1 Vafilisiti vakatovana ngondo na Vaisilaeli, na Vaisilaeli vakavatila Vafilisiti na vandu vamahele vakomiwi kwenuko ku chitumbi Giliboa. 2 Vafilisiti vakavazangila Sauli na vana vaki, na vakavakoma Yonatani na Abinadabu na Malikishua vana vaki Sauli. 3 Ngondo yavili yivaha neju kumuhambila Sauli, vevijugumila nduta vamjugumili Sauli nduta zenizo na vamulemisi neju. 4 Penapo Sauli akamujovela mundu mweakumugegela vindu vya ngondo, "Holomolayi upanga waku unikomayi, na ngati wangakita chenicho vandu venava vangadumuliwa jandu yati vakunihoma upanga na kunivevesa." Nambu mundu mwenuyo abelili muni ayogwipi neju. Ndava yeniyo Sauli akautola upanga waki mwene na akaugwilila. 5 Mweigega vindu vya ngondo yula peaweni Sauli afwili, na mwene akagwilila upanga waki, na akafwa. 6 Penapo Sauli pamonga na vana vaki vadatu na mundu mweagega vindu vya ngondo vya Sauli na vandu vaki voha vawili ligono lenilo limonga. 7 Vaisilaeli vevavili upandi wungi wa ligema na vala vevavili ku mwambu ya mfuleni Yoludani pevaweni kuvya Vaisilaeli vatilili na Sauli na vana vaki vafwili, vakatila na kuhileka miji yavi. Vafilisiti vakahamba kutama mu miji yeniyo.

8 Ligono lelalandili Vafilisiti pevahambili kutola vindu vya vandu vala vevakomiwi, vayiwene higa ya Sauli na vana vaki vadatu vafwili ku chitumbi Giliboa. 9 Vakamudumula Sauli mutu na kumuhula vindu vyaki vya ngondo, na vakatuma vajumbi vahamba ku mulima wa Vafilisiti kukokosa kufwa kwa Sauli mu nyumba za michapanga yavi na kwa vandu vavi. 10 Vindu vyaki vya ngondo vakavivika mu nyumba ya kumfugamila mchapanga wavi Ashitaloti, vakayitola higa yaki na kuyiyinjisa mu luwumba lwa muji wa Beti Shani.

11 Vandu va muji wa Yabeshi Gileadi pevayuwini Vafilisiti chevamukitili Sauli, 12 vakekesi vavi voha vakahamba lugendu lwa kilu yoha, vakayihulusa higa ya Sauli pa luwumba lwa Beti Shani pamonga na higa za vana vaki. Vakahamba nayu mbaka ku Yabeshi na kuhitinyisa kwa motu. 13 Kangi vakagatola majege gavi na kugazika pahi ya chikongo chechikemiwa Mkwaju ku Yabeshi, na vene vakajihinisa changali kulya mu magono saba.