1 Nyuma ya bebya, Yeesu bya yakana mukunyunga mubisi na mumikola kuyee kusaula mauya ma Kabejya. Baba mitonge* kumi na yibidi be yenanga naye. 2 Na bamo baabakazi be booshebwa mizuka na Yeesu na kufuudibwa lufu, beyenanga naye. Hamukidi habaa baabakazi kwene Malia kitaanibwa (Malia Magdalene), yowa Malia Yeesu wemushejya mizuka musambo. 3 Yohana mukazi wa Kuza, yowa Kuza ni kitalukila bandu bakuvuba ba kyende kya Helode; Suzana na baabakazi bangi. Baaba baabakazi bene mukuvubila Yeesu na mitonge baaye na bindu byabo benikindu.

4 Bandu babule benyomokanga mu mikola mbalambala na bekumanikanga kudi Yeesu. Naiye bya basaudila huu muele: 5 «Mundu yumo weyena kukunda dyaye mukumiana tumuka twaye. Henangiye muku miana totwa tumuka twaye, tumo tumuka hatwaonena hangondo ha muzila. na bakila zila haba sikitufinya na tuni hatwa tudya. 6 Tumuka tungi hatwaona mumavu mamabu. Na kisha itwo kumena hatwa nyuma kwakukushwa meema mumateke. 7 Na totwa tungi tumuka hatwaonena hamukidi hameeba. Na mama meeba hameemena kukumo na totwa tumuka hamafinga totwa tumuka. 8 Lakini tumuka tungi hatwaonena mumateke malweela. Hatwamena na kuhaa mitijya: kila wowa hawa haa tumuka miamia.» Kisha kuwa kuyakula bebya, Yeesu byabajya muuya na kuyakula ti: «Yidi na makushu makuteejya wateejye!»

9 Haŋo, mitonge ba Yeesu haba muyuujya ngingu ya wowa muele. 10 Yeesu byaba yaka: «Banyu mwahebwa mbejya ya kuyuka fyamino dyabutangala bwa Kabejya*; ila kubangi bandu ndabeebyo,

ngiyakula mumiele kwakuboya ti: ‹Balole ndabamona,

na bayakane mukuudikijya ndabateejya.›»*

11 Na lungi Yeesu bya yakula ti: «Ngingu ya wowa mueli ni yiiyi: Tumuka mauya ma Kabejya. 12 Totwa tumuka tweona muzila tukimonesha baba bandu bakiteejyanga Mauya ma Kabejya. Naiwo Musimbusimbu waava na ku shejya Mauya mu matima maabo ngasi batabuka na kufuuka muma tima maabo. 13 Totwa tumuka tweonena mumateke madi na mabu tukimonesha baba bandu bakiteejyanga Mauya ma Kabejya na kumatabuka na tuseo. Ila ndabadiyakananga na mizi munda mwaabo. Bakitabuka mukindi kishenene bobo, na itu balabudibwa basama butabuke bwabo. 14 Totwa tumuka tweonena mumeeba tuki monesha bandu bakiteejya Mauya ma Kabejya. Ila mulwendo lwabo bakifingibwa na mauya mabule na kukeba falanga, na kalabwa kabuune buyakane, naibo ndabakibutula tumuka tudi bunyingitile. 15 Ila totwa tumuka tweonena mumateke malweela tukimonesha baba bandu bakiteejya wowa musau wa Kabejya, na kuukwata munda mwamatima maabo na kumateejya, naibo balembelejya kwabule babutula bimuka.»

16 Haŋo Yeesu bya boya: «Mundu nee yumo ndakimunika katoditodi kwaku fukikila na ndamba ao kwakubika haasi hatanda. Ila ukikabiika haulu hakibikilo kwakuboya ti bandu habakishwela munda mwakyende bamone kimunyi. 17 Kumona kindu kyoso kyefyamishibwa kimoneka hululu. Na tufyongofyongo twooso twetebwa tumoneka mukyambala. 18 Kwabiibi, mukwikengeyele mu maama mamukiteejya! Kumona yowa yidi na kindu, ni kiebwanga kindu kingi. Ila yowa sidi na kindu, na kekya kikiningeye kuyakana nakyo, kikuzudibwa.»

19 Kindi kimo naajye na Yeesu na bakwaye beeyena kudi Yeesu, ila ndabeesamuna kutuluka tonono naye kukidila kiandu kyabandu. 20 Haŋo habamuvishila Yeesu musau ti: «Najyobe na bakwobe badi haaza bakivula kukumona.» 21 Ila Yeesu bya saudila bandu booso: «Najyami na bakwami mbaaba bakiteejyanga mauya ma Kabejya na kumakwata.»

