1 Lukumbi lwenulo Vafilisiti vakakonganeka pamonga ku Soko, muji weuvili mu Yuda, ndava ya ngondo. Vakavika kambi pandu pepikemiwa Efesi Damimu pepavii pagati ya Soko na Azeka. 2 Sauli pamonga na Vaisilaeli vakakonganeka pamonga na kuvika kambi paligema lelikemiwa Ela. Vakajitendekeha kutovana na Vafilisiti. 3 Vafilisiti vakayima pa chitumbi chingi na Vaisilaeli vakayima pa chitumbi chingi, pagati yavi kwavili na ligema.

4 Mu kambi ya Vafilisiti ahumalili mkekesi mmonga mweikemiwa Goliati, mweahumali ku muji wa Gati. Avili na utali wa mita hidatu. 5 Kumutu awalili kofiya ya shaba na panganga awalili ligwanda la shaba lelina kilo amusini na saba. 6 Mumagendelu gaki awalili vindu ngati mabeketu ga shaba ga kumudivalila, na mumavega gaki agegili mgoha wa shaba. 7 Chaka cha mgoha wenuwo chavili ngati chibingili cha mundu mweitota nyula, na mutu wa mgoha wenuwo wavili na kilo saba. Chingwamba chaki agegili mundu yungi mweamlongolili palongolo yaki. 8 Goliati akayima na kuvakwesela lwami manjolinjoli va Isilaeli, na kujova, "Ndava kyani mujitendekihi ndava ya kutovana ngondo? Nene Namfilisiti, na nyenye mwavandu va Sauli. Muhagulayi mundu mmonga pagati yinu abwelayi kutovana na nene. 9 Akanitovayi na kunikoma, tete yati tivya tavavanda vinu. Nambu nikamtovayi na kumukoma, penapo nyenye yati muvya mwavavanda vitu na kutihengela." 10 Mufilisiti yula akajova kangi cha mahanyi, "Lelu iyi nikuvaliga manjolinjoli va Isilaeli, munipela mundu mmonga abwela kutovana na nene." 11 Sauli pamonga na manjolinjoli voha va Isilaeli pevagayuwini malovi ga Mufilisiti mwenuyo, vakandendemeka na kuyogopa neju.

12 Daudi avili mwana wa Yese, wa lukolo lwa Efulaimu kuhuma ku Betelehemu mu mlima wa Yuda. Yese avili na vana vagosi nane. Lukumbi Sauli peavii nkosi, Yese avii mgogolo neju. 13 Vana vadatu vavaha va Yese, Eliabu mvelekanu wa kutumbula na Abinadabu ndi mwealandili na Shama ndi wadatu, venavo vahambili ku ngondo pamonga na Sauli. 14 Daudi avili mwana wa mwisu kuvelekewa, vala vadatu va kutumbula vahambili pamonga na Sauli ku ngondo. 15 Nambu Daudi ahambayi kwa Sauli na kuwuya ku Betelehemu kudima mambelele ga dadi waki.

16 Kwa magono alubaini lukela na chimihi Goliati ayimayi palongolo na kuvakitila luhonda manjolinjoli va Isilaeli kugana vawusa mundu wa kutovana na mwene.

17 Ligono limonga Yese akamujovela Daudi mwana waki, "Vapelekelayi vahaja vaku mandulutulu kilo kumi na mabumunda kumi. Vapelekelayi ku kambi yavi. 18 Tolayi na hipandi kumi ya mahuta ga mavele gegagandili umupelekelayi mkulu wa manjolinjoli, ukavalolayi vahaja vaku ngati viyendelela bwina, kangi uwuyayi ubwela unijovelayi cheviyendelela. 19 Nkosi Sauli na vahaja vaku pamonga na manjolinjoli voha va Isilaeli, vavii ku ligema lelikemiwa Ela, vitovana ngondo na Vafilisiti."

20 Chilau yaki, Daudi ayumwiki lukela pee, mambelele akamulekela mudimaji. Akatola chakulya na kuhamba ngati chealagizwi na Yese dadi waki. Peahikili pa kambi ya Vaisilaeli, avakolili vihamba pandu pavi pa ngondo kuni viwusa lwami lwa ngondo.

