1 Penapo Daudi akatila kuhuma ku Nayoti ku muji wa Lama mbaka kwa Yonatani na kumukota, "Wu, nikitili kyani? Kyani chenibudili? Wu, nimuhokili kyani dadi waku mbaka igana kunikoma?"

2 Yonatani akamuyangula, "Pehe, yati ufwa lepi! Chakaka dadi wangu ikita lepi chindu chochoha chikavya chivaha amala chidebe changali kunijovela nene. Ihotola lepi kunihiha chochoha, yivii lepi ngati cheuholalela!"

3 Nambu Daudi alapili na kujova, "Dadi waku amanyili bwina njwee veve cheuniganili, na iholalela kukuhiha cheigana kukita muni akakitaya veve ukotoka kuvya ngolongondi. Nilapa kwa Bambu Chapanga mweavii mumi na kwa veve, kufwa kwangu kuvii papipi!"

4 Yonatani akamujovela Daudi, "Chochoha cheugana nikuhengelayi yati nikuchihenga."

5 Daudi akamujovela Yonatani, "Chilau ndi mselebuko wa kuvandama kwa mwehi, na nene niganikiwa nikalyayi pamonga na nkosi. Nambu leka nikajihihe ku mgunda mbaka pamalau chimihi. 6 Dadi waku akawonayi kuvya nene nivii lepi na akanikotakesayi, umujovelayi, ‘Daudi aniyupili neju nimleka ahamba ku muji wavi ku Betelehemu, kuhamba kuwusa teta ya kutinyiswa ya mwaka pamonga na valongo vaki ngati chevikita miyaka yoha.’ 7 Dadi waku akajovayi, ‘Akiti chabwina.’ Ndi umanya kuvya iholalela lepi kunikoma, nambu ngati ayomili ndi umanyayi kuvya iholalela kunikoma. 8 Chondi unikitila bwina nene namuhengaji waku ndava muni veve wakitili lilaganu na nene palongolo ya Bambu Chapanga. Nambu ngati nibudili unikomayi wamwene, ndava kyani unipeleka kwa dadi waku anikomayi?"

9 Yonatani akamuyangula, "Kotoka kuholalela genaga! Nikujovela chakaka, nganimanyayi hati lijambu lidebe kuvya dadi wangu iholalela gahakahu ndava yaku nganikujovili."

10 Kangi Daudi akamukota, "Yati nimanya wuli ngati dadi waku akuyangwili cha kukulakalila?"

11 Yonatani akamuyangula, "Tiye ku mugunda." Ndi vakahamba pamonga ku mgunda. 12 Yonatani akamujovela Daudi, "Bambu Chapanga, Chapanga wa Isilaeli avya shahidi witu! Chilau amala pamalau lukumbi ngati ulu yati nikumukota dadi wangu na yati nikujovela ngati ana kyani na veve, akajova mambu gaku bwina, nene yati nikumtuma mundu abwela kukujovela. 13 Nambu ngati dadi wangu iholalela kukukoma na nene nikujovili lepi na veve utilalila kutali muni uvya mumi, Bambu Chapanga anibunayi neju ngati yati nikujovela lepi kuvya Sauli igana kukukoma. Bambu Chapanga avyayi pamonga na veve ngati cheavi pamonga na dadi wangu. 14 Nikayendelelayi kuvya mumi unilangisa ubwina wangamalika ngati wula wa Bambu Chapanga muni nikoto kufwa. 15 Nambu veve hinu uyendelela kulangisa ubwina waku wangamalika kwa vandu va mu nyumba yangu. Hati lukumbi lula Bambu Chapanga peakuvakomakesa vamakoko vaku vevavii pa mulima." 16 Ndi Yonatani akavika lilaganu na vandu va mu nyumba ya Daudi kujova, "Bambu Chapanga avakomakesa vamakoko va Daudi." 17 Na mwene Yonatani akagana Daudi alapa kavili kuvya yati iyendelela kumgana, muni Yonatani amuganili Daudi ngati cheakujigana mwene. 18 Penapo Yonatani akamujovela kavili Daudi, "Ndava chilau ndi mselebuko wa kuvandama mwehi na vandu yati vakukuwona lepi ndava muni chigoda chaku yati chivya waka. 19 Pamalau kimihi, hamba ukajihihayi pandu pala pewajihihili ligono pelatumbukanayi lijambu lenili, ukalindilayi kuyetu ya liganga lelikemiwa Ezeli. 20 Nene yati nijugumila nduta zidatu pamuhana ya liganga lenilo ngati nilunga chindu. 21 Kangi yati nikumutuma msongolo na kumujovela, ‘Hamba kailonda nduta zenizo.’ Ngati nikamujovela, ‘Lola nduta zivii upandi waku, uhileta apa.’ Wenuwo ndi ulangisu wa kukulangisa kuvya uvii mumi, na veve yati umwangila pandu pepavi waka, muni nilapa kwa Bambu Chapanga mweavi mumi kuvya yati ukomiwa lepi. 22 Nambu nikamujovelayi, ‘Lola nduta zivii palongolo yaku.’ Penapo wuka, muni Bambu Chapanga yati igana utila. 23 Ndava ya malaganu getivikilini, Bambu Chapanga ndi shahidi witu pagati ya nene na veve magono goha gangali na mwisu."