22 Lusu lumo, Yeesu webanda mumutumbu kukumo na mitonge baye. Bya basaudila ti: «Tuyabuke ziba twene muyeŋongo.» Haŋo byaba somba luendo.

23 Mukindi kyabeyenanga muluendo lwabo, Yeesu bya kwatibwa na tulo, bya tandabala mutulo. Mukivuku, muee unyumine hawayakana mukutenga haulu haziba; mutumbu hawasomba kuyula meema na habayakana mulufu. 24 Baaba badingisi* ba Yeesu haba tuluka tonono naye, haba mubusha, mukuyakula ti: «Mulangidishi, Mulangidishi twamota!»

Yeesu bya buuka, bya hanunukila wowa muee na mama mabimbi; muee hawatalala, hakusite nyaa! 25 Haŋo Yeesu bya saudila badingisi* baye: «Butabuke bwiinu budi kuni?» Ila ibo haba habakanya na kuteejya moyo, haba yakana mukukwiyujyujyena ibokwaibo; «Yuu ni naani bangu, wasaudila muee na mabimbi, naibyo byamuteejya?»

26 Nyuma ya beebyo Yeesu na badingisi baaye haba yena muluendo, habatuyuka na kutukama mukisi kya Bagelasi, kikikwilolejyena na Galilaya muyeya ŋongo ya ziba. 27 Haŋa hesala Yeesu haŋongo, mundu yumo wawowa mukola weva kwakukumaana na Yeesu. Yowa mundu wene buyudibwe na mizuka, naiye mafuku mabule ndetubila ngubu na ndetandabalanga mutulo mukyende, ila wetandabalanga mutulo kumifungu. 28 *Haŋa hemoneye Yeesu, byakwikasa haasi busu bwaye na kubajya muuya na kuyakula mu muuya ukata ti: «Beebe Yeesu Mwana wa Kabejya yidi haulu, kyauki keba kwaami ngikayi? Nakwiaya noobe ndungusubisha!» 29 Gubu boya biibi manee Yeesu gubwanangi muu jyanga gugu musimbusimbu wahumi munda mwa yuugu mundu. Gugu musimbusimbu gubwanangi mumu banda bihindi byooso. Nangi byeebya bandu byababu uganga na miyololo ya biela na ingungudi koomu talajya, haboobwa, mweena lusu gubukala miyololo ya biela na uhandanga ingungudi. Lungi musimbusimbu hawa mutaki'a u buga dishi bandu.

30 Ihani Yeesu haya mu yuujya: «Zina dyoobe ninani?» Eyu haya mu lunga, «Zina dyaami ni ‹Muyogo› Manee misimbusimbu ya butu yibwa nangi munda mwaayi.»* 31 Wuuwu musimbusimbu hagu kilu yigaaya udi Yeesu ndiba taashanga munda mwa ibenga* kyatagadi kya Gehena.

32 Mu dyeedya buga mu bwanangi muyogo wabutu wa ngulubi*. Ihani guugu musimbusimbu hawa yi gaaya udi Yeesu washeedi mu muyogo wa ngulubi. Na Yeesu haya ba tabwiila. 33 Ihani *yeya misimbusimbu haya huma munda mwa yuugu mundu, haya shweela munda mwa yeeya ngulubi. Na yeeya ngulubi haya gulumu'a haasi wa ibanjwa ilaila haya kwaa moto'a mbunduu, munda mwa iziba na kumota.

34 Babwanangi muu dindijya ngulubi hababumona biibi byooso bibukila haba jyonda, na uweena amwanga lajyanga guugu mwiizi u bandu babwanangi u moola na u bibebe. 35 *Haboobwa bandu haba huma haba weena kulola biibi Yeesu byee buta. Haŋa habufi'a nena na Yeesu, habamona yoowa gubwanangi na misimusimbu, yalozo'a munda mwaayi, wa yaana hangondo wa Yeesu, mutubidi ngubu, na ndidi na nyinyi yilegele. Baaba bandu haba mona mooyo. 36 *Baaba babu mumona yuugu mundu na meesu gaabu, haba basawiila bandu bangi, byeebya yoowa mundu byebwa nangi na musimbusimbu na byeebya byeebu fuu'a.

