1 Daudi peamalili kulongela na Sauli, Yonatani mwana wa Sauli, aganiswi neju na Daudi, amganili kwa mtima waki woha ngati cheakujigana mwene. 2 Tangiya ligono lenilo Sauli akamtola Daudi atama ku nyumba yaki na amlekili lepi awuya ku nyumba ya dadi waki. 3 Yonatani avikili lilaganu na Daudi muni amuganili ngati cheakujigana mwene. 4 Yonatani akahula kanzu yeawalili akamupela Daudi pamonga na nyula za kuwala ku ngondo, vindu vyaki vya ngondo, hati pamonga na upanga na upindi na nduta na mkungi waki. 5 Kila pandu Sauli peamtumili Daudi, avahotwili vamakoko vaki. Ndava yeniyo Sauli akamukita Daudi avya mkulu wa manjolinjoli vaki. Lijambu lenilo lavaganisi vandu voha pamonga na vatumisi va Sauli.

6 Manjolinjoli pevawuyayi ku nyumba kuni valongosini na Daudi mweamukomili Mfilisiti yula, vadala kuhuma mu kila muji wa pa Isilaeli vakahamba kumpokela nkosi Sauli. Vadala venavo vakavya viyimba nyimbu kwa kusangaluka, kuni vitova kanjeke na hitolilu. 7 Mewa vakinayi na kuyimba nyimbu za kuyidakilana ngati naha, "Sauli akomili vandu elufu, na Daudi akomili vandu makumi elufu." 8 Sauli aganiswi lepi na malovi ga lunyimbu lwenulo, akayoma neju. Akajova, "Vamupelili Daudi vandu makumi elufu, nambu nene vanipelili vandu maelufu ndu. Chechisigalili ndi kumukita Daudi avya nkosi." 9 Tangiya ligono lenilo Sauli amuwonela wihu Daudi. 10 Chilau yaki, mpungu uhakahu kuhuma kwa Bambu Chapanga ukamuyingila Sauli chimakakala, balapala akavya ngati ipenga na akatumbula kuywanga ywanga mu nyumba yaki, lukumbi lwenulwo Daudi atovayi kanjeke ngati cheayovalili. Sauli akamwili mgoha mu chiwoko chaki. 11 Chigafula Sauli amujugumili Daudi mgoha wenuwo mala zivili, muni ajijovili mu mtima waki kuvya, "Yati nikumuhoma Daudi mgoha na kumukita asigalila bahopo pa luwumba." Nambu Daudi ayepili mala zivili zoha. 12 Sauli akamuyogopa Daudi, muni Bambu Chapanga avili pamonga na Daudi, nambu amlekili Sauli. 13 Ndava yeniyo Sauli akamuwusa Daudi palongolo yaki na kumkita avya chilongosi wa manjolinjoli elufu yimonga. Na mwene Daudi akavalongosa bwina manjolinjoli venavo ku ngondo. 14 Kila chindu cheakitili Daudi, achikitili bwina, muni Bambu Chapanga avili pamonga nayu. 15 Sauli peaweni kuvya Daudi ihotola ngondo kila lukumbi, ndi akamuyogopa neju. 16 Nambu vandu voha va Isilaeli na Yuda vakamugana Daudi, muni avalongwisi bwina ku ngondo.

17 Sauli akamujovela Daudi, "Mwenuyu ndi Melabu msikana wangu mvaha, yati nikugegesa avya mdala waku ngati ukakita malaganu aga, uvya linjolinjoli wangu mkekesi na mweukita genigana, utovana ngondo zezikumuvala Bambu Chapanga." Sauli akitili chenicho muni aholalili mu mtima waki kuvya aganili lepi kumkoma Daudi kwa chiwoko chaki, leka akakomiwa na Vafilisiti. 18 Daudi akamujovela Sauli, "Nene nayani mbaka nivyayi namkohanu wa nkosi? Lukolo lwangu na hati vandu va munyumba ya dadi wangu vimanyikana lepi pa Isilaeli." 19 Pelwahikili lukumbi lwa Sauli kumuwusa Melabu msikana waki agegewayi na Daudi, Sauli amugegisi kwa mundu yungi mweakemiwi Adilieli mweahumili ku muji wa Mehola. 20 Nambu Mikali msikana yungi wa Sauli amuganayi Daudi, Sauli peayuwini genago, akahekalela neju. 21 Sauli akaholalela, "Linda nimugegese mwenuyu muni avya lingongeka laki, ndi Vafilisiti yati vakumukoma." Ndi Sauli akamujovela kavili Daudi, "Hinu wivya wamkohanu wangu kavili." 22 Penapo Sauli akavalagisa vatumisi vaki naha, "Mulongelayi na Daudi pachiyepela mumjovela, ‘Nkosi pamonga na vahengaji vaki voha vaganiswi neju na veve, hinu yidakilayi kumugega msikana waki.’" 23 Vatumisi va Sauli vala vamujovili malovi genago Daudi chi mfiyu na mwene akayangula, "Nene ninavindu lepi vyamahele na namungangu ndu, wu mwiholalela kuvya lijambu lidebe nene nivya mkohanu wa nkosi Sauli?" 24 Vatumisi vala vakakiliwuka kwa sauli na kumkokosela geajovii Daudi. 25 Sauli akavajovela, "Mumjovelayi Daudi naha, ‘Nkosi igana lepi uwusa chindu chochoha ndava ya kumgega msikana waki, nambu igana ndu umpelekelayi hikumba ya njocholo miya yimonga ya Vafilisiti muni alipisa gala gevakitili Vafilisiti vamakoko vaki.’" Chenichi ndi Sauli cheaganili Daudi akomiwa na Vafilisiti. 26 Vatumisi vala pevamukokosili Daudi gala geigana Sauli, Daudi ahekalili neju muni nkosi yati ivya mkohanu waki. Hinu kwakona langahika ligono la kuleta mali, 27 Daudi akawuka kuhamba pamonga na vandu vaki, akavakoma Vafilisiti miya zivili. Akavadumulana hikumba ya njocholo zavi na kuhipeleka kwa nkosi Sauli, Daudi akahivalanga hikumba yoha palongolo ya nkosi, muni amugega msikana wa nkosi. Penapo Sauli akamugegesa Daudi msikana waki mweikemiwa Mikali. 28 Nambu Sauli peamanyili kuvya Bambu Chapanga avii pamonga na Daudi, na Mikali amuganili neju Daudi, 29 Sauli ayendalili kamuyogopa Daudi, magono goha Sauli asigalili kuvya likoko wa Daudi mu wumi waki woha. 30 Vachilongosi va manjolinjoli vakekesi va Vafilisiti vakayendelela kutovana ngondo na Vaisilaeli, nambu pevayendelelayi kutovana, Daudi akavahotola neju kuliku vakekesi vangi va ngondo va Sauli. Penapo liina la Daudi likamanyikana neju.