1 Yeesu hayateela mitongi* yaye wuu muele ti: «Ubwanangi kabobo yumu gubwanangi na mulolezi wakutebamina mona yaayi. Bandu habakwaa musosela yowa wakutebamina mona udi wiini wamona ti, gudi muusonya mona yoobe bibibibi.* 2 Yowa kabobo bya mutaŋana na umu sawiila ti: ‹Bandu baki saula bini mwajyo woobe? Buune unibadikile mona yaami, manee ndwakuyitalukila lungi.›

3 Yowa mudindikijyi bya hejya ti: ‹Kabobo waami ndakivula kungujyanga kumudimo, haŋa nate bini? Kudima sikisamuna, na nimona buuvu kuajya. 4 Na yu'a byanda tanga; kumona haŋa habi ngujyejyanga muwuu mudimo, bandu bani tambulanga u byendi byaabu.› 5 Na haya taŋana yumu kwa yumu baaba booso babwa nangi na iyu udi vidi waayi. Haya muyujya mundu wa busu ti: ‹Iyu dyoobe ndinga udi vidi waami?› 6 Yuugu haya mu lunga ti: ‹Mbidi na kiyo kya ngungulu mia ya maŋani.› Yowa gulu tebemena bindu haya mujyongodela ti: ‹Yakana haŋa, kabilo bugula ishoshwa na gusinye ngungulu makumi matano.› 7 Ihani haya yuujya yoowa yungi ti: ‹Na beebe gudi na iyu kya yinga?› Yuugu haya mu lunga ti: ‹Ngidi na kiyo kya misanda mia yi yimo ya fufu dya ngano.› Yuugu gulu tebemena bindu haya mu sawiila ti: ‹Bugula ishoshwa, sinya makumi muanda.›* 8 *Haŋo, yowa kabobo bya mushisha yowa mulolezi sidi buludi, kukidila bubango bwaaye. Manee bandu ba mumusenge bakitanga mauya mabo hamukidi haabo na bubangu kukila bandu ba munyinya.»

9 Yeesu haya basawiila: «Na miimi naba saudila ti muyakane mukukwiteela bamonyi na mona ya kubembela ya muune mumusenge! Kumona timukuboya ti ayiwa kwiinu, Kabejya wamitabuke mukyende kya misha yooso.»* 10 Mundu kibadiibwa mu bindu bishoonono, udi wakubadiibwa byakebee mubindu bikataadi. Na yowa kielongoka mubindu bishonono, udi muelongoke byakebee mubindu bikataadi. 11 Itu kaa, banyu ndamudi batabukibwe mukudindikijya mona ya kubembela ya mumusenge huu, ni naani yimibadila mukudindikijya mona ya kwinikindu? 12 Na itu banyu ndamubu samuna bangu kuyakana batabuke mu mona ya bangi, inaani kibambana kubaabila bindu bidi biinu?

13 «Nda udi mundu wa samunanga kuvubila ngana bavidi badibidi. Manee biibi, wa vulanga yumu na ukeezema yoo yungi. Au wanamatanga udi yumu na kumona yoo yungi busadi. Nda mwakusamuna kumu vubila Kabejya na kuvubila mona kyakekye kindi.»*

14 Haŋa Bafalisayo* hababu telegejya biibi byooso, haba musea Yeesu, kumona bene mukuvula falanga.* 15 Haŋo, Yeesu haya basawiila ti: «Banyu muluvulanga uyimonesha mabusu ga bandu ti mudibaleela. Ila Kabejya guluyukanga madi matima yiinu. Manee byee bindu bilumonanga bandu kalunga na sungu dya butu, Kabejya ukiyakananga mukubimona mbibibibi. 16 Buta* bwa Musa na businye bwa babushi*, ni byelondanga bandu kufikila lusu lwa Yohane luyabika. Kusombela haŋa, Musau Uleela wa Butangala bwa Kabejya* ni ukisaudibwa bobo. Na kila mundu ukita haaye hooso mukuboya ti washweele mu bobwa Butangala*.* 17 Ila nembiibi, ulu na matekee bikila kusidi kusuba. Ila, Buta* bwa Kabejya ndabwakushejyebwa nee ni helufi didimo.

18 Mundu wooso kijyanga mukazi waye na kutundula mwamukazi yungi, wayuke ti waata masenga. Na yowa wooso kitundula mwamukazi wee jyangibwa na mulume waaye, naiye waata masenga.»

19 Yeesu byata lungi huu muele: «Kwenange kabobo yumo. Yowa kabobo wene muku tubila ngubu yilweela na ya muulu ubande. Wene mukuta biandu byakuseelele lusu kwa lusu. 20 Kwene byakebee kauku kamo ketaanibwa Lazalo. Yowa Lazalo wene na tusungu lukoba lwooso wene mukuyakana kukibelo kya kyende kya yowa kabobo. 21 Wevula kudya makombwa mee honanga kunyomokela ku meza ya yowa kabobo; na mbooze byakebee yeviyanga na kulemba tusungu twaye.

22 Lumo lusu, Lazalo byamota, ba malaika* haba kumushwaala tonono na Abulaamu. Nyuma ya haŋo, kabobo naaye bya mota, habamuzika. 23 Yowa kabobo bya suba kwabule kokwa kunengo. Byatundula meeso maye, bya mona Abulaamu mumunonga, na bya mona Lazalo tonono naye. 24 Haŋo, bya bajya muuya ti: ‹Hee tata shami Abulaamu, ungu fiile lusa! jyongodela Lazalo wa tabike songo ya munyu waye mu meema, wangujyajyile mbombo dimo dyameema kwaku boya ti na talajye ludimi lwaami, kumona nasuba kwabule muune mumudilo.›

25 Ila, Abulaamu bya muyaka ti: ‹Ee! ha mwana waami! Hejya ti beebe mu mwejyo woobe wene nakuseelala kwa bule. Ila Lazalo we vuka bobo kusuba. Haŋa leelo iye ndate mukuseelela na beebe ndute mukusuba. 26 Lungi, hamukidi hiinu na bashu kudi kineene kikaata. Kwakuboya ti baaba bakivula kunyomoka kuune kwatudi bayene kokwa kwamudi ndabakusamuna. Byakebee baaba badi kokwa kwamudi, naibo ndaba kusamuna kuva kuuku kwatudi.› 27 Yowa kabobo bya saula ti: ‹Tata itu mbebya, ngikwiaya noobe ti yiisha Lazalo wayene kukilongo kiitu, 28 kumona mbidi nabakwami batanoo, wayeene kukabamanye ngasi ibo na ibo baviyaa kuune mudiino bua dyakusuba.› 29 Ila Abulaamu bya mujyongodela ti: ‹Bakwobe badi na businye bwa Musa na bwa Babushi.** Bayakane mukuteejya beebya bya bukiyakula!› 30 Ila yowa kabobo bya jyongola ti: ‹Ndabeebyo, tata Abulaamu, yeeya ndayikibambana. Ila itu mundu yumo wanyomokela kokwa ku nengo na wayena kwabadi, bifundulujya matima maabo.› 31 Ila Abulaamu byamujyongodela ti: ‹Itu baaba bakwoobe ndabavasamuna kuteejya beebya biki saula Businye bwa Musa na bwa babushi* byabukisaula, ndabakuteejya nee itu mundu wa zikuka kunengo.›»