1 Mutumbibwa Theofilo, kudi bandu babule baheleka kusinya kukidila maama makumo meekidika hamukidi hiitu. 2 Be masinya bebya byatwe saudibwa na baaba bee mona maama makumo na meeso maabo kusombela kumusombo, na be mwangidijya wowa musau wa Kabejya. 3 Mulukizya lwaami vafifulula zizii mudimo wa Yeesu kusomba kusombelo tii leelo. Kukidila beebyo vamona buya kukusinyina kamo kwa kamo, mtumbibwa Theofilo. 4 Nakusinyina mukuboya ti uyuke zizii mama mawe langidibwa ti makwinikindu.

5 Mumaa mafuku meene Helode Kolo* wa kisi kya Yadea, kwene mundu* yumo we taanibwa Zakadia. Yowa Zakadiya, wene yumo mupelo wa kiandu kya mupelo Abiya. Mukajyaye we taanibwa Elizabeti wa kilongo kya Aluni. Yowa Aluni ni wene mupelo* wa busu mu Isilaeli.

6 Zakadia na Elizabeti booso babidi be sumuka bilweela busu bwa Kabejya, na be yakana mukujyanga Buta* na mubilao bwa Vidi-nyambi. 7 Nembebya ndabeene na baana, kumona Elizabeti wene kiumba; na booso babidi bene ndabate banunu.

8 Lumo lusu, Zakadia weyena ku lubunga lwa Kabejya* kukata mudimo waaye wa bumupelo, kumona lwene lukijya lwaaye lwa kuvuba mukiandu kyaabo. 9 Haŋo kukidila bwaama bwa ba mupelo* ni Zakadia we sobolebwa kukidila* ndonge ti washweele mu lubunga lwa Kabejya na wa jyijye* kafa*. 10 Mukekya kindi kye jyijya Zakadia kafa, kiandu kikata kya bandu, be kumaana haaza baki hajya Kabejya. 11 Kisha Malaika* wa Kabejya bya nyomokela Zakadia mwakemo munda mwa lubunga lwa Kabejya*. Yowa malaika bya taluka mwajyo mulume wa kabunga ka kujyijyila kafa.

12 Zakadia hevamumoneye bya hanunuka na kuteejya moyo. 13 Ila yowa malaika* bya mujyongodela ti: «Zakadia, ndutiina, kumona Kabejya watabuka kuajya kwoobe. Mukajyobe Elizabeti uku butudila mwaana wa mwamulume, na beebe umuhunika zina dya Yohane. 14 Useelela kwa kwinikindu na bandu babule biseelela kubutuka kwaye. 15 Yowa mwaana uyakana mundu mukata busu bwa Vidi-nyambi. Kwa biibi, ndakunywanganga divai wala maluvu*, tima dya Kabejya diyakana kukumo naye kusombela muifu ndya naazye*.

16 Ualusha bandu babule ba Isilaeli kwa Vidi-nyambi Kabejya waabo*. 17 Uuva bushwa muvubi wa Kabejya usumuka na butangala bwa tima dya Kabejya na tima bidi dya mubushi Elia. Ulunganga ba tata na baana baabo. Ufundulula ma tima mabaaba basiki tiina Kabejya,* mukuboya ti bayakane na butangala bwa kuyuka mauya bidi bandu badi balweela busu bwa Kabejya. Biibi, ubikila Vidi-nyambi bandu tonaa kwa kumutabuka.»

18 Ila Zakalia bya yuujya yowa malaika* ti: «Ngike kindu kingu monesha ti maama mauya maukisaula madi ma kwinikindu? Mona bangu, miimi na mukajyami tudi banunu byakebee.» 19 Malaika bya muyaka ti: «Jyaami Gabilieli*, ngitebamanga busu bwa Kabejya kwakumuvubila. Uvanguyiisha kwaudi ti nakuvishile huu mukizi ulweela. 20 Maama mauya mibambana aŋa heboyela Kabejya. Kumona nduvamatabuka uyakana kifuma. Ndwakusamuna lungi kuyakula mupaka lufuku lwa maa mambivakusaudila hamibambana.»

21 Mukekya kindi, bandu benange muku dindila Zakadia haaza habasikianunuka kumona bebya byaloweye momwa munda mwa lubunga*. 22 Zakadia henyomokeeye haaza, ndee samuna kuyakula naabo. Haŋo bya yakana muku jyobola na bandu na minyu bobo, kumona huvanange ndate kifuma. Haŋo baaba bandu bya bayuka ti huvamona bindu bidi kilooto mo munda mwalubunga*.

