1 Samweli peavili mgogolo, ndi akavakita vana vaki va chigosi vavyayi vahamula va pa mulima wa Isilaeli. 2 Mwana waki wa kutumbula wa chigosi ndi akemiwayi Yoeli, na wa chigosi mwealandili akemiwayi Abiya. Voha vavili vavii vahamula ku Beeli Sheba. 3 Nambu vana venavo vatamili lepi cha kumganisa Bambu Chapanga ngati cheakitili dadi wavi, nambu vajilondelayi chiyonjokesu chavi vene, vapokela hongo na vakalihamula lepi cha uchakaka.

4 Ndi vachilongosi voha va Vaisilaeli vakakonganeka pamonga na kumuhambila Samweli ku muji wa Lama, 5 vakamujovela, "Hinu veve wamugogolo na vana vaku vikita lepi gakumganisa Chapanga ngati chaukita veve. Hinu utihagulilayi nkosi wa kutilongosa ngati chevikita ku milima yingi yoha." 6 Nambu vene pevajovili, "Tipela nkosi wa kutilongosa." Lijambu lenilo lamganisi lepi Samweli, na mwene akamuyupa Bambu Chapanga. 7 Bambu Chapanga akamujovela Samweli, "Vayuwanilayi kila chindu chevakujovela vandu, muni vakubelili lepi veve, nambu vanibelili nene nikoto kuvya nkosi wavi. 8 Tangiya penavawusili ku Misili, vanilekili nene, vakuyihengela michapanga yingi mbaka lelu. Hinu mambu gevanikitili nene ndi gagogo gevakukitila na veve. 9 Hinu veve vayuwanila nambu uvalakalila neju na uvajovela hotohoto mambu geakuvakitila nkosi mweakuvatalalilayi." 10 Penapo Samweli akavajovela vandu vevayupayi vapewa nkosi, malovi goha geajoviwi na Bambu Chapanga. 11 Akavajovela, "Chenichi ndi cheakuvakitila nkosi winu mweibwela kuvatalalila. Yati akuvatola vana vinu va chigosi vavya vandu va kugendesa mutuka zaki za ngondo na vangi yati vivya vakwela falasi, na vangi yati vijumba palongolo ya mutuka zaki. 12 Yati akujihagulila vangi vavyayi vakekesi va kulongosa msambi wa manjolinjoli elufu yimonga va ngondo na vangi vavyayi vakekesi va kuvalongosa msambi wa manjolinjoli hamusini. Na vangi yati vakumlimila migunda yaki na kubena mabenu gaki, na vangi yati akuvakita vavya vatengenezaji va vindu vyaki vya ngondo, na vangi yati vivya va kukita lufumbu lwa vyuma vya mutuka zaki. 13 Yati akuvatola vasikana vinu na kuvakita vamutengenezelayi mahuta geginungalila, na vangi yati vivya va kutelaka na vangi vivya va kuteleka mabumunda. 14 Yati itola migunda hinu yabwina, na migunda ya mizabibu na migunda ya mizeituni na kuvapela vahengaji vaki. 15 Yati itola pandu pa lilundu la kumi pa mabenu ginu na pa mizabibu yinu na kuvapela vakulu vevavii pahi yaki na vahengaji vaki. 16 Yati akuvatola vahengaji vinu va chigosi na va chidala na ng'ombi zinu zezikulupi na punda zinu ndava ya kuhengela mwene. 17 Yati itola pandu pa kumi mu misambi ya mene na mambelele ginu. Na nyenye mwavene yati mwivya mwavavanda vaki. 18 Pegakuvakolela genago, nyenye yati mwivemba kugana utangatila ndava ya nkosi mwemujihagulili mwavene, nambu Bambu Chapanga yati akuvayangula lepi." 19 Nambu vandu vakabela kumuyuwanila Samweli, vakajova, "Lepi, tete tigana tivyayi na nkosi mweakutitalalila, 20 muni na tete tivyayi ngati vandu va milima hingi. Nkosi witu yati akutihamula mu mihalu yitu na kutilongosa ku ngondo." 21 Ndi Samweli akahamba kumjovela Bambu Chapanga malovi goha geajoviwi na vandu. 22 Bambu Chapanga akamjovela Samweli, "Vayuwanilayi na uvahagulila nkosi." Kangi Samweli akavajovela, "Kila mundu awuya ku muji waki."