1 Vafilisiti vakakonganesa manjolinjoli gavi goha ku Afeka, na Vaisilaeli vakavika kambi yavi pa chinyepa chechivii ku ligema la Yezileeli. 2 Vakulu muhanu va Vafilisiti pevapitayi na misambi yavi ya manjolinjoli mamiya na maelufu, Daudi na vandu vaki vagendayi mumbele yavi pamonga na nkosi Akishi na manjolinjoli vaki. 3 Vakekesi va Vafilisiti vakamkota Akishi, "Vaebulania venava vikita kyani peapa?" Akishi akavayangula vakekesi va Vafilisiti venavo, "Uyu ndi Daudi, mweavii muhengaji wa Sauli, nkosi wa ku Isilaeli. Mwenuyu avii na nene kwa mwaka umonga. Na tangiya peamulekili Sauli, niwaili lepi kulola muhalu wowoha kwaki mbaka lelu iyi."

4 Nambu manjolinjoli vakekesi va Vafilisiti vakamuyomela neju Akishi, vakamujovela, "Muwuyisa mundu mwenuyu akatama pandu peumupelili atamayi. Katu akotoka kuhamba pamonga na tete ku ngondo, ngati tikahamba nayu ihotola kuting'anamukila na kutitova ku ngondo. Wu, mlola lepi mundu mwenuyu yati ikoma vandu vitu na kwa njila yeniyo yati ipatana na bambu waki Sauli? 5 Wu, mwenuyu si ndi Daudi yulayula mwevayimbayi vadala lunyimbu kumuvala mwene kuni vikina, ‘Sauli akomili vandu maelufu nambu Daudi akomili vandu makumi elufu.’ "

6 Hinu Akishi akamukemela Daudi na kumujovela, "Nilapa kwa Bambu Chapanga mweavii mumi, kuvya veve wamundu msadikika kwa nene. Ngayivii chabwina neju kuvya uhamba pamonga na nene ku ngondo, ndava muni nilolili lepi chindu chihakahu kwaku tangiya ligono lila lewabwelili kwa nene mbaka lelu. Nambu vakulu vakusadika lepi veve. 7 Hinu wuya ku nyumba, ukatama kwa uteke, na ukotoka kukita chindu chochoha cha kuvayomesa vakulu va Vafilisiti."

8 Nambu Daudi akamkota Akishi, "Nambu nene nikitili kyani? Ngati cheujova kuvya uchiweni lepi chenibudili tangiya ligono lila lenatumbwili kukuhengela mbaka lelu, ndava kyani nikotoka kuhamba kutovana na vamakoko va mkulu wangu nkosi?"

9 Akishi akamujovela, "Nimanyili kuvya veve usadikika ngati mtumu wa Chapanga. Nambu vamanjolinjoli vakekesi va Vafilisiti vajovili, katu akotoka kuhamba na tete kungondo. 10 Hinu veve na Vaisilaeli vayaku vevabwelili pamonga na veve, chilau pekwicha muwukayi."

11 Ndi chilau yaki lukela, Daudi pamonga na vandu vaki vakawuka na kukiliwuka ku mulima wa Vafilisiti. Na vene Vafilisiti vahambili ku Yezileeli.