sə̂ kɔ. 36 Alabə̈ əndje rû tshelə əndje lə kə mo əndje də kə da əndje də djakwa, ndje lə kə kânga əndje də djengle lə anda kânga. 37 Azü gbô əndje də abadja ə wâ tshelə əndje də shî ə wô əndje də ə̈ngrʉ̈ kamba. Əndje nâ kʉ na na ye lafɔ, ə yî akwa andalimi də akwa ayabru gâ tə̂ əndje ə sə̂ sə̂ də ərə bale ne, azü mbrə̂ əndje tə akanga ə gî əyo tə̂ əndje. 38 Tshepashɔ nə lî lî də əndje ne: əndje nâ ana kʉ lafɔ lə angbûndû, lə akaga, lə agrokpɔ də aəgro.

39 Â azü sə̂ nɔ̂ kɔ, Ndjapä pâ ə̂rɔ̂ əpʉ nə̂ əndje mbrə əpʉ lɔsu əndje; bale, əndje sɔ̂ sɔ̂tə̂ ərə nə ə̂në Ndjapä zâ ama də əpʉ nə gâ ye kɔ ne. 40 Ngâ, Ndjapä nə wû ə̈bə̈ ə̂rɔ̂ ərə lə ala ye ə̂në ə rô ə̂dû nə kɔ mbrə əzə̂ gâ ye, âdârə ə̂në azü səkɔ lî lî ndə kə pa əndje wutu gâ tə̂ ərə ə̂në ə lï nɔ̂ gâ ye, ə̂në Ndjapä zâ ama də nə gâ ye kɔ ə tshi əzə̂ tʉ ne.