1 Bambu Chapanga akamkota Samweli, "Wu, yati uyendelela kumuvembela Sauli mbaka ndali? Veve umanyili kuvya nene nimubelili akoto kuvya nkosi wa vandu vangu Vaisilaeli. Hinu memesayi ling'elu laku mahuta, nikutuma uhamba ku muji wa Betelehemu. Kwenuko nimupatili nkosi pagati ya vana va mundu mweikemiwa Yese."

2 Nambu Samweli akakota, "Yati nihamba wuli? Sauli akayuwanayi mambu genago yati akunikoma!" Bambu Chapanga akamujovela, "Tolayi mpapakasi wa ng'ombi uhamba nawu, na ukahikayi kwenuko uvajovela nibwelili kumuwusila Bambu Chapanga teta. 3 Umugongolelayi Yese avyayi peuwusa teta, na nene yati nikukulangisa chakukita. Na veve yati ukumuyitila mahuta mundu yula mwenikujovelayi."

4 Samweli akakita ngati Bambu Chapanga cheamujovili. Akahamba ku Betilehemu, vagogo vachilongosi va muji vakahamba kumupokela kuni vindendemeka, vaka mukota, "Wu, ubwelili cha uteke?"

5 Samweli akavayangula, "Ena, nibwelili cha uteke. Nibwelili kumuwusila Bambu Chapanga teta za kutinyiswa. Mujitendekeha muni muyidakiliwa mu kufugama na tihamba tikawusa teta za kutinyiswa." Samweli akavanyambisa Yese pamonga na vana vaki muni vayidakiliwa palongolo ya Bambu Chapanga na akavagongolela na vene vawusa teta ya kutinyiswa.

6 Pevahikili, na Samweli peamuweni Eliabu ndi akajijovela mu mtima waki, "Mwenuyu mweayimili palongolo ya Bambu Chapanga, chakaka ndi mweahaguliwi na Bambu ayitiliwa mahuta avya nkosi." 7 Nambu Bambu Chapanga akamujovela Samweli, "Kotoka kulola pamihu na utali weavili nawu. Nene nimubelili muni nilolokesa lepi ngati chavilolokesa vandu. Vandu vilolokesa ubwina wa kuvala nambu nene nilolokesa mu mtima."

8 Ndi Yese akamuleta Abinadabu akamupitisa palongolo ya Samweli. Nambu Samweli akajova, "Mwenuyu ahaguliwi lepi na Bambu Chapanga." 9 Yese akamujovela Shama apita palongoloya Samweli. Nambu Samweli akamjovela, "Mwenuyu mewa ahaguliwi lepi na Bambu Chapanga." 10 Yese avapitisi vana vaki voha saba palongolo ya Samweli, nambu Samweli akamujovela, "Bambu Chapanga amuhagwili lepi mundu yoyoha pagati ya hava." 11 Penapo Samweli akamukota Yese, "Wu, vana vagosi veuvi navu ndi ava ndu?"

Yese akayangula, "Pehe! Akona mmonga mdebe kuliku voha, nambu ahambili kudima mambelele."

Samweli akamujovela, "Mtuma mundu akamkemelayi, tete yati titama lepi pahi amala kulya mbaka abwela mwenuyo." 12 Penapo Yese akamutuma mundu, na mwene akabwela nayu. Musongolo mwenuyo avili mdung'u, mihu gaki gavili gabwina, na mbwina. Bambu Chapanga akamujovela Samweli, "Mwenuyu ndi mwenimuhagwili, hamba kamuyitilila mahuta." 13 Samweli akatola Kag'elu kekanamahuta akamyitalila Daudi mahuta, kuni vahaja va Daudi vilola. Bahopo mpungu wa Bambu Chapanga ukamubwelela Daudi cha makakala na kutama nayu kuhumila ligono lenilo na kuyendelela. Kangi Samweli akakiliwuka ku Lama.

14 Penapo Mpungu wa Bambu Chapanga ukamuleka Sauli, na mpungu uhakahu kuhuma kwa Bambu Chapanga ukamuyingila na kumung'aha Sauli. 15 Vahengaji vaki Sauli vakamjovela, "Timanyili kuvya mpungu uhakau kuhuma kwa Bambu Chapanga ndi weukung'aha. 16 Hinu wa bambu witu, tilagisayi tete tavatumisi vaku vetikuhengela tihamba tikakulondelayi mundu mweamanyili kutova bwina kanjeke, ndava peukubwelelayi mpungu uhakahu kuhuma kwa Bambu Chapanga ndi yati itova kanjeke na veve yati uvya bwina."

17 Sauli akavajovela vahengaji vaki, "Munilondelayi mundu mwenuyo mweihotola kutova bwina kanjeke na muniletelayi apa."

18 Mtumisi waki mmonga akamjovela, "Nimuwene msongolo mmonga mwana wa Yese mweitama ku muji wa Betelehemu. Msongolo mwenuyo amanyili kutova bwina kanjeke. Mwenuyo avii ngangali na mkekesi wa ngondo, ilongela kwa luhala na anyambili. Na Bambu Chapanga avii pamonga nayu."

19 Hinu Sauli akatuma vandu kwa Yese na kujova, "Niletelayi mwana waku Daudi mweidima mambelele." 20 Yese ampeliki Daudi kwa Sauli, pamonga na lipunda leligegili mabumunda na kahaku ka divayi na kamene kadebe. 21 Daudi akahika kwa Sauli na kutumbula lihengu laki. Sauli akamugana neju Daudi, na akamukita avya wa kumugegela vindu vyaki vya ngondo. 22 Kangi Sauli akatuma kavili vajumbi kwa Yese akamujovela, "Niganiswi na Daudi, mulekayi ayendelelayi kutama na nene anihengelayi." 23 Kila lukumbi mpungu uhakahu kuhuma kwa Bambu Chapanga pewamuyingilayi Sauli ndi Daudi atolayi kanjeke na kutumbula kutova, ndi mpungu wenuwo wamulekayi Sauli, na mwene Sauli avya bwina na kusangaluka.