1 Igandu kya mikati yishidi buhae* kya Bayuuda, ilu teenebwa Pasaka*, heebu ne naama. 2 Ba mupeelu* baa tagadi na balangidijyi ba Buta* babwa nangi muu keba zila yoo muhegesha Yeesu, habobwa babwa nangi muu tiina bandu.

3 *Habobwa Shetani hawa sheela munda mwa Yuda. wetaanibwa lungi Yuuda Isikaliote, yowa Yuda gubwa nangi yumo hamukidi ha mitonge* kumi na yibidi ba Yeesu. 4 *Yuugu Yuda haya weena uba kulu babamupelo* baa bakulu na ba beedi balu dindijya bibelu bya Lubunga* mukuboya ti bakwitejyejyena nabo kukidila zila ya kutuula Yeesu. 5 Haba moona buuya sisu na haba mubadijya ti bimuabila falanga. 6 Yuda haya tabuka na hasikikebeeye kindi kileela kyakutuula Yeesu kwabadi kusidi bandu kuyuka.

7 * Lusu lwa kiandu kya mikati yisidi yihae* halwabambana. Lolwa lusu ni lwabeshijyanga mwaana wa punda kukiandu kya Pasaka.* 8 *Yeesu hayayiisha Petelo na Yohana na hayaba sawiila ti: «Mwenange mukatutekele biyaazi bya Pasaka*.» 9 Haba mu yuuja ti: «Gudi muu vula tubitekele beebya bidyazi kuni?» 10 Yeesu haya bayaka ti: «Muteejye bangu! Haŋa hamushwela mumukola mubanga yumo mwamulume kushwaala mubungu wameema, mumujyange mupaka kyende kishweeleye. 11 Haŋo mujyongodela yowa mwini kekya kyendi ti: ‹Mulangidijyi wayuujya ti: nguni kudikyumba kidileye bidyazi bya Pasaka* kukumo na badingisi* baye.› 12 Naiye ubamonesha bua dikata dyaaulu dya lungakanyibwa bilweela. Momwa ni mwamutekela bidyazi bya Pasaka*.» 13 Haŋo, baaba badingisi habayena, habakabanga kindu kyooso byakebe bivabasaudila Yeesu. Ni hababika tonaa bidyazi bya Pasaka.*

14 Kindi hakyebambana, Yeesu bya yakana kudya bidyazi kukumo na mitonge* baaye. 15 *Yeesu haya basawiila ti: «Nidi na sungu dya bule kudya biibi bidyazi bya Pasaka* kukumo niinu busu bwa miimi kusuba. 16 Kumona nabasaudila ti, shakubidya lungi bidyaazi bya Pasaka mupaka beebya byambidya beebya bikibambana mubutangala bwa Kabejya*.»

17 Ni Yeesu byabuula mubungu wa divai*, byata abee kudi Kabejya hajya na kuboya ti: «Mubugudi wuuwu mubungu wa divai muabaane.* 18 *Kumona na basaudila, shakunya lungi divai* mupaka butangala bwa Kabejya* habuviya.»

19 Haŋo Yeesu bya bugula mukate,* hayata abee! Kudi Kabejya, na haya ubela, na haya habila badingisi* baye. Na kuboya ti: «Luulu ni lukoba lwaami lutudibwa kwamudi banyu. Mutange biibi kwakunguhejya miimi.»

20 *Kisha kuwa kudya Yeesu byabuula mubungu wa divai kisha kudya, nakuboya ti: «Wuuwu mubungu ni Kilao kiya* kititiminywa na muloa waami wahukuka kukidila banyu.

21 *Ila, mulodi! Yoowa yingundula udi mukudya naami. 22 *Kwinikindu, miimi Mwana wa Mundu nikwimotela byaami kukidila bebya byeyakula Kabejya. Ila kuloebwa kwa yowa ungundula.» 23 Ni badingisi habasomba kukwiyujyujyena hamukidi haabo ti ni naani hamukidi haabo kibambana kuta diidi kumo.Yeesu waadya bidyazi bya Pasaka* na mitonge* baaye.