24 Penapo Daudi akajihiha ku mgunda. Lukumbi lwa mselebuko wa kuvandama kwa mwehi pelwahikili, nkosi Sauli akatama kulya chakulya. 25 Nkosi Sauli akatama pa chigoda chaki chechayegemili mu luwumba ngati cheitamaga. Yonatani akatama pamuhana ya nkosi na Abuneli akatama papipi na nkosi. Nambu pa chigoda cha Daudi chikavya waka. 26 Ligono lenilo nkosi Sauli alongili lepi chochoha, muni aholalili kuvya, "Pangi kuna chindu chimuhumalili Daudi, chechimkiti avya mweangayidakiliwa kubwela pa mselebuko uwu." 27 Ligono lelalandili la mselebuko wa kuvandama kwa mwehi, chigoda cha Daudi chavii chakona waka. Sauli akamukota Yonatani mwana waki, "Ndava kyani Daudi mwana wa Yese abwelili lepi kulya chakulya jana na lelu?" 28 Yonatani akamuyangula, "Daudi aniyupili neju nimuleka ahamba ku Betelehemu. 29 Anijovili kuvya, ‘Nileka nihamba muni vandu va mu nyumba yangu viwusa teta ya kutinyiswa ku Betelehemu, na muhaja wangu anijovili nihambayi kwenuko. Ndava muni niganikiwa nihamba, niyupa uniyidakila nihambayi kwa valongo vangu.’ Chenichi ndi chechimkitili akotoka kubwela kulya chakulya na veve nkosi." 30 Penapo Sauli akamuyomela neju Yonatani na kumujovela, "Veve wa mwana mgosi uvi ngati nyina waku mweangayidakila malagizu na mweangaganikiwa kwa chochoha! Nimanyili kuvya uvii upandi wa Daudi mwana wa Yese na ukujipela soni wamwene na umpela soni mewa nyina waku mweakuveliki! 31 Umanyili lepi kuvya ngati Daudi ivya mumi veve yati upata lepi fwasi ya kuvya nkosi wa mulima uwu? Hinu hamba ukamuleta pe apa nimkomayi." 32 Yonatani akamkota dadi waki, "Ndava ya kyani akomiwayi? Akitili uhakahu woki?" 33 Penapo Sauli akamujugumila Yonatani mgoha muni amukomayi. Ndi Yonatani akamanya kuvya chakaka dadi waki igana kumukoma Daudi. 34 Penapo Yonatani akawuka kanyata pa chakulya kuni ana ligoga neju. Ligono lelalandili la kumalakisa mselebuko wa kuvandama mwehi alili lepi chakulya chochoha. Yonatani aviniswi neju mu mtima ndava ya mambu ga soni geakitili dadi waki kwa Daudi. 35 Chilau yaki lukela Yonatani akahamba ku mgunda kula kukonganeka na Daudi ngati chevalagini. Alongosini na kasongolo kadebedebe. 36 Pevahikili kwenuko, Yonatani akamjovela msongolo yula, "Jumba kalonda nduta zenikuzijugumila." Msongolo peajumbayi ndi Yonatani akajugumila nduta zampitayi msongolo yula na kutula palogolo yaki. 37 Msolngolo peahikili pandu pezagwilalili nduta, Yonatani akamkemela na kumjovela, "Hamba palongolo, nduta zivii palongolo yaku? 38 Kita kanyata uhamba ukotoka kuyima pandu penapo." Msongolo yula akanonga nduta na akawuya kwa Yonatani. 39 Msongolo mdebe yula amanyili lepi chindu chochoha, nambu vevamanyili ndi Yonatani na Daudi ndu. 40 Yonatani akamupela musongolo yula vindu vyaki vya ngondo na kumujovela, "Hamba kiliwuka kubomani." 41 Msongolo yula peawukili, Daudi akahuma pandu peajihihili pala kuyetu ya liganga lila. Daudi akamgundamila Yonatani mala zidatu. Penapo Daudi na Yonatani vakakumbatilana kuni voha vivemba. Daudi ndi mweavembili neju kuliku Yonatani. 42 Kangi Yonatani akamujovela Daudi, "Hamba kwa uteke. Muni talapili kuvya tavamkozi kwa liina la Bambu Chapanga, tikajova, ‘Bambu Chapanga ndi shaidi pagati yitu magono goha gangali na mwisu, na pagati ya viveleku vyangu na vyaku magono goha gangali na mwisu.’" Kangi Daudi akawuka na Yonatani akakiliwuka kubomani.