21 Manjolinjoli ga Vaisilaeli na ga Vafilisiti vahambayi mu misitali yavi kuni vilolesana. 22 Daudi akatola vindu vyeagegili vila na kumulekela mundu mweiyangalila mizigu, akajumba akahamba ku msitali wa Vaisilaeli, na kuvajambusa valongo vaki. 23 Pealongelayi navu, yula Goliati, Mfilisiti mkekesi kuhuma ku Gati, akamwangila palongolo ya msitali wa manjolinjoli ga Vafilisiti na kuwusa malovi ga kuvaliga ngati cheayovalili. Na mwene Daudi akamyuwanila bwina. 24 Vaisilaeli pevamuwene Goliati, voha vakamtila na kumuyogopa neju. 25 Vaisilaeli vakajovesana, "Wu, mumuweni mundu uyu cheiyendelela kumwangila lukumbi lwoha? Chakaka amwangalili muni avaliga Vaisilaeli. Nkosi Sauli ijova kuvya yati akumpela vindu vyamahele mundu yoyoha mweakumukomayi mundu mwenuyu. Mewa yati akumugegesa msikana waki, na lukolo lwaki yati vilipa lepi kodi pa mlima wa Isilaeli."

26 Daudi akavakota vandu vevayimili papipi yaki, "Wu, mundu mweakumukomayi Mufilisiti mwenuyu na kuvawusila Vaisilaeli soni iyi, yati ikitiwa kyani? Mufilisiti mwenuyu mweangadumuliwa jandu ndi yani, hati avaliga manjolinjoli va Bambu Chapanga mweavii mumi?" 27 Vandu vakamjovela Daudi galagala gevamjovili pakutumbula kumuvala mundu mweakumukoma Goliati.

28 Eliabu muhaja muvaha wa Daudi peayuwini Daudi ilongela na vandu, akamuyomela neju Daudi na kumjovela, "Ndava kyani ubwelili kuni? Wu, mambelele gadebedebe gala umulekili yani kulukongolo kula? Nimanyili chauvi na chinywinda na cheuvi wamuhakahu waku, ubwelili ndu kulola ngondo!"

29 Daudi akamuyangula, "Hinu nikiti kyani? Wu, nikotoka kukota lijambu loloha?" 30 Daudi akamung'anamukila mundu yungi akamkota likotesi lilalila, vandu voha veavakotili vamuyangwili chilachila.

31 Vandu vangi vevamuyuwini gealongelayi Daudi, vakahamba kumjovela Sauli, na mwene Sauli akalagisa vakamukemela Daudi. 32 Daudi akamujovela Sauli, "Mundu yoyoha akotoka kumuyogopa Mufilisiti mwenuyu! Nene muhengaji waku yati nihamba kutovana nayu."

33 Sauli akamuyangula Daudi, "Veve uhotola lepi kuhamba kutovana na Mfilisiti yula. Veve wakona wa msongolo, mundu mwenuyo atovini ngondo tangiya usongolo waki."

34 Daudi akamuyangula, "Nene mtumisi waku niyovalili kudima mambelele ga dadi wangu. Lukumbi pelihumalila lidubu amala lihimba kubwela kukamula limbelele, 35 nene nikulijumbisana na kukomana nalu na kulitola limbelele mu mulomo waki. Nambu ngati lidubu amala lihimba likanihanganilayi, nene nikulikamula pa likolomelu, nikuligwiha pahi na kulikoma. 36 Nene namtumisi waku nimalili kukoma lidubu na lihimba. Hinu hati Mfilisiti mwenuyo mweangadumuliwa jandu, mweakuvaliga manjolinjoli va Bambu Chapanga mweavii mumi, yati ivya ngati venavo. 37 Bambu Chapanga mweanisangwili kuhuma mu yugu za madubu na mahimba, mewawa yati akunisangula kuwuka mu mawoko ga Mfilisiti mwenuyo."

Sauli akamujovela. "Hambayi, Bambu Chapanga avyayi pamonga na veve." 38 Sauli akamuwalika Daudi nyula zaki za ngondo, akamuwalika kofiya yaki ya shaba kumutu na kakoti kaki ka shaba ka kujidivalila panganga. 39 Daudi akajikunga upanga wa Sauli mu chiwunu chaki, akalinga kugenda nambu ahotwili lepi muni ayovalili lepi kuwala nyula ngati zenizo. Akamujovela Sauli, "Nihotola lepi kuhamba ku ngondo kuni niwalili nyula ngati izi, muni nene niziyovalili lepi." Ndi akazihula. 40 Daudi akatola ndonga yaki mu chiwoko, akahagula maganga muhanu gabwina kuhuma mu kapela, akagasopa mukahaku kaki ka kudimila. Na chiwoko chaki chingi akamwili ngumbewa yaki, akatumbula kumuhambila Goliati Mfilisiti yula.