24 *Kisha, hamukidi habadingisi* ba Yeesu hakwanyomokela mbaka ti ni naani yidikulu kukila bezinaye. 25 Yeesu haya ba sawiila ti: «Hamukidi hakisi kisikiyuka Kabejya, bakulu baabo bakibatalukilanga na kibandibandi. Na badi na butangala haulu haabo bakikwitananga bakita buuya.» 26 *Ila ndayiyakana beebya hamukidi hiinu. Mundu yidi mukulu kukila bangi, ukibambana kuyakana bidi iye ni mwaana musheenene. Na kitalukila bangi, ukibambana kuyakana bidi iye ni muvubi waabo. 27 *Haŋo, ni naani yidi mukulu kukila mwizinaye mubaaba babidi? Jyowa kiyakana mukudya ao jyowa kipakudila? Miti jyowa kiyakana ukidya! Ila nembiibi, miimi mbidi hamukidi hiinu bidi kimuvubila.

28 *«Banyu ni belembelejya kuyakana naami mukulabudibwa kwaami. 29 *Kwa biibi, na baabila Butangala* bidi beebya byengwabila Tata waami. 30 Kwa biibi, mudya na kunywa kukumo naami mu butangala* bwaami. Lungi mbanyu ni biyakananga mutuna twa bukolo, kwakulamuna bilongo kumi na bibidi bya Isilaeli.»

31 Yeesu haya jyongodela Simoni Petelo ti: «Simoni, Simoni! Lengeka! Shetaani* waebwa bangu ya kubayungulula beebya byabakiyungulula ngano, mukuboya ti wamilabule.* 32 *Ila miimi vakuajyila ti butabuke bwoobe ndabuzizimina kwambidi. Na haŋa hingualukila, ukwatishe matima mabakwoobe.»

33 *Naiye Petelo haya muyaka ti: «Vidi-nyambi, miimi mbidi tonaa kwena kukumo noobe muzitikilu, na nengumota kukumo noobe.» 34 Yeesu haya mujyongodela ti: «Nakujyongodela beebe Petelo, leelo busu bwa muko kuyakula, uyakana wangunduna mbendo yisatu ti ndukinguyuka!»

35 Ni Yeesu haya yuujya badingisi* baaye ti: «Haŋa hambebayiisha kusidi falanga, ao kusidi taba dya luendo, ao kusidi mikalabanda, kudi kindu kyamwekushwa?» Naibo habamuyaka ti: «Hebo.»

36 Ni Yeesu bya basaudila ti: «Ila buune, yowa yidi na falanga wayibuule; byakebee na yowa yidi na taba dyaluendo wabuule. Byakebee, yowa wooso sidi na kiyoma waukuudisha ngubu yaye wakiule. 37 Kumona ngimu saudila ti maama makibambana kungubanga, maama makisinyibwanga mu Businye bwa Kabejya ti: ‹Uvabadikibwa kukumo na baba bakita bubi*.› Kumona mauya makinguyelekela, madi tonono matuyuke kumongo waamo.»

38 Badingisi* baaye haba musaudila ti: «Vidi-nyambi, lola bangu; haŋa tudi na biyoma bibidi.» Naiye bya basaudila ti: «Maamo mauya mabambanina haŋa!»

39 Yeesu byaezela mudedya bua, byabanda kukituulu kya Mizeituni byene bwaama bwaye. Na badingisi* baye haba mujyanga. 40 Haŋa hekajyeye mudedya bua, bya jyongodela badingisi* baye ti: «Muajye Kabejya kwa kuboya ti ngasi mwaona mu bya kumuluvyakana.»

41 Haŋo, bya kwisamijyena nabo mumunonga wa mundu kukasa ibwe. Byafukika manyu, na kusomba kuajya Kabejya ti: 42 «Shami, itu wavula, wuuwu mubungu wa kusuba, ushwale munonga naami! Nembiibi, ndayiyakana bushwa byangivula, ila nguvula kwoobe ni kwateebwe.»

43 [Haŋo Malaika* yumo kunyomokela mbinguni, bya munyomokela kwakuboya ti wamute butangala. 44 Yeesu byayakana na susu dya bule, bya tetebejya kuajya Kabejya na tindi dya bule. Kitaata kyene muku mufusuka hakyayakana bidi ma mbombo ma muloa, kyene mukunoka mupaka mu mateke.]

45 Haŋa heweye kuajya Kabejya, byataluka na kualuka mubua dyesiyeye badingisi.* Bya babanga badi mu tulo kumona bene na susu. 46 Haŋo bya basaudila ti: «Kwakayi muki tandabala mutulo? Mubuuke, muajye Kabejya ngasi mwashweela mu byaku muluvya.»

