1 Sauli peavii nkosi ndi avili na miyaka selasini, na akatalalila pa Isilaeli kwa miyaka alubaini na hivili. 2 Sauli avahagwili Vaisilaeli elufu hidatu na pagati yavi akavatola elufu hivili akavya navu ku Mikimashi ku mulima wa hitumbi ya ku Beteli. Na vandu vangi elufu yimonga vakavya na Yonatani ku muji wa Gibea kumulima wa Benjamini. Na vala vandu vangi vevasigalili akavajovela kila mmonga awuya kunyumba yaki. 3 Yonatani akavazangila manjolinjoli va Vafilisiti vevavikili kambi ku Geba, na Vafilisiti voha vakayuwana lijambu lenilo. Penapo ndi Sauli akavajovela vandu vabetayi mapenenga pa mulima woha wa Isilaeli na kujova, "Vaebulania vayuwanila." 4 Vaisilaeli voha vayuwini kuvya Sauli avatovili manjolinjoli va Vafilisiti vevavili pa kambi, na Vafilisiti vakatumbula kuvavenga neju Vaisilaeli, penapo vandu vakakemewa kuhamba kuwungana na Sauli ku Giligali.

5 Vafilisiti vakakonganeka pamonga muni vatovana na Veisilaeli, kuni vavili na mutuka za ngondo elufu selasini na manjolinjoli elufu sita vakwela falasi na msambi wa manjolinjoli vevigenda kwa magendelu vavii vamahele ngati msavati wa kubwani. Voha venavo vakakwela na kuvika kambi yavi uko ku Mikimashi kuupandi welihumila lilanga wa muji wa Beti Aveni. 6 Vaisilaeli pevaweni kuvya vavili mu mang'aiso na manjolinjoli vavi vibuniwa, vakatumbula kujihiha. Vangi vakajihiha mu mbugu na vangi ku dasi na vangi mu malindi, vangi mu matalawu na vangi mu magodi na vangi mu hiliva. 7 Vaebulania vangi vakayomboka mfuleni Yoludani vakahamba mbaka ku mulima wa Gadi na ku mulima wa Gileadi.

Nambu Sauli avili akona ku Giligali, na vandu voha vakamulanda kuni vindendema.

8 Sauli akamulindila Samweli mu magono saba, ngati Samweli cheajovili. Nambu Samweli abwelili lepi ku Giligali na vandu vakatumbula kupechengana. 9 Ndi Sauli akavajovela vandu, "Muniletelayi teta zinu za kutinyiswa na teta za uteke." Na mwene Sauli akawusa teta za kutinyiswa. 10 Sauli peamalili ndu kutinyisa teta, Samweli abwelili. Sauli akahuma kuvala kuhamba kumpokela Samweli na kumjambusa. 11 Samweli akamukota, "Ukitili kyani?" Sauli akayangula, "Penaweni vandu vipechengana na veve wabwelili lepi mu lukumbi lwewajovili, na penaweni Vafilisiti vajitendekihi kwa ngondo uko ku Mikimashi, 12 ndi nikaholalela kuvya Vafilisiti yati vibwela kunihanganila ku Giligali na navii nakona nangamuyupa Bambu Chapanga atitangatila. Ndava yeniyo yikanigana niwusayi teta ya kutinyisa." 13 Samweli akamuyangula Sauli, "Ukitili uyimu." "Walandili lepi malagizu geakupelili Bambu Chapanga, Chapanga waku. Nambu ngati ngeulandayi, mwene ngaaukitili unkosi waku usindimala magono goha pa Isilaeli. 14 Nambu hinu unkosi waku yati uyendelela lepi kuvya magono goha, muni veve wakitili lepi geigana Bambu Chapanga, hinu Bambu Chapanga mwene amulondili mundu yungi mweakuuganisa mtima wa Bambu, na amuhagwili avya chilongosi wa vandu vaki."

15 Penapo Samweli akawuka ku Giligali akahamba ku Gibea mu mulima wa Benjamini. Na mwene Sauli peavavalingi manjolinjoli veavili navu, ndi vavii manjolinjoli miya sita. 16 Sauli pamonga na Yonatani mwana waki pamonga na manjolinjoli voha vevii navu ndi vakavika kambi ku Gibea pa mulima wa Benjamini, Vafilisiti na vene vakavika kambi ku Mikimashi. 17 Vafilisiti vakawuka pa kambi yavi na kuhamba kuvazangila kuni vavii misambi hidatu. Msambi umonga wahambili ku Ofula ku mulima wa Shuali, 18 msambi wungi ukahamba ku Beti Holoni, na msambi wungi wa datu ukahamba ku mbaka kuhambila ku ligema la Seboimu lelilolesana na lugangatu. 19 Lukumbi lwenulo kwavili lepi na mundu yoyoha mweakita lufumbu pa mulima woha wa Isilaeli, ndava Vafilisiti vabelili kuvaleka Vaebulania vajiwula kujitendekelela mapanga amala migoha. 20 Penapo kila Muisilaeli akahamba kwa Vafilisiti ndava ya kunola magela gegihutwa na vinyama na magela ga kulima kwa mawoko na mavagu na hikwakwa. 21 Kunola ligela la kulima na ng'ombi Vaisilaeli valipayi gilamu nane za hipandi ya madini ga feza, na gilamu mcheche kwa kunolela livagu amala chikwakwa. 22 Ngondo peyahumalila kwavili lepi na linjolinjoli pagati ya vala voha vevavili na Sauli na Yonatani mweavili na upanga amala mgoha, nambu nga Sauli na Yonatani mwana waki ndu ndi vevavii navyu. 23 Hinu Vafilisiti vakapeleka manjolinjoli kuhamba kuyiyangalila njila ya ku Mikimashi.