1 *Yeesu henangiye mulubunga, haya nyujya meeso mubandu booso haya mona beebya tubobo tukituula salaka* yaabu munda mwa kinyamanda. 2 Haya mona byakebee mwadyangu yumu asuvi haya tuula tufalanga tubidi twa mona moomwa mukinyamanda. 3 *Haŋo, Yeesu haya boya ti: «Nami sawiila umindu: yuugu mwadyangu asuvi ni wa tuula salaka* ukila bandu booso. 4 *Manee bandu bangi booso babu tuula byeebya bindu bisivane byabusadi mumona yaabo. Ila yuugu mwadyangu asuvi watuula byooso bivanangiye nabyo kwakuyakana kwaye.»

5 Bandu bamo bene mukuyakula kukidila lubunga lwa Yelusalemu. Bavane mukuboya ti lwalukibwa bileela na mabu maleela kukumo na bindu bingi bilweela bye tula bandu kudi Kabejya. Ila, Yeesu haya ba sawiila ti: 6 «Maama mooso mamukimona kuyakana lusu luvanga nda koo shagala abu heegulu wa abu dingi, bindu byooso bya bihongolebwa.» Lubunga lwa Yelusalemu

7 Ni baaba bandu habamuyuujya Yeesu ti: «Mulangidijyi, maama mooso miiva hakayi? Na ngingulungulu kai kitumoneshanga ti matonanana na kunyomokela?»

8 *Yeesu haya lunga ti: «Mukwikengeyele, mundu nangi yumu ndimi zimbanga! Kumona bandu babutu ba vueyanga muzina dyaami. Biyakana mukuboya ti ibo ni Kilisito!* Nakuboya ti kindi kyabambana. Ila banyu ndamubajyanga. 9 *Haŋo, muteejyanga bandu mukuyakula kukidila kiaya na kukidila luvundu ndamuyakana mukutiina. Kumona maama mooso makibambana kunyomokela bangu, ila kekya kindi kyamongo kiyakana ndawesosoka.»

10 *Haŋo Yeesu haya ba sawiila ti: «Issi imu kya lwanga na issi kingi. Butangala bulwa na butangala bungi. 11 *Kuyakana kandengenya mumusenge wooso. Na kuyakana zala na kimbunga mabua mabule. Na mbinguni kunyomoka shanya ya kuhanunusha na yakutiinisha bandu kwa bule.

12 *Ila, busu bwa maama mooso kunyomokela, bimu watanga na kuba suvya. Na Bimishwaala kulamuna ku masinagogi*, na kubakasa muzitikilu. Na Bami filanga mabusu ma bakolo babutangala na bakulu ba kisi kukidila zina dyaami. 13 *Muyeya zila ni yamuyakana mukuyakula bebya byamukiyuka kungidila miimi. 14 *Haŋa yamuki bambana kuyuka biibi: Ndamuyakanga mukukwisubisha busu bwa kindi ti mulamuna kaayi. 15 *Kumona jyaami mibunga ni yimiabila mauya ma nyinyi ma muyakana mukuyakula. mupaka kindi balwishi biinu ndabakusamuna kuyaka ao kubenga maama mamuyakula. 16 Nee bashiinu banyu, na bakilongo kiinu, na bamonyi biinu, naibo bimutuula busu bwa bakulu. Na bamo hamukidi hiini bilamunibwa kumota. 17 *Bandu booso bimubenga banyu kungidila miimi. 18 *Ila, nembebya ndakudi lufuki neelumo lwa mishu yiinu luzizimina. 19 Muyaani na kulembelejya, kumona muyeya zila ni mwamufula mwejyo wiinu.»

20 Yeesu bya yakula lungi ti: «Haŋa, hamumona mukola wa Yelusalemu wanyungibwa na balonga-buvadi, haŋo muyuke ti kindi kya kuongolebwa kwa huu mukola kwa tonanana. 21 Kwabiibi, mukekya kindi bandu biyakana ku Yudea bajyukile kubituulu. Na baba biyakana munda mwa mukola wa Yelusalemu banyomoke mwakale. Na baba biyakana kubisooso ndabahaluka lungi.

22 Kumona mama masu, miyakana masu mi misubisha Kabejya bandu, kwakuboya ti mooso mesinyibwa mabambane*. 23 Maama masu, miyakana kusuba kwabo babakazi biyakana na mayimi na baba biyakana mukunyamwisha baana mu mama masu! Kumona kuyakana na kusuba kukata mukisi, na kiizi kya Kabejya kimoneka kubaba bandu. 24 Bamo bandu biyaibwa na luete, na bangi bikwatibwa buika mubisi bwoso; na kisi kya Yelusalemu kiyatidibwa na bandu ba bisi bingi basidi ba Yaudi, mupaka bebya bibambana kindi kyabo kyakunyomoka.»

25 «Yeesu bya yidididye na kuyakula ti: Kuyakana byakuanunusha ku yuba na ku mwango na tumwinuulu. Hano hasi hayuba, bandu booso biyakana mukusuba kukata na kuobama kukidila titi dya muhee na ya mabimbi ma meema. 26 Bandu babule bikala kakuzi kukidila moyo, mukulodela mama mivanga muune mumusenge; kumona byooso bidi na butangala mbinguni butenganya. 27 Haŋo, bandu bimona miimi Mwana wa Mundu kuviyanga aulu hatimba, yidi na butangala na mbunda yi kata. 28 Haŋa hisomba mama makumo kutebwa, mutaluke na mutundule mishu, kumona kindi kyakufuka kwinu kwatima kwa tonanana.»

29 Haŋo Yeesu bya ba teela wuu muele: «Mulole bangu muti wa mutini na miti yingi yooso!  30 Haŋa hamukimonanga mabizi maamo ma tombela, mukiyuka ti gyoo dyasala. 31 Byakebee, hamumona maama makumo matebwa, muyuke ti Butangala bwa Kabejya bwa tonanana. 32 Kwinikindu ngibasaudila ti, mama makumo mooso mibambana mukindi kya bamo bandu ba kiiki kilongo kya leelo ndabe mota. 33 Ulu na musenge bikilanga, ila mauya maami ndama kukila nee lumo.»

34 Yeesu byajyongola lungi «Mukwikengeyele, ti matima miinu ndama nemenenwa bobo na kalabwa, bulevi na ndamunanama na mwejyo wiinu. Itu ndabeebyo lolwa lusu lwa kualuka kwa Kilisito lumuvilanga mukivuku, 35 Bidi bebya biki subukanga muteo. Kumona lolwa lusu luviila bandu booso bamuune mu musenge mukivuku. 36 Muyakane na mbambi na kuajya Kabejya kindi kyooso. Mwaata biibi muyakane na butangala bwakukila nyaa mumama mooso minyomokela, na kutaluka busu bwa miimi Mwana wa Mundu.»

37 Mukekya kindi kyamunyinya, Yeesu we langidila bandu mu Lubunga; ila bufuku weyenanganga ku kituulu kya Mizeituni na kukatandabala kokwa. 38 Na mukisi pupu, bandu booso be yenanganga kulubunga kwaku muteejya.