47 Haŋa henange Yeesu ukidi lungi muku yakula, hakwanyomokela kiandu kyabandu. Yuda yumo hamukidi ha baba mitonge* kumi na yibidi ba Yeesu ni wene busu bwaabo. Bya tuluka tonono na Yeesu mukuboya ti wamu yambitile. 48 Ila Yeesu bya muyujya ti: «Yuda! Mukunguyambidila ni kwandula miimi Mwana wa Mundu?»

49 Badingisi* ba Yeesu habe mona maama makivula kuteebwa, haba muyuujya ti: «Vidi-nyambi, tubashukileshukile na biyoma biitu?»  50 Yumo hakeaŋa hamukidi haabo bya temba muvubi wa mupelo* mukata kiyoma, bya mutemba kushu dyaye dya mwaajyo mulume. 51 Ila Yeesu bya bayaka ti: «Musame! Bebya.» Bya lengela kushu dya yowa mundu, na kudifuula.

52 Haŋo Yeesu bya saudila bakulu baba mupelo*, na bakulu baba lolezi ba Lubunga,* na ba nunu babayaudi beeva kuva mukwaata ti: «Kwakaayi mwanguvila na biyoma na bikooma bidi kilwanyi? 53 Masu mooso bene niinu mu Lubunga,* ila ndamwee kungwata. Ila kiino ni kindi kiinu, lungi kindi kya butangala bwa mukunga.»

54 Haŋo, baaba bandu habakwaata Yeesu. haba muyelekejya kukyende kya mukulu wa ba mupelo*. Petelo bya yakana muku mujyanga mumunonga.

55 Mudilo hawamunikibwa mu kyambala kya mukulu waba mupelo.* Petelo naiye bya yakana mukuyota mudilo kukumo nabo. 56 Muvubi yumo wa mwamukazi, hemoneye Petelo wa yakana hangondo ya mudilo, bya mufikidijya meeso, na kuboya ti: «Yu mundu naye byakebee uvanange kukumo na Yeesu.» 57 Ila Petelo bya benga nakuyakula ti: «Beebe yuu mwamukazi! Miimi siki muyuka yowa mundu!»

58 Kaindi kashoo kukila, yungi mundu bya mona Petelo na kumujyongodela ti: «Na beebe udi yumo bobo hamukidi haabo!» Ila Petelo byamuyaka ti: «Beebe yu mwamulume! Ndabeebyo, miimi sidi yumo hamukidi haabo!»

59 Kindi kukila kya saa yiyimo, mundu yungi bya titiminyina Petelo ti: «Kwinikindu, yuu mundu uvane bobo kukumo na Yeesu, kumona iye naye udi mundu wa Galilaya.» 60 Ila Petelo bya yaka ti: «Bebee yuu! Miimi sikiyuka ukivula kuyakula kaayi!» Haŋa, hene Petelo ukidi yakula, hakeaŋa muko hawayakula. 61 Haŋo Vidi-nyambi bya kibuka na kumulola Petelo sokosoko. Ni Petelo bya hejya dedya huya diva musaudila Vidi-nyambi ti: «Leelo diino busu bwa muko kuyakula uyakana wangunduna mala kasatu.» 62 Hakeaŋa, Petelo bya nyomoka mudye bua na kusomba kudila subusubu.

63 Baba bandu bavane mukudindikijya Yeesu, habasiki muyilula na kumutuuta. 64 Haba muzika meeso, haba yakana muku muyuujya: «Busha tumone, ninaani vakutuuta?» 65 Haba muyakudila mauya mangi mabule ma kumukaya.

66 Haŋa heekya bufuku, banunu babayaudi, na bakulu baba mupelo* na balangidishi ba buta* haba kumaana kaole na kuvisha Yeesu busu bwa kaaka kaole* kaabo. 67 Haŋo haba muyuujya ti: «Beebe ni Kilisito*? Utusaudile!» Naiye Yeesu bya yaka ti: «Nee namusaudila ndamwakutabuka. 68 Nee itu na muyuujya huya ndamwakungu yaka. 69 Ila kusomba buune, miimi Mwana wa Mundu na yena kukayakana mwajyo mulume wa Kabejya yidi na butangala.»

70 Haŋo ibo booso haba muyuujya ti: «Manee nikuboya ka ti beebe ni Mwana wa Kabejya?» Yeesu byaba yaka ti: «Banyu benikindu mwaa yakula ti miimi niiye.»

71 Haŋo, hibo haba yakula ti: «Ndatuki hajya sanganyi yungi kukidila yuu mundu, kumona bashu benikindu twaa kwi teejyela maama mayakuleye!»