23 Haŋa hewa Zakadia mafuku maaye makuvuba mulubunga lwa Kabejya*, bya haluka ku kyende kyaye. 24 Hekila mamo mafuku Elizabeti mukajyaye bya shwala yimi. Bya kwifyamisha munda mwa kyende kindi kya miango yitano, bya yakulanga ti: 25 «Lola buuya bwangu ndeela Mwaba-kalunga!*; wangujyejyela buuvu bwa kuyakana kiumba busu bwa bandu booso.»

26 Haŋa hebambana yimi dya Elizabeti miango mutuba, Kabejya bya yiisha malaika* Gablieli, wa yeene mu mukola wa Nazaleti mukisi kya Galilaya, 27 kudi musika yumo katumbi we taanibwa Malia. Yowa musika katumbi we songolebwa na henda yumo zina dyaye Yozefu, wene wa kilongo kya kolo Daudi. 28 Yowa Malaika* bya shwela kwene Malia na kumujyongodela ti: «Na kusambitila Malia! Huseelele kumona waheebwa mbejya yi kata na Kabejya! Naiye udi kukumo noobe.» 29 Haŋa heteejya Malia maama mauya bya nyingama kwa bule, bya somba ku kwiyujya ti: «Kuuku kungusambitila kwa Malaika* kukivula kuyakula kai?»Malaika wajyongodela Malia ti hubutula Yeesu

30 Ila Malaika bya mujyongodela ti: «Teejya bangu Malia! Ndu tiina, kumona Kabejya wakuabila mbejya. 31 Mona bangu! Ushwaala yimi, na kubutula mwaana wa mwamulume; na umuhunika zina dya Yeesu. 32 Uyakana mukulu, na hutaanibwanga: ‹Mwaana wa Kabejya yidi haulu›. Vidi-nyambi Kabejya iye mwinikindu umwaabila kauna kashaye mukulu Daudi. 33 Utangala misha yooso haulu habaana Baisilaeli, bukolo bwaye ndabwakuyakana na mongo.»

34 Malia bya yuuzya Malaika* ti: «Mbini maama makumo mi samunika bini, haŋa miimi sheyuka byaami mulume?» 35 Malaika* naaye bya muyaka ti: «Tima dya Kabejya dikuviila haulu hoobe na butangala bwa Kabejya yidi haulu bukuzikila bidi mwiziizi. Kukidila beebyo, mwaana hubutuka hutaanibwa sidi nabubi, na hutaanibwa Mwaana wa Kabejya. 36 Teezya bangu: nee Elizabeti wa kilongo kyoobe naiye hudi na yimi dya miango mutuba, dya mwaana wa mwamulume, iye yidi mununu na kiumba. 37 Kumona ndakudi kisiki samunika kudi Kabejya.» 38 Haŋo Malia bya yakula ti: «Miimi mbidi muvubi wa Vidi-nyambi, Kabejya wangundeele beebya bya uki jyongola.» Ni Malaika* bya yeena.

39 Kisha mafuku mashee kukila, Malia bya hamba luendo yayaya mupaka mumukola umo hudi bituulu bya Yudea. 40 Hesosokeye kokwa, bya shweela mu kyende kya Zakadia na kumu sambitila Elizabeti. 41 Hakeaŋa he teejya Elizabeti Malia wamu sambitila, mwaana wene muifu dya Elizabeti bya kwitenganya. Elizabeti bya yudibwa na Tima dya Kabejya. 42 Bya bajya muuya na kuyakula ti: «Kabejya waku fiyuudila kukila baabakazi booso na mwaana waubutula naiye wa fiyuudibwa. 43 Miimi ni naani kwa kuboya ti naazye na Vidi-nyambi waami wangu sumukile? 44 Kumona hambivateezya muuya wakungusambitila kwoobe, mwaana yidi muifu dyami huvatenganya kwaku seelela. 45 Hufiyuudibwe beebe, kumona huva tabuka ti maama mavakujyongodela Vidi-nyambi mibambana bobo.»

46 Haŋo Malia bya jyongola ti:

«Tima dyaami dya shisha sisu Vidi-nyambi, 47 na dya sehelela kudi Kabejya sisu, mufuudi waami. 48 Kumona wangulola miimi muvubi waaye wabasikibadika.

Kwa kwinikindu kusomba leelo bandu booso bingundaananga mufiyuudibwe.

49 Kumona Kabejya-mutangala wa ngundeela bindu bikata.

Zina dyaye didi disidi na bubi kwinikindu.

