1 Əmə, Zake, əyïkosəra nə̂ Ndjapä də ənə̂ Âgbɔ̂ Əyïngerə Jezu Kristə, mə za wanda kə azü nə̂ Ndjapä ə̂në əndje sə tə̂ aətshe na na ye pâ ashɔ nɔ̂ kɔ.

2 Alaye əmə, adongo aərə kə tra lɔsu azü ə̂në e lï ndə kə pa e te tə̂ e də nə kɔ, e wü mata ə̈bə̈ ərə kə za âgbɔ̂ ə̂rû gâ tə̂ lɔsu e. 3 E wusə̂ nə ə pa aərə sə̂ ə̂në ə tra lɔsu e kɔ wutu ndə kə pa e wusə̂ kə ru tshelə e. 4 Bale, e wüsə̂ kə ru tshelə e nə ʉrrr ndjɔ gâ tə̂ ama nə ndə kə pa e sə tə azü ə̂në e lï nɔ̂ lə aərə nɔ̂, â ə̈bə̈ ərə bale tshɔ e tshɔ ne.

5 Kədə ə̈bə̈ əzü lə takpa tə̂ e kə wusə̂ ərə wu ne, tshə yü tshuku nə kə Ndjapä, ə̂në tshə ko aərə kə azü nɔ̂ ambanə ə nga nga kə əndje ne kɔ, tshə sə kə za nə kə ətshə. 6 Bale, tshə yü tshuku nə də lɔsu ye, ə sə̈ sə̈ də ashera tə̂ lɔsu ye nə ne; mbrə ə̂në əzü ə̂në tshə sə də ashera tə̂ lɔsu ye, tshə sə mata kplaka ə̂ngû əngbrʉ ə̂në əyi ə mbrə tə̂ nə ə wli gâ lafɔ kɔ. 7 Marä tə̂ əzü rə wusə̂ nə mâ lə kumu ye ə pa tshə sə sə kə sɔtə̂ ə̈bə̈ ərə bale lə kəna Âgbɔ̂ Əyïngerə ne. 8 Tshə sə tə ə̈bə̈ əzü ə̂në lɔsu ye sə bishi bishi, ə̂në kumu ye sə kʉ duuu lə äwä kə mbrə tə̂ ye nɔ̂.

9 Aye ə̂në tshə sə tə əyïəyo, tshə dä əkro ye, mbrə ə̂në Ndjapä zâ ətshə gâ tə̂ əgerə ətshe kɔ, 10 â aye ə̂në tshə sə tə əyïrishi kɔ, tshə dä əkro ye, mbrə ə̂në Ndjapä mbrə ətshə tə əngʉ əzü kɔ. Mbrə ə̂në əyïrishi sə kə ro nə mata ndɔkɔ güsü. 11 Alɔ â afɔ â tɔ tə bandanə, güsü nə orɔ, ndɔkɔ nə te ə tshu. Əyïrishi nə də aərə ə̂në tshə sə kə mbrə nə kɔ sə ndje kə ro nə rə.

12 Ənə̂ ye tə ə̂rɔ̂nə, əzü ə̂në tshə wusə̂ kə kânga lɔsu ye lə ərə kə tra ətshə! Mbrə ə̂në tshə sɔtə̂ sorô nə̂ alɔnɔ̂ ə̂në Âgbɔ̂ Əyïngerə zâ ama də nə kɔ kə azü ə̂në əndje yində ye kɔ je, mandânə ə̂në tshə rô lə ərə kə tra lɔsu ye nə gâ ye kɔ. 13 Kədə ə̈bə̈ ərə kə trâ lɔsu əzü, tshə pä pä: «Ndjapä kə tra lɔsu əmə kɔ» ne. Mbrə ə̂në əmbrʉ ərə lï lï ndə kə pa ə tra Ndjapä ne, â Ndjapä nə də ə̂tə̂ ye tra lɔsu əzü tra ndje ne. 14 Kandää, kʉtə̂ əgo lɔsu əzü bale bale də ə̂tə̂ ye kə sə̂ â tra lɔsu ye â gbətɔ ətshə â frɔ ətshə kɔ. 15 Mandânə, kədə əgo lɔsu nə kə zâ əndu gâ ye ə zu nyaka; â kədə nyaka nə kə nê gâ ye ə na də kuzu.