37 *Haboobwa bandu booso munda mwa kyee isi kya Bagelasi haba tiina. Ihani habamu sawiila Yeesu wabagadi mu isi kyaabu. Manee babwa nangi na mooyo wabutu. Ihani Yeesu haya banda mutumbu haya weena. 38 *Yuugu mundu gubufuu'a hekilu vula uweena hamonga na Yeesu. Haboobwa Yeesu haya keezema na haya mu sawiila: 39 «Galu'a u yendi kyoobe na abasawidi byooso Kabejya byeebu kuteela.»

Ihani, yuugu mundu haya galu'a na haya weena asawilanga bandu mu moola wooso bindu byatagadi Yeesu byeebu muteela.

40 *Haŋa Yeesu heebu yabu'a lungi mugela wa bubidi wa iziba, igandu ibwa nangi mumu dindila hakya mu tambula bilegela. 41 *Mukyanga kyee'a ihindi, mundu yumu wabalu taŋana Yailo, gubwa nangi muu tebemena sinagogi*, haya vueya na haya hona u magulu ga Yeesu, hee kilu mugayidila Yeesu tii, weenangi u yendi kyaayi, 42 *menee gubwa nangi na musi'a wa lufu mukuhumina.

Gubwa nangi mwaana waayi yugumu ye, gubwa nangi na misha umi na yibidi. Haŋa Yeesu hebwa nangi ayinanga u yendi kya Yeilo Igandu kyatakya kya bandu ibumukumba.

43 *Mu kyee igandu, ubwanangi wa mwaazi yumu gubwanangi na lufu loo susa muloha munda mwa misha umi na yibidi, haaya tuula mona yaayi yooso muu yi fuhulula, ubabuki, babuki ndababu mu fuula! 44 *Haboobwa hee kyee nanga amushenenanga Yeesu umugongo waayi, haya kwa lengela songo ya ngubu ya Yeesu hanga haŋa muloha gubwanangi mumu huma hawa kama.

45 *Yeesu haya yuujya binu: «Inaani wani lengela?» Bandu booso haba tuna. Ihani Petelo haya boya: «Ngana, mitii gudi mumona igandu kya bandu baku nyungalala na bakufinga mugela gooso!» 46 *Ihani Yeesu haya boya: «Udi mundu yumu gubu ni lengela manee namona bu tangala bwaami bwanihuma.» 47 Yuugu wa mwaazi bwebu yu'a tii, Yeesu wamuyu'a na wayu'a byeebya byee buta, haya yiitutula eyu munindu, eyu muu zeeza, haya hona u magulu ga Yeesu. Haya sagula mabusu ga bandu booso, ibumutaki'a ulengela ngubu, na boobwa bwebu lengela ye, haya fuu'a hanga haŋa. 48 *Ihani Yeesu haya mu sawiila: «Musi'a waami, ulungila koobe kwaku fuula. Inanga bilegela.»

49 *Hanga haŋa Yeesu eyu muu sagula, hakwa vueya muvubi wa Yailo u humina u yendi kya Yailo, na haya mu sawiila tii: «Edi, musi'a woobe womota! Nangu musuvya mulangidijyi!» 50 Boobwa Yeesu bwebu telegejya biibi byaba mu sawiila, haya mu sawiila Yailo: «Nangu tiina. Lungila ye, mona musi'a woobe wa fuu'anga.»

51 *Haŋa Yeesu heebu fi'a u yendi kya Yailo, ndibu vula bandu booso ushwela mu yendi, ila, Petelo na Yakobo na Yohana hamonga na shaayi na najyaayi na yuugu musi'a.* 52 *Mu ihindi kii'i, bandu booso babwangi munda mwa yendi babwa nangi mumu didila mwaana. Ihani Yeesu haya ba sawiila: «Musami udila. Yuugu musi'a ndikyee mota, watandabala ye!» 53 Na ebu haba kilu museha Yeesu, manee babuyu'a tii mwaana womota. 54 'Ihani Yeesu haya mu waata kuu bo'o, haya tungula muhuuya na uboya: «Musi'a, buu'a!» 55 Hanga haŋa, tima dyaayi hadya galu'a na haya talu'a hanga haŋa. Na Yeesu haya ba sawiila tii, bamu gabidi bi yaazi. 56 *'Ihani shaayi na najyaayi haba kanya unindu, ihani Yeesu haya ba nyaajya tii, ndaba sawilanga mundu nangi yumu biibi bibuteebwa.