1 Lusu lumu, baaba baluhaajya mitulu na baluta bubi bangi, bemufinga Yeesu mukuboya ti bamulengeke.* 2 Bafalisayo* na balangidizyi ba Buta* habeemona bebya, habasomba kumuyakula Yeesu bibibibi ti: «Yuugu mundu uki tambula bandu babibabi na mukuyakana mukudya nabo bidyaazi!»*

3 Haŋo Yeesu haya ba teela muele guugu: * 4 «Mundu yumo hamukidi hiinu wayakana na mikooko yaye mia yiyimo, umo hamukidi haayo itu wazizimina, ukibambana kuta kaayi? Miti husama yeya makumi kitema na kitema mubua dyakuyidishila na kuyena kukakeba wowa huumo uva zizimina, mupaka wauyimona! 5 Ishu waumona, wayi shwaala mu mahehe gaayi na eyu muu sehelela kwa butu. 6 Hi sosokeeye kwaaye, utaana bamonyi baaye, na bandu ba tonono naye na kubasaudila ti: ‹Museelele kukumo naami! Kumona namona yeya mikoko yaami yivazizimina.› 7 Unindu nami sawiila ti ni byakebee bikiyakananga Kabejya mukuseelela kwabule itu yidi na bubi yumo wasama bubi bwaaye. Kokwa kuseela kwaye kukiyakananga kukata kukila bandu makumi kitema na kitema basikikeba lungi kufuka kwa tima.»*

8 Yeesu wetetebejya kuyakula lungi ti: «Muteejye lungi: mbini, itu wa mwaazi yumu gudi na bishedi byaayi bya fwalanga umi, itu kishedi kikimu kya mu zizimina, wa tanga bini? Miti ukibambana kumunika taala, na ukomba kyendi bilegela na kukikeba mupaka wa kimone! 9 Ishu wamona kyee'a kishedi, wa taŋanga bamonyi baayi na badi hangondu waayi na uba sawiila ti: ‹Mu sehelele ha monga naami! Manee namona kishedi kyaami kya fwalanga ibu zizimina.› 10 Ngibasaudila ti, ibyeebya biki sehelelanga malaika* ba Kabejya manee ga mundu yuumo wabubi ukisamanga bubi bwaaye.»

11 Yeesu haya boya lungi ti: «Mundu yumo wenange na baana baaye babidi babaabalume. 12 Lusu lumo, yowa wa mwina mubaa baana babidi haya jyongodela shaye ti: ‹Shaami, ngi kuajya ngwabile mbyana yaami mumona yoobe.› Aŋo shaabo haya aba bindu byaye kudi wamukulu na wa mwina.

13 Mafuku ma shoo kukila, yowa wamwina haya hudisha mbyana yaye yooso, haya yena na falanga yaye kukisi kya kulakula. Kokwa haya yakana mukuvundanya yeya falanga. 14 Aŋa heeweye kuvundanya yeya falanga, hakwa nyomokela kamesha mukekya kisi. Naiye hasikikushwa nembidyazi byakudya. 15 Aŋo haya yena kukavubila mundu yumo wakyekisi. Yowa mundu haya mushwala kumakunda maaye ti wakamudindikijyile bizazako byaye. 16 Yowa henda hasikivuleeye kudya nee bidyazi bikidya bizazakoo, bobwa ndakwenee mundu we mwabila beebya bidyazi.

17 Aŋo, hayasomba kuhejya mutima dyaye ti: Hee! ‹Bavubi ba shaami booso bakidya bidyazi na kubisoba, ila miimi haŋa mukumota nazala! 18 Si haluka kudi shaami na nikamujyongodele ti: Shaami naata bubi busu bwa Kabejya na busu bwoobe. 19 Sikibambana ku taanibwa lungi mwana woobe. Ngwate sasa bidi yumo muvubi woobe!›

20 Haŋo, yowa henda somba luendo bya haluka kudi shaye. Kumona wenange ukidi munonga na kyende kyaabo, shaye bya mumona, na bya mufiila lusa. Bya yena kabilo kukamusambitila na kumuyambitila.Henda wezizimina wasambitidibwa na shaye 21 Mwaana waaye haya mujyongodela ti: ‹Shaami, nata bubi kudi Kabejya, na kudi beebe. Kwa biibi sikibambana lungi kutaanibwa mwana woobe.› 22 Ila, shaye bya saudila bavubi baaye: ‹Muvishe yayaya ngubu yileela mumutubile! Mumutubile jyumu ya munyu na makubaati ku maulu!* 23 Muvishe byakebee mutubwatubwa wa ŋombe munune mu shiijye; tuseelele bashu mukudya! 24 Kumona ti mwaana waami yuhu we mota ila wafukuka. Uvanange wazizimina, ila wa moneka lungi.› Habasomba kusehelela.

25 Mukekya kindi mbadi wa tata wene kuma kunda. Aŋa hehalukeeye ndatee tonono na kyende, bya teejya kijyeejye kya simo na singi. 26 Haya taana yumo muvubi wa shaye, haya muyuujya ti: ‹Kukyende kudi kaayi?› 27 Yowa muvubi haya muyaka ti: ‹Mwinawoobe ni waaluka, na shoobe wamushijyila mutubwatubwa wa ŋombe yinune, kwa kumona ti mwaana waaye waaluka mwejyo.› 

28 Yowa mukulu bandu hakeaŋa bya zinguka, na kubenga nengushwela kukyende. Shaye bya nyomoka haaza na kukwihaya naye washweele kukyende. 29 Ila mukulu bandu haya yaka shaye ti: ‹Teejya bangu! misha yabule yiiyi yangi kuvubila, nee lumo lusu sikikolemanga mubyooso bikinguboya beebe. Ila nembiino ndwengwabila nee mubamba wa mbuzi ti miimi na sehelele na kudya nabeezi nami! 30 Ila bobwa bwava mwana wobe, yuhu va vundanya bindu byobe byoso mubabakazi bamasenga wasosoka, wamushijyila mutubwatubwa wa ŋombi yinune!›

31 Aŋo shaye bya mujyongodela ti: ‹Hamwaana waami! Beebe udinaami kukumo mafuku mooso, na byooso byambidinabyo mbyobe bobo. 32 Miti yivatuajya bashu kukumaana na kusehelela! Kumona yuhu mwinawobe uvanange wamota, ila wafukuka. Wene buzizimine, ila wamoneka›»!