1 Hayefika lusu lwa yinga mukisi pupu, baaba babakazi bahabukila kumifungu, bushwaale maani na malashi*mabavalungakanya. 2 *Baaba babaazi haba heta abu kabaga shibwa heegulu wa kwanywa kwa mufungu. 3 Ila *habeshwela munda mwa mufungu, ndabeemona kitumba kya Yeesu. 4 Kekya kindu kye baanunusha kwabule. Habeenange bakidi hanunuka hakeaŋa bandu babidi badi na ngubu yitokatoka kabisa habataluka tonono nabo. 5 Haŋo, kukidila moyo, baaba baabakazi habashajya meeso maabo haasi. Ila baaba bandu hababasaudila ti: «Kwakai mukikebela mundu yidi mwejyo hamukidi habamote? 6 *Ndidi lungi hanu, wa fukuka! Muejye mauya mebasaudileye haŋa henangiye ukidi kokwa Galilaya. 7 *Miti weboya ti: ‹Yikinguajya miimi Mwaana wa Mundu na tudibwe mubiboko bya bandu babibabi! Bingulamika kumusalaba, ila masu masatu kisha kumota kwaami, nifukuka.›»

8 *Haŋo, baaba baabakazi ni haba heejya maama mauya mebasaudila Yeesu. 9 *Habahezela kuwowa mufungu, habayena kukasaudila mitonge* kumi na yimo ba Yeesu na bangi bandu booso wowa mukizi. 10 *Babakazi besaula wowa mukizi kudi mitonge* ni baaba: Madiya wamukola wa Magadalene, na Yoana, na Maliya naajye na Yakobo, hamonga na babaazi bangi. 11 *Ila mitonge* benijya ti wowa mukizi wa baaba baabakazi ngwabusadi, na ndabeutabuka.

12 *Ila Petelo iye byataluka yoko, na kujyuka kabilo kumufungu. Hekajyeye kwakale, byanyinama, byamona sanda bobo yabevungila kitumba kya Yeesu. Ni, byahaluka kwaye, iye kusheeka biino kumona makumo mateebwa.

13 *Mulwanga loolwa lusu, badingisi babidi ba Yeesu bavayenanga kumukola ukitaanibwa Emau, wowa mukola uvanange mu munonga hangi bilomitele kumi na yimo na mukola wa Yelusalema. 14 Moomwa mu zila beyenanga kujyobola kukidila maama mauya moosomeekila. 15 *Habenange bakidi jyobola nakukwiyujyujyena, Yeesu mwinikindu bya banyomokela, na bya yena nabo kukumo muluendo 16 *Bemumona kwa meeso, ila meeso maabo mezikibwa kusidi kumuyuka.

17 Yeesu haya bayuuja: «Mwena kujyobola kukidila kayi?» Ibo habatukama buobame. 18 *Yumo hamukidi haabo wetaanibwa Keleopa haya muyaka ti: «Nguboya tii, udi beebunga muune Muyelusalemu sikiyuka byakila mwakale maa masu mabidi?» 19 *Naiye bya bayuujya ti: «Ko! Makemauya lungi?» Naibo habamuyaka ti: «Tukijyobodela kukidila mauya mavatebwa kudi Yeesu wa Nazaleti! Yuu Yeesu wene mubushi* mukata. Lungi wemonesha butangala bwaaye mukuyakula na mukuta bingulungulu busu bwa Kabejya na busu bwa bandu booso.

20 Bakulu biitu babamupelo* na banunu biitu bemutula mukuboya ti walamudibwe kumote. Kisha habamulamika kumusalaba. 21 *Baashu tuvanange mukubadila ti ni iye ni wifuula Isilaeli. Ila leelo ndusu lwa kasatu kusomba beebya bye teebwa maama mauya. 22 Lungi baabakazi bamo bakiandu kiitu bava tuanunusha. Baaba baabakazi bavabukila kumufungu mukisi pupu, 23 Ila ndabavabanga lukoba lwaye. Habaaluka habatuvishila mukizi ti ba malaika* bava banyomokela na kubasaudila ti Yeesu udi mwejyo. 24 *Kisha bamo hamukidi hiitu bavayena kumufungu, habakabanga mauya byakebee bivayakula baaba baabakazi. Ibo naabo ndabeemona kitumba kya Yeesu.»

