1 Aawlra də akəpʉ ə̂në ə afɔ lə takpa tə̂ e kɔ ə afɔ kotâ a? Ə afɔ kʉ tə̂ äwä aəmbrʉ aəgo lɔsu e ə̂në ə mbrə awlra lə akwa e kɔ ne a? 2 E mbrə əgo ərə ə sɔtə̂ nə sɔ ne, bale, e wo azü. Lɔsu e su ə su də kə za tshelə e gâ tə̂ azü, â e lï lï ndə kə pa e sɔtə̂ ə̈bə̈ ərə bale ne. Bale, e sə kə zu tshelə akəpʉ də aawlra. E sə sə də ərə ne, mbrə ə̂në e yu tshuku nə yu kə Ndjapä ne. 3 Kədə e yu tshuku ə̈bə̈ ərə, e sə sə kə sɔtə̂ nə ne, mbrə ə̂në e yu tshuku nə yu də äwänə ne, e yu tshuku nə ndə kə pa e ndɨ kʉ tə̂ äwä aəgo lɔsu e nə.

4 E-e ə̂në e frɔ Ndjapä kɔ! E wusə̂ nə wu ə pa kə yində aərə tshepashɔ sə tə äwä kə wəra tə̂ əzü tə̂ Ndjapä ne a? Əzü ə̂në tshə yində kʉtə̂ aərə tshepashɔ nə, rəkɔ tshə do tə̂ ye tə əyïkowɔ nə̂ Ndjapä gâ ye. 5 E wu ənə̂ e ə pa əpʉ ə̂në Fraka nə̂ Ndjapä pa kɔ ə sə tə ambanə, ə̂në ə pa: «Ndjapä yində Âgbɔ̂ Yîrə̂ ə̂në tshə zâ ətshə gâ lə əzə̂ kɔ tə bandanə â sə kə mbrə manda ye.» 6 Bale, Ndjapä nə sə kə mbrə ə̂rɔ̂tə̂ ye kə əzə̂ ə rô ənə̂ səkɔ gâ ye. Fraka nə̂ Ndjapä nə pa: «Ndjapä wəra tə̂ ye tə̂ alayïwuma, bale tshə sə kə mbrə ə̂rɔ̂tə̂ ye kə azü ə̂në əndje mbrə tə̂ əndje tə aəngʉ azü kɔ.»*

7 Rəkɔ, e mbrə̈ tə̂ e teashe gâ tshekudu Ndjapä; e wə̈ra tə̂ e tə̂ djablo, ka tshə kpe ngrʉ̂ gashe tə̂ e. 8 E gï tə̂ e trö gâ tə̂ Ndjapä, ka tshə na trö gâ tə̂ e. Alayïnyaka, e yütu əmbrʉ ərə tə̂ kəna e! Alayïlɔsu bishi, e yütu əmbrʉ ərə tə̂ lɔsu e! 9 E wüsə̂ ərə əyo nə̂ e, e mbrə̈ mbadja, e kɨ̈ əkɨ! Amɔ nə̂ e dö tə̂ ye tə mbadja, ə̂rû nə̂ e dö tə̂ ye tə əkɨ! 10 E mbrə̈ tə̂ e teashe gâ tshekudu Âgbɔ̂ Əyïngerə, tshə sə kə ko e tɔ gâ lafɔ tə əgbro azü.

11 Alaye əmə, e pä əpʉ əterə pä də əɨrɨ angâ e ne! Əzü ə̂në tshə pa əmbrʉ əpʉ də əɨrɨ ə̈bə̈ aye wala tshə wa ngbanga gâ lə kumu ye, kandää tshə pa əmbrʉ əpʉ gâ tə̂ âgbɔ̂ əpʉ ə wa ngbanga gâ pâ âgbɔ̂ əpʉ nə gâ ye. Kandää, kədə bə wa ngbanga gâ pâ âgbɔ̂ əpʉ nə, bə sə sə tə əzü ə̂në bə sə kə mbrə ərə Lïndə̂ âgbɔ̂ əpʉ nə ne, bale bə sə tə awowa ngbanga gâ pâ âgbɔ̂ əpʉ nə gâ ye. 12 Kʉtə̂ Ndjapä tshî kə sə tə awowutu də âgbɔ̂ əpʉ nə də awowa ngbanga. Ətshə tshî kə lï ndə kə pa tshə tshɔ əzü, ə mbrə əzü nə tshu. Bale əbə ə̂në bə sə kə wa ngbanga gâ lə kumu bəngâ nə zə kɔ, bə sə ənə̂ zə tə əde?

13 Ə̂në a lə ye, e bäta əpʉ səye, e-e ə̂në e sə kə pa əpʉ ə pa: «Kpəsəye wala əmbʉ, ä sə kə na mâ lə gala səye, ə mbrə ə̂ngû bale mâ je. Ä sə kə ka aərə, ə sɔtə̂ ngendja» kɔ, 14 e-e ə̂në e wusə̂ äwä kə sə e tə asorô əmbʉ kɔ wu ndje ne kɔ! Ayî, e sə mata gupu ə̂ngû ə̂në ə wutu əndʉ nə dɨ kʉ teashe â mandânə ə ro kɔ. 15 Bale, əpʉ ə̂në e lï ndə kə pa e pa nə kɔ kə səye: «Kədə Âgbɔ̂ Əyïngerə kə yində nə, â ä sə də sorô, ä sə kə mbrə ərə səke wala ənə̂ səke.» 16 Bale, kpəsəye, e sə kə da əkro e də aəpʉ gbâma. Marä tə̂ wuma rə sə sə də äwänə ne. 17 Rəkɔ, kədə əzü kə wusə̂ kə mbrə ə̂rɔ̂ ərə â mbə mbrə ne, tshə mbrə̂ nyaka gâ ye.