41 Mufilisiti yula na mwene akatumbula kumuhegelela Daudi, kuni amulongwisi yula mweamugegili chingwamba chaki. 42 Mufilisiti peamulingulili bwina Daudi na kumuwona msongolo ndu, mdung'u na mweanyambili, ndi akamuvevesa. 43 Goliati akamkota Daudi, "Hinu ndonga yeniyo ndi ya kyani? Ubwela na ndonga uholalela nene nalibwa?" Goliati yula akatumbula kuhikemela michapanga yaki muni imukitila gahakahu Daudi. 44 Goliati akamujovela Daudi, "Bwela kuni! Higa yaku yati nikuhipela hidege na hinyama ya kudasi valyayi."

45 Daudi akamuyangula Goliati, "Veve ukunibwelela nene na upanga na mugoha na nduta. Nambu nene nikukubwelela veve kwa liina la Bambu Chapanga, Chapanga wa manjolinjoli ga Isilaeli, mweumuligili. 46 Lelu Bambu Chapanga yati akunikita nikutovayi. Na nene yati nikukutova na kudumula mutu waku. Na higa za manjolinjoli va Vafilisiti yati nikuhipela hidege na hinyama ya kudasi valyayi. Na mulima woha yati umanya kuvya avili Chapanga pa Isilaeli. 47 Vandu voha vevakonganiki apa lelu, yati vimanya kuvya Bambu Chapanga avasangula lepi vandu kwa migoha amala upanga. Ngondo yeniyi ndi ya Bambu Chapanga, na mwene yati akutikita tivahotola nyenye Mwavafilisiti mwavoha."

48 Goliati akatumbula kavili kumuhambila Daudi, Daudi na mwene akajumba kuhamba peavii Goliati muni atovana nayu. 49 Pena Daudi akayingisa chiwoko chaki mu kahaku kaki, akatola liganga limonga akalivika mu ngumbewa na kumtova Goliati pa chiwungi. Liganga likayingila mbaka mugati. Goliati akagwa pahi cha kukupama. 50 Chenicho ndi Daudi cheamuhotwili Goliati kwa ngumbewa yaki na liganga changali kuvya na upanga mu chiwoko chaki. Amtovili Mfilisiti yula na kumkoma. 51 Kangi Daudi akajumba, akahamba kuyima panani ya higa ya Goliati, akauholomola upanga mu hala ya Goliati, na kududumula hingu ya Goliati.

Vafilisiti pevaweni mkekesi wavi wa ngondo akomiwi chenicho, vakatila. 52 Penapo vandu va ku Isilaeli na va ku Yuda vakayima kuhamba kulongolo kuni viywanga kwa lwami, na kuvajumbisana Vafilisiti mbaka uko ku Gati, pa Limlyangu ya Ekiloni. Higa za Vafilisiti vevakomiwi zadandasiki mumihana ya njila yeyihumalila ku Shaalaimu mbaka ku Gati na ku Ekiloni. 53 Vaisilaeli pevawuyili kuhuma kuvavingisana Vafilisiti, vakatola kila chindu chechavii pa kambi ya Vafilisiti. 54 Daudi akautola mutu wa Goliati na kuupeleka ku Yelusalemu. Nambu vindu vya ngondo vya Goliati akavivika mu lindanda laki mwene Daudi.

55 Sauli peaweni Daudi ihamba kukomana na Goliati, akamukota Abuneli, mkekesi wa ngondo, "Abuneli, msongolo mwenuyu ndi mwana wa yani?"

Abuneli akayangula, "Nilapa kwaku veve nkosi mweuvii mumi, chakaka nene nimmanyili lepi."

56 Nkosi Sauli akamjovela, "Hamba kakotakesayi, msongolo mwenuyu ndi mwana wa yani." 57 Daudi peawuyili ndu kuhuma kumukoma Goliati, Abuneli akamutola na kumupeleka kwa Sauli, kuni Daudi akona akamwili mutu wa Goliati mu mawoko gaki. 58 Sauli akamukota Daudi, "Wa msongolo veve ndi wamwana wa yani?" Daudi akamyangula, "Nene namwana wa mtumisi waku Yese, kuhuma ku muji wa Betelehemu."