1 Pegapitili magono gadebe Vafilisiti vakakonganesa manjolinjoli gavi pamonga ndava ya kuhamba kutovana na Vaisilaeli. Akishi akamujovela Daudi, "Chakaka umanyayi kuvya veve pamonga na vandu vaku muganikiwa muhamba pamonga na tete ku ngondo."

2 Daudi akamuyangula Akishi, "Ena, yati ukunilola namuhengaji waku chenimanyi kutovana." Akishi akayangula, "Na nene yati nikukukita veve uvya wamulonda wangu lukumbi lwoha lwa wumi wangu."

3 Lukumbi lwenulo Samweli avii amali kufwa, na Vaisilaeli vavii vamali kumuvembenekela na kumuzika ku muji waki ku Lama. Sauli avii amali kuvavinga pa mulima vahavi na valondola.

4 Vafilisiti vakakonganeka na kuhamba kuvika kambi yavi ku Shunemu. Na mwene Sauli akavakonganesa Vaisilaeli voha na kuvika kambi yavi ku chitumbi Giliboa. 5 Sauli peavaweni manjolinjoli va Vaifilisiti, akayogopa na kuvya na wogohi neju. 6 Sauli akamkota Bambu Chapanga, nambu Bambu Chapanga amuyangwili lepi kwa kulota wala kwa maganga gavili gegikemiwa Ulimu na Tumimu hati kwa njila ya vamulota. 7 Penapo Sauli akavajovela vahengaji vaki, "Munilondelayi mdala mweihotola kulongela na mpungu wa vandu vevafwili ndava yangu, muni nihamba nikamkota."

Vahengaji vaki vakamuyangula, "Avili mlondola mmonga ku Endoli."

8 Ndi Sauli akajing'anamusa kwa kuwala nyula zingi muni akoto kumanyikana, akahamba kwenukwo pamonga na vandu vaki vavili. Vakahika kilu kwa mdala mwenuyo, ndi akamujovela, "Nilondolelayi kwa kuhengela mizuka na unijovela chechikunihumila, na umuletayi mundu mwenikumgana."

9 Mudala yula akamujovela, "Veve umanyili njwe cheakitili nkosi Sauli, avavingili valondola voha va Isilaeli. Na veve ubwelili kunikamula ndava unikomayi?"

10 Sauli akalapa kwa liina la Bambu Chapanga akajova, "Nilapa kwa Bambu Chapanga mweavii mumi, kuvya yati ubuniwa lepi ndava ya lijambu lenili."

11 Mdala yula akamukota, "Wu, nikukemelela yani kuhuma kwa vevafwili?"

Sauli akayangula, "Nikemelela Samweli."

12 Mdala yula peamuweni Samweli, akakenyemuka na kuvemba kwa lwami luvaha neju, na kumujovela Sauli, "Ndava kyani unikongili? Veve ndi Sauli!" 13 Nkosi Sauli akamujovela, "Kotoka kuyogopa ulola kyani?" Mdala yula akayangula, "Niwona mchapanga uhumila pandima ukwela kunani."

14 Sauli akamkota kavili mdala mwenuyo, "Mchapanga wenuwo uwonekana wuli?" Mdala yula akamuyangula. "Nikumuwona mgosi mgogolo ikwela kunani, awalili kanzu." Penapo Sauli akamanya kuvya mwenuyo ndi Samweli, Sauli akamgundamila mdala mwenuyo mbaka pahi kwa utopesa.

15 Samweli akamujovela Sauli, "Ndava kyani uning'ahili kwa kunileta kunani?"

Sauli akayangula, "Nene nivii mu mang'aisu gavaha! Vafilisiti vikomana na nene, na Bambu Chapanga anilekili, akuniyangula lepi kwa njozi hati kwa njila ya vamulota. Ndi mana nikukemili muni unijovela nikita kyani."

16 Samweli akamjovela, "Ndava kyani ukunikota nene cha kukita, kuni Bambu Chapanga akulekili, na kuvya likoko waku? 17 Bambu Chapanga akukitili chila cheakujovili kwa njila ya nene, Bambu Chapanga akunyagili unkosi waku na kumpela myaku Daudi. 18 Ndava veve wamuyidakili lepi Bambu Chapanga, wala watimilisi lepi ligoga laki kwa kuvakoma Vaamaleki ngati cheakulagizi. Ndava yeniyo lelu Bambu Chapanga akukitili mambu aga. 19 Bambu Chapanga yati akukita veve pamonga na Vaisilaeli voha mutalaliwa na Vafilisiti. Chilau veve pamonga na vana vaku yati muvya apa na nene. Mewawa Bambu Chapanga yati akuvakita manjolinjoli voha va Isilaeli vatoviwa na Vafilisiti."

20 Bahopo Sauli akagwa pahi kuni iyogopa ndava ya malovi ga Samweli. Makakala gammaliki muni alili lepi ligono lenilo muhi na kilu. 21 Penapo mdala yula akamuhegelela Sauli, na peamuweni Sauli avii na wogohi neju, akamujovela, "Nene namuhengaji waku nikuyidakili veve. Nayidakili kufwa kwa kukita chila chewaganili nikita. 22 Chondi niyuwanila nene namuhengaji waku. Nileka nikupela chakulya chidogo ulyayi na veve yati upata makakala ga kuyendelela na lugendu lwa kuwuya kweuhumili."

23 Nambu sauli akabela na kumjovela, "Nene yati nilya lepi chakulya." Nambu vahengaji vaki na mdala yula vakamuyupa alyayi, na mwene akavayidakila kulya. Penapo akayinuka na kutama pa chitanda. 24 Mdala yula avii na mpapakasi wa ng'ombi umonga weukulupalili, akahinja kanyata na akateleka nyofu yaki, akatola uhembe wa nganu akaukanda na akateleka libumunda langali ngemeku. 25 Akamupela Sauli pamonga na vahengaji vaki na vene vakalya. Kangi vakayinuka vakawuka kilu yiyoyo.