Maria

Kuvelekewa kwa Yesu kujovekana

26 Mu mwehi wa sita, Chapanga amtumili mtumu waki wa kunani Gabulieli kumuji wa Nazaleti, ku Galilaya. 27 Kwa kamwali mmonga mwavamkemela Maliya, Mwenuyo ahongiwi na mgosi mmonga liina laki Yosefu wa lukolo lwa Daudi. 28 Mtumu wa kunani kwa Chapanga Akamuhegelela akamjambusa, "Tikuwoni! Bambu avi pamonga na veve kangi akugubiki uganu waki!"

30 Mtumu wa kunani kwa Chapanga akamjovela, "Kotoka kuyogopa Maliya, muni Chapanga aganisiwi na veve. 31 Walavya na ndumbu, walaveleka mwana mgosi, yati ukumkemela liina laki Yesu. 32 Mwenuyo yati ivya mkulu, yati ikemelewa Mwana wa Chapanga Mkulu. Bambu Chapanga yati amuvika kuvya Nkosi, ngati cheamuviki Nkosi Daudi mweavi gogo waki. 33 Ndi yati ivya Nkosi wa lukolo lwa Yakobo magono goha, na unkosi waki wangali na mwishu!"

Kuvelekwa kwa Yesu

18 Chenichi ndi cheavelekiwi Yesu Kilisitu. Maliya nyina wa Yesu, achumbiwi na Yosefu. Nambu vakona vangatama ngati mngwana na mdala, Maliya apatili kuvya na ndumbu kwa makakala ga Mpungu Msopi.

Maliya akumulumbalila Chapanga

46 Maliya akajova,

"Mtima wangu ukumlumba Bambu,

47 mpungu wangu umhekela Bambu, ndava Msangula wangu.

48 Muni aulolili cha lipyana ungolongondi wa mvanda waki!

Kutumbula hinu viveleku vyoha yati vakunikemela mwenisangalwiki,

49 ndava muni Chapanga ana makakala anihengili gakulu,

na liina laki ndi msopi

50 Chivelekelu mbaka chivelekelu

mwene magono goha avi na lipyana kwa vandu vevakumtopesa.

51 Alangisi makakala gaki kwa kukita mambu gakulu.

Avapechengini vevimeka mumaholo ga mitima yavi.

52 Avahelisi vankosi vana makakala kuhumila muvigoda vya kulongosa,

na avakwesi vevavi ngolongondi.

53 Vangangu avayukutisi mambu gabwina,

na vana vindu vyamahele avalekili vahamba mawoko gawaka.

54 Amtangatili mulima wa Isilaeli mtumi waki.

Akumbwiki lipyana laki,

55 Ngati chaajovili kuvya na lipyana kwa Ibulahimu

na chivelekelu chaki, magono goha."

4 Na Yosefu mewa akawuka pamuji wa Nazaleti wewavi kumulima wa Galilaya, akahamba kumuji wa Betelehemu wewavi pamulima wa ku Yudea, kweavelikiwi nkosi Daudi. 5 Akahamba kuyandakiswa pamonga na maliya mweavimchumba waki, mweavi na ndumbu. 6 Pevavi ku Betelehemu ligono laki likahika akavya na mwana. 7 Akaveleka mwana waki mtumbulanu mwana mgosi, akamtindisila tunyula twa vana, kangi akamgonesa muwatu wa kulisila mifuya, ndava vapati lepi fwasi munyumba za vayehe.

19 Ndi Maliya akagavika na kugahololela mambu goha mumtima waki.

34 Ndi Simioni akavamotisa, akamjovela Maliya nyina waki Yesu, "Lola mwana uyu avelekiwi ndava ya vandu vamahele va Isilaeli kugwa kwa vandu vamahele na vangi vamahele kuyinuka, mwene yati ivya ulangisu wa kubelekana na vandu, 35 muni maholo ga vandu va mahele galalolekana pawaka. Wamwene lipyanda ngati upanga, ukuhomili mtima waku."

48 Na pavamuweni vakakenyemuka, nyina waki akamkota "Wamwana vangu ndava kyani utikitili genaga? Dadi waku na nene ting’ahiki neju kukulonda."

49 Yesu akayangula, "Ndava kyani mukunilonda? Mumanyi lepi ngati yikunigana nene kuvya munyumba ya Dadi wangu?" 50 Nambu dadi na nyina waki nakugamanya malovi gala geavajovili.

51 Yesu akawuya pamonga nawu ku Nazaleti, akuvayuwanila. Nyina waki akayendelela kugaholalela mambu goha mumtima waki.

3 Lukumbi divayi payamaliki, nyina waki akamjovela Yesu, "Divayi yimaliki!"

4 Yesu akamyangula, "Ukotoka kunijovela cha kuhenga. Lukumbi lwangu lwakona kuhika."

5 Kangi, nyina wa Yesu akavajovela vanalihengu, "Chochoha cheakuvajovela, muhengayi."

25 Papipi na msalaba wa Yesu vayimili nyina waki Yesu, na mlumbu wa nyina waki na Maliya mdala wa Kileopa, na Maliya Magidala. 26 Yesu peamuwene nyina waki, na papipi yaki ayimili muwuliwa yula mweamganili, akamjovela nyina waki. "Mau, Lola, mwenuyo ndi mwana waku."

27 Kangi akamjovela muwuliwa yula. "Lola, mwenuyo ndi nyina waku." Na kutumbula lukumbi lula muwuliwa yula akamtola atama kunyumba yaki.

Nyina na valongo vaki Yesu

31 Nyina wa Yesu na valongo vaki vakabwela vakayima pavala, vakamtuma mundu mmonga akamkemela mugati mula. 32 Msambi wa vandu watamili kumtindila Yesu mundu mmonga akamjovela, "Lola nyina waku na valongo vaku vavi kuvala, vakukulonda."

33 Yesu akavajovela, "Nyina wangu na valongo vangu ndi vayani?" 34 Kangi akavalola voha vevatamili kumtindila mwene, akajova "Mlola! Nikuvalola ava ngati Nyina wangu na valongo vangu. 35 Mundu yoyoha yula mweihenga gakumganisa Chapanga, mwenuyo ndi mhaja wangu kavili mlumbu wangu mewa nyina wangu."

55 Wu, mwenuyu lepi mwana wa yula mhongola mikongo? Na nyina waki ikemiwa lepi Maliya na valongo vaki, lepi Yakobo na Yosefu na Simoni na Yuda? 56 Valumbu vaki voha nakutama pamonga na tete? Hinu agapatili koki mambu ago goha?

14 Voha ava vakakonganeka kumuyupa Chapanga, pamonga na vadala na Maliya nyina waki Yesu na valongo vaki.