1 Kangi Samweli avajovili vandu voha va Isilaeli ujumbi weapewi na Bambu Chapanga.

Lukumbi lwenulo Vafilisti vakakonganeka pamonga, ndava ya kutovana na Vaisilaeli. Vaisilaeli vakavika kambi yavi ku Ebenezeli, Vafilisti na vene vakavika kambi yavi ku Afeka. 2 Vafilisti vakavahambila Vaisilaeli na kuvazangila, na pevatovini neju Vaisilaeli vatoviwi na kukomiwa elufu mcheche ku ngondo. 3 Manjolinjoli vevasumukini pevakiliwiki pa kambi, vachilongosi va Vaisilaeli vakavakota, "Ndava kyani lelu Bambu Chapanga avalekili Vafilisti vatihotolayi? Tihambayi ku Shilo tikalitolayi Lisanduku la Lilaganu la Bambu Chapanga, muni Bambu Chapanga avya pamonga na tete na kutisangula kuhuma kwa vamakoko vitu." 4 Ndi vakavatuma vandu ku Shilo na venavo vakalileta Lisanduku la Lilaganu la Bambu Chapanga mweanamakakala goha, mweavi na chigoda chaki cha unkosi pagati ya viumbi vivili vyevivi na magwaba vyevikemiwa makelubi. Na vana vavili vagosi va mteta Eli, Ofini na Fineasi vakabwela pamonga na Lisanduku la Lilaganu la Bambu Chapanga. 5 Lukumbi Lisanduku la Lilaganu la Bambu Chapanga pelahikili pa kambi, Vaisilaeli voha vakaluluta kwa sangaluka, mbaka mulima ukanyugusika. 6 Vafilisti pevayuwini Vaebulania viluluta ndi vakakotana, "Kululuta kwenuko ku kambi ya Vaebulania ndi mana yaki kyani?" Pevamanyili kuvya Lisanduku la Lilaganu la Bambu Chapanga liletiwi ku kambi ya Vaebulania, 7 Vafilisiti vakayogopa na vakajova, yihotoleka michapanga hivabwelili pa kambi yavi! Penapo vakajova, "Talachikolela ndava muni chindu ngati chenichi chiwahili lepi kuhumalila kwakona. 8 Talachikolela yani mweihotola kutisangula kuhuma mu michapanga yeniyo yeyina makaka? Yeniyo ndi michapanga yeyavakomili Vamisili ku lukongolo mumatovelu ndalindali. 9 Hinu nyenye mwa Vafilisiti muvya ngangali, mutovana ngondo ngati manjolinjoli vevavii na makakala, mwalavya mwavavanda va Vaebulania ngati vene chevavili vavanda vitu. Mtovana navu ngati manjolinjoli vevavii na umanya." 10 Vafilisti vakatovana na Vaisilaeli kwa ukekesi na Vaisilaeli vakabuniwa na kila mundu akatilalila ku nyumba yaki. Mu ligono lenilo vakomiwi manjolinjoli va Isilaeli vevigenda kwa magendelu elufu selasini. 11 Lisanduku la Lilaganu la Bambu Chapanga latoliwi na Vafilisiti, na vala vana vagosi vavili va Eli, Hofini na Finehasi vakomiwi.

12 Ligono lilolo mundu mmonga wa likabila la Benjamini ajumbili kuhuma ku ngondo na akahika ku Shilo, kuni apapwili nyula zaki na ajiyitili lububu ku mutu waki. 13 Mundu yula peahikili amuweni Eli atamili pa chigoda chaki pamuhana ya njila kuni ilola ngati kuna mundu yoyoha mweibwela kuhuma ku ngondo, muni mtima waki wavii na wogohi ndava ya Lisanduku la Lilaganu la Bambu Chapanga. Mundu yula peayingili pabomani na kukokosa goha gegahumalili, vandu voha vakavemba kwa lwami luvaha. 14 Eli peayuwini vandu vivemba ndi akakota, "Vandu ava vivembela kiki?" Mundu yula akajumba akahamba kwa Eli na kumujovela mambu genago. 15 Lukumi lwenulo Eli avili na miyaka tisini na nane na mihu gaki galolayi lepi bwina. 16 Mundu yula akamujovela Eli, "Nene nihumili ku ngondo hinu naha, na nitilili kuhuma ku ngondo lelu yiyiyi."

Eli akamukota, "Wamwana wangu, chihumalili kyani kwenuko?"

17 Mundu yula mwealetili ujumbi akamuyangula, "Vaisilaeli vatoviwi na kuvatila Vafilisiti, na manjolinjoli vamahele va Isilaeli vakomiwi. Pamonga na genago, vana vaku vavili Hofini na Finehasi, vakomiwi, na Lisanduku la Lilaganu la Bambu Chapanga valitolili Vafilisiti." 18 Mundu mwenuyo pealuwili ndu Lisanduku la Lilaganu la Bambu Chapanga, Eli akagwa njanja kuhuma pa chigoda chaki pamuhana ya mulyangu. Cheagwili chenicho Eli akadenyeka singu yaki muni avii mgogolo na avii akulupalili, ni mwene akafwa. Eli avii avalongwisi Vaisilaeli kwa miyaka alubaini.

19 Lukumbi mambu genago gihumalila, mdala wa Finehasi, mukamwana wa Eli, avii na ndumbu na lukumbi lwaki lwa kuveleka lwahegalili. Peayuwini kuvya Lisanduku la Lilaganu la Bambu Chapanga litoliwi na kuvya mngana waki pamonga na mkohanu waki vafwili, bahopo akavya na lipyanda na akaveleka mwana. 20 Mdala mwenuyo peafwayi, vadala vevamutangatilayi vakamujovela, "Kotoka kuyogopa, muni uveliki mwana mgosi." Nambu mwene avayangwili lepi chochoha, wala avayuwanili lepi. 21 Mwana mwenuyo akamukemela Ikabodi, mana yaki, "Ukulu wa Chapanga uwukili pa Isilaeli." Ndava muni Lisanduku la Lilaganu la Bambu Chapanga latoliwi na mngana waki pamonga na mkohanu waki vafwili. 22 Ajovili chenicho muni, ukulu wa Bambu Chapanga uwukili pa Isilaeli ndava Lisanduku la Lilaganu la Bambu Chapanga litoliwi na Vafilisiti.