1 Ni, Yeesu haya teele lungi badingisi* baaye wuuwu muele kwakubamonesha ti yiluba haajya kuyakana mukuajya Kabejya kusidi kulebela. 2 Haya saula ti: «Mu moola gumu mubwa nangi mulamuzi yumo. Yuu mulamuzi ndi bwanangi mumu tiina Kabejya, na gubwa nangi muu mona mundu wooso wa busadi mabusu gaayi. 3 Na muwowa mukola muvanange byakebee mwadyangu yumu. Yuu mwadyangu gubwanangi mu vueya kudi yuu mulamuzi mwena lusu na umu sawiila ti: ‹Uni lamunine bilweela mauya maami mangiyakananga namo na mu lwiishi waami!›*

4 Ila, masu ga butu hamakila na yowa mulamuzi ndava vula kumulamunina. Kumongo, yowa mulamuzi haya kwijyoboojya ti: ‹Unindu miimi shilu tiina Kabejya, na nilu mona mundu wooso busadi, 5 *'Ila, umona ti yuugu mwadyangu wani hosho, nimunamunina bilweela mauya maaye. Kumona itu sivata biibi, utetebejya kunihosha bobo.›»

6 Kukidila beebyo Vidi-nyambi byaya boya lungi ti: «Mutelegejye bileela byeebya yuugu mulamuzi mubimubi byeebu boya.* 7 Buune, Kabejya naaye ndaku lamunina bileela baaba besoboleye baki mudidila bufuku munyinya? Buune, ulowanga kwakubanyangujya? 8 Nami sawiila ti: ubalamunina imo kabilo. Ila, haŋa miimi Mwaana wa Mundu hambialukanga, nibanganga bandu badi na butabuke muune mumusenge?»*

9 Kwenange bandu bene mukukwimona badi buludi busu bwa Kabejya na kumona bangi busadi. Ni* Yeesu haya ba teela huu muele: 10 *«Lusu lumu, bandu babidi bava yena ku Lubunga* kukahaajya Kabejya. Yumu gubwanangi mu Falisayo*, na yungi uvanange gulu haajya mulambu. 11 Yuugu mu Falisayo*, haya talu'a, na heekilu haajya Kabejya munda mwa tima dyaayi ti: ‹Ha Kabejya waami, noota abee koodi beebe manee miimi sikiyakananga bidi bangi bandu. Ibo bakiyakananga bakiyiba, lungi bakibembela, lungi bamasenga. Na kuteela abee manee miimi shidi bidi yuugu lu haajya mulambu.* 12 Mala kabidi mu yinga, Ngiajyanga kusidi kudya. Na nilu tuula luba lwa kumi lwa bindu byaami byooso.›

13 *Ila, yoowa hulu haajya mulambu iye, haya tebemena munonga, ndavaheleka nee kutundula meeso maaye haulu. Ila, uvanange bobo mukukwituta biboko muanga dyaye na susu, mukuajya lusa ti: ‹Kabejya waami, nguviile lusa! Miimi mbidi mundu kita bubi!› »

14 Ni Yeesu bya boya ti: «Namujyongodela ti yuu kihajya mulambu we haluka kukyende kyaaye na Kabejya wamumona bidi mundu yidi buludi busu bwaaye. Ila, yowa Mufalisayo*, ndabeebya! Kumona kila yowa kikwibajyanga ushajyibwanga. Ila kila yowa kikwishajyanga iye ubajyibwanga.»

15 *Lusu lumu, bandu babuvishila Yeesu baana basheenene mukuboya ti wahibike biboko. Haŋa badingisi* baaye habeemona beebyo, haba hanunukila baaba bandu. 16 *Ila, Yeesu haya tabukila bamu vishile baaba baana. Haya saudila lungi baaba badingisi* baaye ti: «Musame baaba baana baave kwambidi! Ndamuba zikilanga. Manayaaye, Butangala bwa Kabejya* ngwa baaba badi bidi baaba baana. 17 Namu saudila byakwinikindu ti mundu neeyumo sikitabuka Butangala bwa Kabejya* bidi mwaana musheenene, ndakushweela neehamo mubobwa butangala*.»Yeesu wafiyuula baana basheenene

