1 Daudi akaholalela mu mtima waki, "Ligono limonga Sauli yati akunikoma. Chabwina neju kutilalila ku mulima wa Vafilisiti. Penapo ndi Sauli yati ileka kunilonda mu mibaka ya pa Isilaeli, na nene yati nivya yegwa." 2 Penapo Daudi akawuka pamonga na manjolinjoli vaki miya sita, vakahamba ku Gati kwa nkosi Akishi mweavi mwana wa Maoki. 3 Daudi pamonga na vandu vaki vakatama na nkosi Akishi ku Gati. Kila mundu atamili na vandu va mnyumba yaki, Daudi avili na vadala vavili, Ahinoamu kuhuma ku Yezileeli na Abigaili lipwela mweavii mdala wa Nabali kuhuma kumuji wa Kalimeli. 4 Sauli peayuwini kuvya Daudi atilalili ku Gati, amulondili lepi kavili. 5 Ligono limonga Daudi akamujovela Akishi, "Ngati yikukuganisa nene nivya pa mulima waku, nikuyupa unipelayi muji umonga mu muji waku pavya pandu pangu pa kutama. Chabwina lepi nene mtumisi waku kutama apa na veve pa muji uwu wa chinkosi." 6 Ligono lenilo Akishi akampela Daudi muji wa Sikilagi. Kuhumila ligono lenilo muji wa Sikilagi ukavya wa vankosi va ku Yuda. 7 Daudi atamili pa mulima wa Vafilisiti kwa lukumbi lwa mwaka umonga na miyehi mcheche. 8 Hinu Daudi na vandu vaki vakahamba na kuvazangila Vageshuli na Vagilizi na Vaamaleki. Kuhumila kadeni vandu venavo vavii vakolonjinji va milima yeniyo. Pandu pavi padandasiki kutumbula ku Telemu mu njila yeyihelela ku Shuli mbaka kuhika ku mulima wa Misili. 9 Daudi akavakoma vandu voha va mulima wenuwo changali kumuleka hati mundu mmonga, akomi voha vadala na vagosi, atolili mambelele na ng'ombi na punda na ngamiya na nyula, kangi akawuya kwa Akishi. 10 Akishi kila peamukotili Daudi, "Wu, lelu uzangili kwoki?" Daudi amuyangulayi, nizangili muji wa ku Negebu ya Yuda amala nizangili kumuji wa ku Negebu ya Vayelameeli amala nizangili kumuji wa ku Negebu ya ku Vakeni. 11 Daudi avakomili vandu voha, amulekili lepi mumi mundu yeyoha, avya mgosi amala mdala, muni pakoto kuvya na mundu wa kubwela ku Gati. Aholalili kuvya, "Vihotola kukokosa mambu genikitili nene." Lwenulu lwavii luhumu lwaki lukumbi lwoha lweatamili ku mlima wa Vafilisiti. 12 Ndava yeniyo Akishi akamsadika neju Daudi na kuholalela mu mtima waki kuvya, "Vaisilaeli vayaki vakumvenga neju Daudi, ndava yeniyo yati ivya mtumisi wangu magono goha gangali ni mwishu."