16 Alaye əmə ə̂në mə yində e tə bandanə kɔ, e frɔ̈ tə̂ e frɔ̈ ne. 17 Ə̂rɔ̂ âkrâ nɔ̂, ə̂rɔ̂ kə to ərə nɔ̂, to mâ lafɔ â jerə kɔ, ə to mâ ndə Abä, tə awombrə aərə ə̂në ə tshe lafɔ kɔ, ətshə ə̂në tshə sə kʉ kpə mandâ tə̂ ye: srɨyʉ ye sə sə tə̂ nə ne kɔ. 18 Mbrə ə̂në tshə yîndə nə gâ ye rə, ə za sorô kə əzə̂ tə̂ äwä əpʉ nə̂ ye ə̂në ə sə tə djatra əpʉ kɔ, ndə kə pa a sə mata aangbʉlî azü lə takpa tə̂ aərə nɔ̂ ə̂në tshə mbrə̂ gâ ye kɔ.

19 Alaye əmə ə̂në mə yində e tə bandanə kɔ, e zä əpʉ səye gâ lə kumu e: əzü bale bale sə̈ trö ndə kə pa tshə dji əpʉ, bale tshə wö wöra ndə kə pa tshə pa əpʉ wala tshə mbrə əkɔ ne. 20 Mbrə ə̂në tə̂ äwä əkɔ nə̂ əzü, tshə sə sə kə mbrə ərə də äwänə lə ala Ndjapä ne. 21 Rəkɔ, e wə̈ra tə̂ e tə̂ ərə nɔ̂ ə̂në ə mbrə əzü tə əmbrʉ nə lə ala Ndjapä kɔ ə wə̈ra tə̂ e tə̂ kə mbrə ərə nɔ̂ tə̂ äwä əmbrʉ lɔsu; e yïndə əpʉ ə̂në Ndjapä lû gâ tə̂ lɔsu e kɔ də zɨtɨ lɔsu, ə̂në ə lï ndə kə pa ə she e lə kuzu kɔ.

22 E mbrə̈ ərə Lïndə̂ əpʉ nə, e djï djï kʉtə̂ nə ə djï ne kanika e frɔ tə̂ e frɔ ne. 23 Mbrə ə̂në, kədə ə̈bə̈ əzü kə dji əpʉ nə â mbrə tə̂ ye mbrə Lïndə̂ nə ne, tshə ko əzü ə̂në tshə wu tshitshi ye lə tatra 24 â mandâ kə wu tshitshi ye nə lə tatra nə, tshə za äwä ə rô â ə̂sə̂ äwä kə sə ətshə nə rô ətshə katshä gâ ye. 25 Bale, əzü ə̂në tshə pra âdâ âgbɔ̂ əpʉ ə̂në ə lï nɔ̂ gâ ye kɔ, tə âgbɔ̂ əpʉ ə̂në ə djɔ əzü, tshə sə ndə tshelə ye kɔ, â daka pə tə̂ äwä nə, â dji dji kʉtə̂ nə ndə kə pa ə̂sə̂ nə ro ətshə ne kɔ, bale â mbrə ərə Lïndə̂ nə, tshə sə kə sə ənə̂ ye tə ə̂rɔ̂ nə lə aərə ə̂në tshə sə kə mbrə nə kɔ.

26 Kədə ə̈bə̈ əzü kə wu tə̂ ye ə pa əne sə kə vrɔ Ndjapä â bata ama ye bata ne, tshə sə kə frɔ tə̂ ye də ə̂tə̂ ye â frɔ kɔ, kə vrɔ Ndjapä nə̂ ye nə sə yera ambanə. 27 Djatra kə vrɔ Ndjapä ə̂në ə fʉ lə ala Abä də Ndjapä nə kɔ kə də̂ kə pa əzü ga ndə ayasoro də ayashe koya lə aərə əyo nə̂ əndje, ə bata tə̂ ye tə̂ əmbrʉ ərə tshepashɔ səye nɔ̂.