1 *Lusu lumu lwa Sabato*, Yeesu hayaweena udi ngana yumu wa Bafalisayo* kuudya biyaazi. Bandu bene mukekya kyende bemulola sokosoko mukuboya ti bamone biteeye. 2 Mabusu ga Yeesu ubwanangi mundu yumo na lufu loo yula mubidi. 3 Yeesu haya yuujya balangidijyi ba Buta* na Bafalisayo* ti: «Buta* bwiitu yikihananga zila ao yikibenganga kufula mundu lusu lwa Sabato?»* 4 Ila, habakwihumina nyaa Yeesu haya lengela yowa mubeele, byamufuula na bya musaudila wa yeene byaaye. 5 Ni, Yeesu haya bayuujya lungi: «Ni naani hamukidi hiinu itu mwaana waye ao ŋombe yaye yaonena mukineene kidi meema lusu lwa Sabato* wakushwe kujyukila kukayinyomosha nee yayakana lusu lwa Sabato*?»* 6 Ila ndababu mona huuya dyoo sagula.

7 Yeesu haya mona bebya bandu babu taŋanibwa badi muku kwisobolela bua dya busu. Ni byabaabila diidi langu: 8 «Ishu mundu wa kuloba ku halusi, nangu yakananga ku ngeka ya mabusu. kumona hangi kukibambana kuva yungi va lobebwa yidi na kineemo kukukila.* 9 Na yowa yidi na kineemo kukukila wa sosoka, yowa vamiloba banyu booso babidi ukibambana kukujyongodela ti: ‹Samina yuhu mundu bua.› Haŋo uteejya buuvu ya kuyena kukuyana mungeka ya nyuma. 10 *Haboobwa ishu bakuloba, yenaa ukayakane mungeka ya nyuma. Haŋo, yowa vakuloba uviyanga na kukujyongodela ti: ‹Mwizinami, viyaa kuku kumbala.› Haŋo, uvuka kineemo busu bwa bandu booso baukidya nabo. 11 Manee, yoowa wooso wayi bajyanga, usajyangwa. Ila yowa wooso kikwishajyanga, iye ubajyibwanga.»*

12 Ihani Yeesu haya sawiila yoowa gubu muloba: «Haŋa haukihaana bidyazi bya kiandu kyakuseelela bya munyinya, ao kyoolwa, nduyakana mukuloba bamonyi nobe bobo, aubabushi bakilingo kyoobebobo, bashobe, ao tubobo twizinobe bobo. Kumona itu waata bebya, ibo byakebee bikuloba kudya kwaabo mukualusha maama ma weebateela. 13 Ila, haukita kiandu kyakuseelela, yakana mukuloba tusuvi, na badi na binema, na bibula na bakufu.* 14 Haŋo, tuvuka fiyujyi kumona baaba bandu ndabadi na kindu kyakukualushila. Ila Kabejya ukualushilanga haŋa bakita malweela habi fukukanga.»*

15 Mundu yumo wedyanga bidyazi na kukumo na Yeesu hewetejyeye maamo, bya mujyongodela ti: «Buuya mundu yowa yidyanga bidyazi mu Butangala bwa Kabejya!*»* 16 Yeesu haya muyaka kukidila wuu muele ti: «Mundu yumu gu buta igandu kyatagadi, haya loba na bandu ba butu.* 17 Kindi kya kudya bidyazi hakyebambana, haya yiisha muvubi waaye wakasaudile baaba belobebwa ti, ‹Muvaaye sasa, kumona bindu byooso ndakite tonaa.›* 18 Ila, kila yumo hamukidi habaaba be lobebwa bya somba kusaula ngikai kivamuzikila ti ndafikanga. Wa busu byamujyongodela ti: ‹Naula kunda, buune yikinguajya kuyena nakadiyengeele. Ngikwiaya noobe, monene lusa!› 19 Yungi bya jyongola: ‹Naula ŋombe kumi* ya kuvuba kumba. Biino nayena kukaileka bangu na mone itu yisamunanga kuvuba. Ngikwiaya noobe, monene lusa.› 20 Yungi byakebee byajyongola ti: ‹Na tundula akeano. kwa biibi shakusamuna kuva.›

21 Yowa muvubi byahaluka kudi vidi-nyambi waaye. Bya mujyongodela mama makumo mooso. Yowa vidi waaye hevateejyeye beebyo, bya zinguka jyobijyobi. Ni bya mujyongodela yowa muvubi waaye ti: ‹Yena yayaya mumazila makatamakata na masheenene ma mukola, na mukavishe haŋa tushuvi, na babinema, na mikufu na bibula.› 22 Ni, yowa muvubi byahaluka na jyongola ti: ‹vidi-nyambi, mama mauva nguzaudila naate naata. Ila nembimbi kukidi bua.› 23 Yowa vidi-nyambi waaye byajyongodela yowa muvubi waye ti: ‹Yena lungi muzila yamikola yi shenene na mumazila ma makunda. Bandu booso baumonanga, uba humbe kwakuboya ti bashweele kwaami, mukuboya ti kyende kyami kyayule bandu. 24 Kwinikindu na mujyongodela ti ndakudi nee yumo hamukidi ha baaba bambivalobebwa yidya bidyazi byami.›»

25 Lumo lusu, bandu babule bejyanga Yeesu. Byabakibukila na kubasaudila ti: 26 «Kivula kungujyanga, wanguvule kukila shaye na naajye, na mukazi waaye, na baana baaye, na bakwaaye na misadi yaye. Lungi wanguvule kukila mwejyo waaye iye mwinikindu. Itu ndabeebya ndakusamuna kuyakana dingisi* waami. 27 Mundu sivasamuna kushwala musalaba* waye, na kunguvula, ndakusamuna kuyakana dingisi* waami.

28 Itu yumo hamukidi hiinu, ukivula kuluka mushumba wa kyende, hikimuajya wayakane bangu, wamone itu husamuna kuvuka mona yaiye kuvubisha kwa kuwa wowa mudimo na kuwididijya. 29 Ila, itu wasamuna kuluka mabu mahaasi, kisha wakushwa kuluka kekya kyende, bandu booso biyakana mukukimona, biyakana mukumusea 30 Mukuboya ti: ‹Yuu mundu uvasombesha kuluka kyende, ila wakushwa kuwididijya mudimo.› 31 Itu kolo yumo ukivula kulwa na kolo yungi, yikimuajya wa yakane bangu, wamone ti kukidila mwejyo wabalonga-buvadi baaye elufu kumi badiye nabo, ukibambana kuhima yowa mwizinaye yidi na balonga-buvadi elufu makumi mabidi. 32 Wamona ti ndakusamuna, ukibambana kuyishila yowa mwizinaye mukizi haŋa hekidiye kulakula mukuboya ti wamuyuujye jyike namuna yaibo kuta mukuboya ti nyaa dya yakane hamukidi haabo. 33 Na banyu mbyakebee! Ndakudi mundu hamukidi hiinu yisamuna kuyakana dingisi* waami itu ndee sama byooso bidiye nabyo.»

34 Yeesu bya yakula lungi ti: «Mungwa ukiyakananga kindu kilweela. Ila wazizimisha kisa kyawo*, ngikaayi kyabaki bambana kuta munda mukuboya ti waalushe lungi kisa? 35 Wuuwu mungwa, ndaukidi na mudimo nee humo, yayakane kumateke ao kumboleo. Bakiukasanga haaza. Yidi na makushu makuteejya, wateejye.»