1 Mu ihindi kyee'a bandu bamo beeva, habasaudila Yeesu kukidila bandu ba Galilaya baaba be yaishibwa na Pilato haŋa habene mukujyijya nyama yaabo ya kutuula kudi Kabejya. 2 Ni Yeesu haya ba yujya ti: «Muluninga tii, baaba ba Galatiya babumota babwanangi na bubi ukila ba Galilaya baaba booso?* 3 Ndabeebyo! Ila nabasaudila ti ishu na banyu nda mubufunduluka mububi bwiinu, na banyu mumota bobo byakebee naibo byabeemota.* 4 Na mu moola wa Silolwamo, kyendi kyatagadi ibu hulwiila bandu kumi na muanda ha bamota. Haŋo, muluninga tii ni ebu yega, babwa nangi na bubi ukila baaba booso balu yaana u Yelusalema? 5 Nda beebo! Ila Unindu namisawiila na banyu ishu nda mubu fululujya matima miinu, banyu booso mwa titiminywanga bobo bidi ebu.»*

6 Ni Yeesu haya ba teela muele hungi ti: «Mundu yumu gubu kuna muti wa Tini mukunda dyaye dya mizabibu*. Lumo lusu, haya weena wakaola bimuka kwaudi, Ila ndee banga kindu kwaudi.* 7 Haŋa haya mu sawiila muvubi waye wa dedya kunda ti: ‹Lola! Nda yite sasa misha yi satu i yoota guugu mutini, haboobwa shiluheta indu kwaudi. Ugu tembe! Manee gudi mu vundaŋanya maavu busadi.›* 8 Ila, yowa muvubi wa unda haya mu sawiila ti: ‹Vidi, usama bangu lungi musha gugumu, na miimi nagu yihi dilanga na ugu teela maavu galegela.* 9 Hangi watanga mimu'a musha wa vueyanga. Itu nda gubuta bimuka wagu tembanga.› »

10 Lusu lumu lwa Sabato*, Yeesu gubwa nangi muu luula bandu mu Sinagogi*. 11 Mu dyeedya Sinagogi* mwenange mwamukazi wenange na lufu. Yowa mwamukazi wene waata misha umi na mugandaa mukusuba na musimbusimbu. Woowa musimbusimbu wene wa muvunga muongo, na ndibu samuna lungi ugolo'a.* 12 Haŋa Yeesu hebu mumona, haya mu taŋana na haya mu sawiila ti: «Yeeya! Wafuudibwa lufu lwoobe.» 13 Yeesu haya mu hibiila mabo'o gaayi hanga haŋa howa yeeye haya talu'a teba hee kilu mu tumbijya Kabejya.*

14 Ila mukulu wa yeya sinagogi* haya zingukila Yeesu, manee Yeesu wa fuula mundu lusu lwa Sabato*. Haŋo haya sawiila kyee'a igandu 'ibwa nangi momwa: «Kukiyakananga masu mutubaa woota miambu. Kwabiibi, mumaama masu ni mamukibambana kuviyanga kufudibwa lufu lwiinu, ila ndati lusu lwa Sabato.»**

15 Ila, Vidi-nyambi haya mu lunga ti: «Habanyu bandimi yibidi! Ko lusu lwa Sabato* kila yowa hamukidi hiinu hukilekelanga punda ao ŋombe yaaye kunyomoka mu mukumba, na kuyenakuyinywisha meema.* 16 Yuugu mwamukazi ngwa kilongo kya Abalahamu ila musimbusimbu we zitika mumisha kumi na mugandaa. Buune ndebambana wazitudibwe lusu lwa Sabato*?»*

17 Yeesu heweye kuboya biibi, balwishi baayi booso habamona buuvu. Ila bangi bandu booso, ibo bene mukuseelela mahuya mooso makuhanunusha meneeye mukuta.*

18 Haŋo Yeesu bya yakula lungi ti: «Butangala bwa Kabejya* bukifandakana na kaayi? Na tukibambana kubuyuudishwa na kaayi? 19 Boobwa Butangala bukifandakana bidi kamuka kasheenene kahaladali, kekuna kukunda dyaye. Kaka kamuka haka mena hakava muti. Tuni hatwaluka maishwa maato mumatabi maaye.»

20 Yeesu byayakula lungi ti: «Butangala bwa Kabejya*, ngibambana kuyudisha na kaayi? 21 Buubu Butangala* bukifandakanishwa na kuhaa* kwe buula yumo mwamukazi, byausobakanya na fufu dya bule, mupaka kokwa kuhaa* hakwa yudisha dedya fufu dyooso.»

22 Yeesu weyidididye na luendo lwaaye kuyena ku Yelusalemu. We yenanga kulangidila bandu mumikola yikata na mutukola. 23 Mundu yumo byamuyuujya ti: «Ha Vidi-nyambi, bandu bifukanga matima mbashoo bobo?» Yeesu bya muyaka ti: 24 «Mudinge kushwela kukibelo kimomakane. Kumona ngibasaudila byakwinikindu, bandu babule bieleka kushwela mwakidi, ila ndabakusamuna.

25 Haŋa hiyakaneeye mwini kyende wataluka na kuyizila kibelo, banyu muyakana mukutaluka haaza. Na musomba kukumuna kukibelo na kuboya ti: ‹Ha Vidi-nyambi, utuyuzuludile kibelo!› Na iye ubayakanga ti: ‹Banyu sikibayuka kwamuvanga!› 26 Haŋo musomba kuyakula ti: ‹Bashu ni baaba beedya na beekubila kukumo noobe. Lungi welangidila bandu mumazila mamikola yiitu makatamakata.› 27 Ila iye ubayakanga ti: ‹Banyu, sikibayuka muva viila kuni, mutuluke munonga naami, banyu booso bakita bubi!›

28 Haŋo mumonanga Abulaamu, na Isaaka na Yakobo na babushi* booso mubutangala bwa Kabejya*. Ila banyu bimukasa haaza. Kokwa mudila na muta ngekenyi. 29 Bandu binyomoka kunyomokelo dya yuba na kokwa kumulaa yuba, na kunyomoka ku kumbala na kumuongo. Baaba bandu biyakana mukudya mu Butangala bwa Kabejya*. 30 Mulengeke bangu! Bandu bamo badi bamongo, biyakana ba busu. Na badi babusu, biyakana ba mongo.»

31 Mukyakekyee kindi, bamo Mafalisayo* habatuluka tonono na Yeesu na kumujyongodela ti: «Hezela haŋa, ukwiyiile mudingi bua! Kumona Helode ukikeba wakuyae.» 32 Yeesu byabayaka: «Mwene mukasaudile yowa mulende ti leelo na mweesa nijyanga misimbusimbu na kufuula badi na lufu. Na mweesa waaye ni yakana naawa mudimo waami.»  33 Ila yikinguajya kuyidididye na luendo lwaami leelo, na mweesa na mweesa waaye. Kumona ndayikisamunika mubushi* wa yaibwe mumukola hungi ila mu Yelusalemu bobo.

34 «Ee bandu ba Yelusalemu! Banyu mukiyanga babushi*. Na bandu ba Kabejya baki bayishila, mukibayaa mukubakasila mabu. Mbendo ya bule ngivulanga kubafukikila bidi zoolo yikifukikila baana baye kuusi kwabibabwa byaye! Ila banyu ndamwevula! 35 Buune muteejye bangu! Kyende kiinu kishaala mamba. Ngibasaudila byakwinikindu ti ndamwakungumona lungi, kufika mukindi kya muboya ti: ‹Wafiyudibwe yowa vanga muzina dya Vidi-nyambi!›»*