25 Ni Yeesu haya basaudila baaba badingisi ti: «Ha banyu bandu basidi na lukanyi, matima miinu ndamakitabuka kabilo mauya mooso me yakula babushi.* 26 *Miti yivahajya Kilisito* wasube beebya busu ni washwele mubutangala bwaaye!» 27 Kiisha, haya bafifuludila ma mauya mesinyibwa mwajyo waye mu Businye Butokatoka ba Kabejya bwooso. Bya somba kubitabu kya Musa, mupaka ku bitabu bya babushi booso.*

28 Haŋa habe tuluka tonono na mukola wabee yenanga mwakale, Yeesu byata bushwa wayidididye na luendo; 29 Ila baaba badingisi* haba kwiaya naye na kuyakula ti: «Huuma niitu, kumona bufuku bwa tonanana.»

Haŋo, bya shwela mukyende, bya yakana kukumo nabo. 30 Haŋa he yakana mukudya bidyazi kukumo nabo, bya buula mukati byata abee kudi Kabejya, kisha byaubela na kubaabila. 31 Hakeaŋa meeso maabo hama humbuka, na haba muyuka sasa. Ila Yeesu bya zizimina kumeeso maabo. 32 Habasomba kukwi saujyena yumo kwa yumo ti: «Ngwinikindu! Matima miitu mavane muku seelela haŋa havanangiye muku tufifuludila Businye Butokatoka bwa Kabejya kokwa muzila!»

33 Hakeaŋa baaba badingisi* babidi haba taluka, haba haluka ku Yelusalemu. Haba banga baba mitonge* kumi na yumo ba Yeesu na baa bangi bandu bakiandu kyaabo. 34 Baaba bene bukumaana haba saudila baaba badingisi* babidi ti: «Byakwinikindu, Vidi-nyambi wa fukuka! Na uvanyomokela Simoni!»

35 Na baba badingisi* babidi, naibo habasaudila beezinabo mauya mooso mee kidika muzila, na beebya byabe muyuka Yeesu mu kindi kyebeleye mukati.

36 Baaba badingi* babidi habenange bekidi yakula kukidila maama mauya, hakeaŋa Yeesu mwinikindu bya sosokela hamukidi haabo. Bya basaudila: «Muyakane nyaa!»

37 Baaba badingisi booso haba hanunuka na kutiina kwabule, kumona bavanijya ti bamona musimbusimbu. 38 Ila Yeesu bya bayuujya t: «Kwa kayi matima miinu maobama? Kwakayi mudi na mbaka muma tima miinu? 39 Mulole biazaza byami na bidimba byami, ti jyami mwinikindu! Mungulengele na mungulole, kumona muzuka ndaukiyakananga na nyama wala na mifua. Ila miimi mwangulola mbidi nabyo*.» 40 Hewa Yeesu kuyakula maamo, bya bamonesha byazaza byaye na bidimba byaye. 41 Baaba badingisi bavane ndabetabuka kukidila kuseelela na kusheeka. Haŋo Yeesu byabayuujya ti: «Mudi na kindu kimo haŋa kyakudya?» 42 Haŋo haba mwabila kindi kimo kya kibelelo kyabeeyekela. 43 Bya kibuula, na kukidya ibo booso muku mona. 44 Kisha beebya bya basaudila: «Haŋa hambenange kukumo niinu mbebasaudila ti: ‹Mauya mooso mesinyibwa mwajyo waami mu Buta* bwa Musa, na mubitabu bya babushi*, na mukitabu kya Zabuli, makiajyibwa mabambane mooso.›»

45 Haŋo Yeesu bya bahumbula lukanyi lwaabo ti bayuke Businye Butakatoka. 46 Na bya basaudila lungi ti: «Yikisinyibwa ti yikibambana Kilisito* wasube, na masu masatu nyuma ya kumota kwaye wafukuke.* 47 Na muzina dyaaye ni mwabisaudila bandu booso ti basame bubi bwaabo mukuboya ti bafiilwe lusa bubi bwaabo. Na Yeeya yasombele Yelusalemu. 48 Banyu ni basanganyi ba maa makumo. 49 Miimi mwinikindu ni muyishila yowa we badijya Tata. Ila banyu mudindile bangu ku Yelusalemu mupaka bebya byamu hebwa bobwa butangala kunyomokela mbinguni*.»

50 Haŋo, Yeesu bya hezela na badingisi* baye mumukola wa Yelusalema, bya baswaala tonono na mukola wa Bethania. Habetuyuka haŋo bya tundula biboko byaaye haulu, na bya bafiyudila. 51 Henangiye ukidi ba fiyudila, bya basama; na bya buudibwa haulu mbinguni. Yeesu wayena mbinguni 52 Naibo byakebee, haba munyinamina. Kisha habahaluka ku Yelusalemu na kuseelela kukata. 53 Masu mooso, benangange munda mwalubunga muku shisha Kabejya.