1 Mulikabila la Benjamini, avii mundu mmonga mweanavindu vyamahele mweimanyikana, mundu mwenuyo liina laki akemiwi Kishi, mwana wa Abieli, na mjukulu wa Zelo na chitengula cha Bekolati dadi waki akemiwi Afia mweahumalili mu likabila la Benjamini. 2 Kishi avili na mwana wa chigosi mweikemiwa Sauli, Sauli avii msongolo mweanyambili, na kawaka mundu pa Isilaeli mweanyambili ngati Sauli. Sauli avii mtali neju kuliku vandu voha va pa mulima wa Isilaeli, vandu voha vamuhikilayi mumavega. 3 Ligono limonga mapunda ga Kishi dadi waki Sauli gayagili, na mwene Kishi akamujovela mwana waki Sauli, "Umutolayi muhengaji mmonga uhamba nayu kugalonda mapunda." 4 Na vene vakahamba kulonda, vakapita mu mulima wa hitumbi ya Efulaimu na pandu poha pa Shalisha, nambu kwenuko vagapatili lepi. Kangi vakahamba mbaka ku mulima wa Shaalimu na kwenuko mewa vagapati lepi. Vakapita mbaka ku mulima wa Benjamini nambu na kwenuko mewa vagapati lepi. 5 Pevahikili pa mulima wa Zufu, Sauli akamujovela muhengaji waki, "Tikiliwukayi ku nyumba, ndava ngati tangakiliwuka, dadi wangu yati ileka kuholalela mapunda, na yati itumbula kutihololela tete." 6 Mtumisi yula akayangula, "Lindila hoti, pa muji uwu avii mundu wa Chapanga, mweitopeswa na vandu voha muni vyoha vyeilongela vimwangila hotohoto. Hinu timuhambilayi pangi ihotola kutijovela tihamba upandi woki." 7 Sauli akamkota mtumisi waki, "Hinu tikamuhambilayi mundu mwenuyo yati tikumpela kyani? Ndava vyakulya vya mu lugendu vyetabweli navyu vimaliki na tivi lepi na njombi ya kumupela mundu mwenuyo wa Chapanga. Wu tivi na njombi yoyoha ya kumpela?" 8 Mtumisi yula akamuyangula Sauli, akajova, "Lola, nene nivii na chipandi chidebe cha madini ga feza. Yati nikumupela mundu mwenuyo muni ahotola kutijovela tihamba njila yoki." 9 Kadeni pa Isilaeli yavii mundu akaganayi kukota chindu kwa Chapanga, ngaajovi, "Bwela tihamba kwa mweilola," Muni mulota wa hinu, kadeni vamukemelayi mweilola. 10 Sauli akamuyangula, "Chabwina, hinu tihamba." Penapo vakahamba ku muji pandu peatamayi mundu mwenuyo wa Chapanga. 11 Pevakwelayi chitumbi kuhamba kubomani, vakakonganeka na vasikana vihamba kunega manji. Vakavakota vasikana venavo, "Wu, mundu mweilola gala geilola Chapanga avii pa muji uwu?" 12 Vasikana vala vakavayangula, "Ena, avili. Avili palongolo yinu, mukayumbatikayi yati mukumukolela. Abwelili lelu pa muji uwu, muni lelu vandu vihamba kuteta ku pandu pa kuwusila teta pepavi ku chitumbi. 13 Mukayingilayi ndu pa muji yati mukumkolela akona angahamba ku chitumbi kulya. Muni vandu yati vitumbula lepi kulya mbaka mwene abwela hoti na kuyupa ndava ya chakulya. Akakitayi chenicho ndi vevagongoliwi yati vilya. Hinu muhamba kanyata yati mkonganeka nayu." 14 Ndi Sauli na mtumisi waki vakakwela kuhamba ku muji ula. Pevayingilayi mu muji, vakamuwona Samweli iwuka pa muji wenuwo, ibwela pevavili kuhambila pandu pa kunani pa kuwusila teta za kutinyiswa. 15 Jana yaki kwakona Sauli angabwela, Bambu Chapanga amali kummanyisa Samweli lijambu lenili, 16 kuvya, "Chilau lukumbi ngati ulu yati nikukuletela mundu kuhuma ku mulima wa likabila la Benjamini, na veve yati ukumunyala mahuta avyayi chilongosi wa vandu vangu va Isilaeli. Mwenuyo yati akuvasangula vandu vangu kuhuma mu utalalila wa vafilisiti, muni nigaweni mang'aiso gavi na chivembu chavi chinihikili." 17 Samweli peamuweni Sauli, Bambu Chapanga akamujovela, "Mwenuyu ndi mundu yula mwenakujovili, mwene ndi mweakuvatalalila vandu vangu." 18 Penapo Sauli akamuhegelela Samweli peavili papipi na limulyangu la muji na akamjovela, "Chondi niyupa unilangisayi nyumba ya mundu mwailola gala geilola Chapanga." 19 Samweli akamuyangula Sauli, "Nene ndi mundu uyo mweilola. Mulongolela mkwela muhamba pandu pa kutetela, muni lelu yati mwilya pamonga na nene na yati nikukujovela mambu goha gegavii mu mtima waku, na chilau lukela yati nikukuleka uhamba. 20 Kugavala mapunda gegahovalili tangiya magono gadatu gegapitili, ukoto kugaholalela, genago gamali kuwonekana. Wu, ndi yani Vaisilaeli vakumgana? Wu, veve lepi pamonga na vandu voha va mu nyumba ya dadi waku?" 21 Sauli akayangula, "Nene namundu wa likabila la Benjamini, likabila lidebe pagati ya makabila goha ga Isilaeli. Na lukolo lwangu ndi ludebe kuliku lukolo zoha za likabila la Benjamini. Ndava kyani hinu ukunijovela nene lijambu lenili?" 22 Ndi Samweli akavapeleka Sauli na mtumisi waki vatama pandu pa utopesa neju pamonga na vandu vevagongoliwi, kwavili na vandu ngati selasini vevagongoliwi. 23 Samweli akamujovela mweiteleka, "Letayi lilundu la nyofu lenakupelili, lila lenakujovili ulivika pamuhana." 24 Mweiteleka yula ndi akahamba akaleta liwondo loha akalivika palongolo ya Sauli. Ndi Samweli akamujovela Sauli, "Lyayi Chenichi ndi chechitendekiwi ndava yaku. Muni lavaguliwi ndava ya lijambu lelini, muni ulyayi pamonga na vayehe." Penapo Sauli akalya pamonga na Samweli ligono lenilo. 25 Pevahelili kuhuma kunani pandu pa kutetela, Samweli akalongela na Sauli kuchumba cha kudali.

26 Pevayimwiki lukela pee, Samweli akamukemela Sauli kuhuma ku golofa kula, akamujovela, "Jitendekeha hinu yati nikukuleka uhamba." Sauli peamali kujitendekeha ndi voha vavili, Sauli na Samweli vakahuma kuvala. 27 Pevahikili mu mbaka wa muji Samweli akamujovela Sauli, "Mjovelayi mtumisi waku alongolelayi palongolo yitu." Mtumisi peamalili kulongolela ndi Samweli akamjovela Sauli, "Linda chidoga nikujovelayi geajovili Chapanga kukuvala veve."