50 Kindi kyooso huyakana mukumonesha buuya bwaye ku baaba bakimutiinanga.

51 Na kukidila kiboko kyaaye waata bindu bikata.

Wa mwangidizya booso bakiyakananga na kishu mumatima maabo.

52 Bene mukutangala wabashajya,

na baki kwishajya waba bandisha*.

53 Beteejyanga zala waba biika tubobo,

ila tubobo watualusha minyu busadi.

54 Huvaava kuva nyanguzya kisi Isilaeli kyaye,

ndavaluba kumumonesha buuya bwaaye,

55 Beebya bye badijyeeye kudi bashitu,

Abulahamu na nguku yaye misha yooso.

beebya bye badijyeye bashiitu.»

56 Madia bya yakana kudi Elizabeti kindi kya miango yisatu, ni bya halukeeye kwaabo.

57 He bambana kindi kya Elizabeti kubutula, bya butula mwaana wa mwamulume. 58 Bandu ba tonono naye na baa bakilongo kyaye habe teezya wowa mukizi ti Mwaba-kalunga wamu monena lusa lwabule, haba seelela kukumo naye. 59 Mwaana he bambanyeeye mafuku muhanda makubutuka, haba yena naye mukumutemba ndeezwa*. Habavula kumu hunika zina dya shaye Zakadiya, 60 Ila, najye na mwaana bya bajyongodela ti: «Nda bebya, mwaana uhunikibwa zina dya Yohane.»  61 Naibo haba musaudila ti: «Ko! Mukilongo kiinu ndakudi mundu nee yumo kitaanibwa dedya zina!»

62 Kwa bebya haba yuujya shaye na mwaana kwaku musungila na minyu, ti: «Ndikezina dyaukivula kuhunika mwaana?» 63 Zakadiya bya bahajya kaba kalubao bya sinya haulu hako ti: «Zina dya mwaana ni Yohane.» Ibo booso haba kanya (ao kukeka). 64 Akeaŋa mu bua, ludimi lwa Zakadia halwa hanguka lungi, bya somba lungi kuyakula na kushisha sisu Kabejya. 65 Haŋo bandu booso ba tonono naye haba teejya moyo. Na wowa musau hawamwangalala mabua mooso mu bituulu bya kisi kya Yudea.

66 Bandu booso beteezya woowa musau haba siki kwiyuujya mumatima maabo ti: «Yuu mwaana wabutuka huyakana mundu wa yike namuna?» Kwinikindu butangala bwa Kabejya buvane kukumo naye.

67 Zakadia shaye na mwaana, bya yudibwa na tima dya Kabejya, bya busha na kuyakula biibi:

68 «Watumbibwe Mwaba-kalunga Kabejya wa Isilaeli,

kumona waava kuvanyangujya bandu baye na kufuule bandu baaye.

69 Watuvishila wakutufuula yidi na butangala,

wanyomokela mukilongo kya muvubi waye Daudi.

70 Yeya yidi bebya kukidila bye badijyeye kalee,

kukidila babushi* baaye basidi na bubi.

71 Ti, hutuvishila wakutu fuula mu biboko bya balwishi biitu,

na kunyomoka mubiboko bya baaba booso baki tubenganga.

72 Wemonesha lusa lwaye kudi bashitu,

na ndeluba kilao kyaye kitokatoka. 73 Weeta bebya kukidila bebya bye lapileye Abulamu shitu mukulu:

74 Ti utufuula mu biboko bya balwishi biitu,

mukuboya ti tumuvubile kusidi moyo,

75 mubutooke,

na mukuta bidi mubuludi busu bwaye,

mafuku mooso mubuyakane bwiitu*.

76 Na beebe mwaana waami, utaanibwanga mubushi* wa Kabejya yidi haulu,

kumona njyoobe husosoka busu bwa Vidi-nyambi kusosoka,

kwaku boya ti umulungakanyine zila.

77 Na njyoobe usaudila bandu baaye ti waava mukubafuula,

muku bamonena lusa bubi bwaabo.

78 Kumona Kabejya wiitu ukiyakananga na lusa lwabule,

hutuvishila mwimwi wa haulu bidi munyinya wa mukisi hutu munukila.

79 Humunikila baaba badi mumukunga, na mumwiziizi wa kumota,

kwa kuboya ti watunyangujye kulonda zila ya nyaa.»

80 Yowa mwaana bya kula, na kuhama mukulu fondo. Bya yena kukayakana mulungu mupaka bebya bye kwi monesheeye hululu kukisi kya Isilaeli.