Maria

Badijyo dya kubutuka kwa Yeesu

26 Haŋa hebambana yimi dya Elizabeti miango mutuba, Kabejya bya yiisha malaika* Gablieli, wa yeene mu mukola wa Nazaleti mukisi kya Galilaya, 27 kudi musika yumo katumbi we taanibwa Malia. Yowa musika katumbi we songolebwa na henda yumo zina dyaye Yozefu, wene wa kilongo kya kolo Daudi. 28 Yowa Malaika* bya shwela kwene Malia na kumujyongodela ti: «Na kusambitila Malia! Huseelele kumona waheebwa mbejya yi kata na Kabejya! Naiye udi kukumo noobe.»

30 Ila Malaika bya mujyongodela ti: «Teejya bangu Malia! Ndu tiina, kumona Kabejya wakuabila mbejya. 31 Mona bangu! Ushwaala yimi, na kubutula mwaana wa mwamulume; na umuhunika zina dya Yeesu. 32 Uyakana mukulu, na hutaanibwanga: ‹Mwaana wa Kabejya yidi haulu›. Vidi-nyambi Kabejya iye mwinikindu umwaabila kauna kashaye mukulu Daudi. 33 Utangala misha yooso haulu habaana Baisilaeli, bukolo bwaye ndabwakuyakana na mongo.»

Lusimo lwa Malia

46 Haŋo Malia bya jyongola ti:

«Tima dyaami dya shisha sisu Vidi-nyambi, 47 na dya sehelela kudi Kabejya sisu, mufuudi waami. 48 Kumona wangulola miimi muvubi waaye wabasikibadika.

Kwa kwinikindu kusomba leelo bandu booso bingundaananga mufiyuudibwe.

49 Kumona Kabejya-mutangala wa ngundeela bindu bikata.

Zina dyaye didi disidi na bubi kwinikindu.

50 Kindi kyooso huyakana mukumonesha buuya bwaye ku baaba bakimutiinanga.

51 Na kukidila kiboko kyaaye waata bindu bikata.

Wa mwangidizya booso bakiyakananga na kishu mumatima maabo.

52 Bene mukutangala wabashajya,

na baki kwishajya waba bandisha*.

53 Beteejyanga zala waba biika tubobo,

ila tubobo watualusha minyu busadi.

54 Huvaava kuva nyanguzya kisi Isilaeli kyaye,

ndavaluba kumumonesha buuya bwaaye,

55 Beebya bye badijyeeye kudi bashitu,

Abulahamu na nguku yaye misha yooso.

beebya bye badijyeye bashiitu.»

4 Yozefu naiye bya nyomoka mukisi kya Galilaya mu mukola wa Nazaleti. Bya yena Yudea mumukola we butukila Daudi ukitaanibwa Bethelehemu, weyena kokwa kumona wene wa kilongo kya Daudi. 5 Mukuyeena mukukwisinyisha bya yena na Malia, musika wenangiye muku musongola naiye wene na yimi tonono na kubutula. 6 Habenange kokwa ku Betelehemu, mafuku maye makubutula hama bambana. 7 Haŋo bya butula mwaana waaye wabusu wa mwamulume, bya muzikila ngubu ya mwaana mulebeela na kumutandibika musaani dya kudishila nyama, kumona nda bemona bua mu kyende kya baini.

19 Ila Malia, we bika maa mauya mooso mutima dyaye na bya yakana mukumahejya fikidijyo.

34 Ni Simeoni haya bafiiyudila,* haya jyongodela Malia naajye na mwaana ti: «Muteejye bangu: Mwaana yuugu wabutuka uyakana kashu songo kakuzizimisha bandu babule hamukidi haba Isilaeli, na kutalusha babule hamukidi haabo. Uyakana lutondo kunyomokela kudi Kabejya yi bengebwa na bandu babule. 35 Biibi, miejyo ya bandu babule yikifamishibwa yi monekanga. Na bee bunga usubanga bidi yowa wamanikibwa fumu mutima dyaaye.»

48 Yosefu na Madiya najyaayi haba bumumona haba kanya. Ni najyaayi haya muyuujya ti: «Mwaana waami, nyaayi kya watuteela biibi? Lola, miimi na shobe tuvanange na susu mukukukeba!» 49 Yeesu haya basawiila biibi: «Nyaayi kyamudi munikebela? Ndamuluyu’a tii, yilunihaajya uyaana munda mwa yendi kya Shaami?» 50 Haboobwa ebu ndababuyu’a kwakai byebwanangi mubasaudila beebya.

51 Kumongo, Yeesu bya haluka nabo ku Nazaleti, uvanange mukuta beebya bye musaudilanga ba shaye. Maama mauya mooso, najyaye bya yakana mukumabiika mutima dyaaye.

Ilongo kya unindu kya Yeesu

31 Nyuma yahaŋo Najyaayi* na Yeesu na bawaayi* na Yeesu habafi’a. Haba tebama haajya. Habe nange bakidi haaza haba yiisha mundu wenangi kumutaŋana Yeesu. 32 Momwa munda mwa kyende, bandu babutu babukaana haasi haba munyungalala Yeesu, haba musawiila. «Lola! Najyoobe na beena yoobe, badi haayja badi mukukeba.» 33 Yeesu haya balunga: «Najyaami ninani, na ba waami mbanani?» 34 Na Yeesu haya lola baba babu yaana haasi na umu nyungalala, haya boya: «Baba i Najyaami na ibawaami! 35 Umona Yoowa wooso watanga byeebya Kabejya byeelu vula, i muwaami na i Najyaami.»