18 Mukulu yumo wa Bayaudi bya yuujya Yeesu ti:«Mulangidijyi muleela, nate kaayi kwaku boya ti navuke mwejyo wamisha yooso?» 19 Yeesu hayamu lunga ti: «Kwakaayi wangundaane muleela? Nda kudi yidi muleela kabejya iye bunga. 20 Miti ukiyukanga bikiyakulanga buta* bwa Kabejya ti: ‹Ndu yakana mukuta masenga, ndu yakana mukuyaijyana, ndu yakana mukuyiba, ndu yakana mukusaula bya manu kudi mundu. Lungi uyakane mukuteejya shobe na najyoobe.›»* 21 Yowa mundu hayajyongodela Yeesu ti: «Ngitanga bobwa buta* kusombela buenda bwaami.»*

22 Haŋa heva teejya Yeesu maamo, hayamujyongodela ti: «Kukishaala kindu kikimo kya wesheeta: Udisha bindu byooso byaudi nabyo, na mona yooso yauvukanga uhabanyine tushuvi yeya mona, waata bebya beebe uyakana nakabokosho kuaulu. Kiisha viyaa ungujyange.»

23 Ila, yowa mundu heeva teejyeye beebyo, weteejya susu kabisa, kumona wene kabobo kabisa.

24 Yeesu hemumoneye ti yuhu mundu wateejya susu dyabule, bya boya ti: «Kwinikindu binyumine kwa tubobo kushwela mu butangala bwa Kabejya*!

25 Mbieleela kabisa kwa ngamia kukila muhundu ndya mutubulo, kusidi kabobo kushwela mubutangala bwa Kabejya*»

26 Baba bandu habeetejya maamo mauya haba yuujya ti: «Itu mbeebyo, njyuni kaa yi fuka kwa tima?» 27 Yeesu bya saula ti: «Kindu kyooso kisiki samunika kudi bandu kalunga, kiki samunika kudi Kabejya.»

28 Haŋo Petelo bya jyongola Yeesu ti: «Lola bangu! Bashu twasama byooso byatwene nabyo kwakukujyanga!» 29 Yeesu bya basaudila ti: «Kwinikindu ngibasaudila, mundu wooso itu wasama kyende kyaye, ao mukajyaye, ao bakwaye, ao bashaye, au baana baye kukidila butangala bwa Kabejya,* 30 uebwa bindu byabule mukindi kikidiye muune mumusenge. Na mukindi kivanga, uebwanga byakee bee mwejyo wa misha yooso.»

31 Nyuma ya haŋo, Yeesu bya buula baba mitonge baye kumi na babidi, haya bajyongodela ti: «Muteejye bangu! Bashu baano twabanda kuyenanga ku Yelusalemu, na kokwa kibojywa kindu kyoso kyesinyibwa na babushi* kukidila miimi Mwaana wa Mundu 32 Kumona nitudibwa mubiboko bya bandu basidi Bayaudi. Naibo bingusea, na kungungaya, na kunifidila mata, 33 na bingushwika tundendele, kisha binguyaa. Na masu masatu kisha kumota kwaami ni fukuka.» 34 Ila, mitonge baye ndabe yuka ngingu ya mama mauya, kumona yene bufyamishibwe kwabadi. Na ndabeyuka ti Yeesu we yakudila kaayi.

35 Haŋa Yeesu hetuluka tonono na kusosoka ku mukola wa Yeliko, byabanga mukufu yumo wene buyakane haasi hangondo ya zila, mukuta kalabwa.* 36 Yowa mukufu heteejyeye kiandu kyabandu muku kila bya yuujya ti: «Kudi kayi?» 37 Bandu haba muyaka ti: «Ni Yeesu wa Nazaleti yidi muku kila.» 38 Haŋa heetejyeye bebyo bya bajya muuya na kuboya: «Yeesu Mwana wa Daudi ungufiile lusa!» 39 Baba bandu beyena kumbala ya Yeesu haba muhanunukila na kumuboya ti wauume nyaa. Ila iye bya bajya muuya lungi: «Mwana wa Daudi ungufiile lusa!»

40 Yeesu bya tukama, bya boya bamuvishile yowa mukufu. Haŋa hetulukeye tonono na Yeesu, Yeesu bya muyuujya ti: 41 «Ukivula nakuteele kayi?» Naiye bya boya ti: «Vidi-nyambi, ngivula na mone lungi.» 42 Ni Yeesu bya mujyongodela ti: «Mona lungi! Butabuke bwobe bwakufuula.» 43 Hakeaŋa, yowa mukufu bya mona lungi. Byajyanga Yeesu kutumbijya Kabejya. Haŋa heeva mona bandu booso maamo, naibo haba yakana byakebee naibo mukushisha Kabejya.