1 Peamali kufwa Sauli, Daudi akawuya peavahotwili Vaamaleki, akatama ku Sikilagi kwa lukumbi lwa magono gavili. 2 Ligono la datu, abweli mundu mmonga kuhuma mu kambi ya Sauli, kuni apapwili nyula zaki na kujiyitila lububu kumutu waki. Mundu mwenuyo akahamba kwa Daudi, akajitaga pamagendelu ga Daudi cha kumtopesa. 3 Daudi akamjovela, "Uhuma kwoki?" Na mwene akamyangula, "Nitolwiki kuhuma ku kambi ya Vaisilaeli."

4 Daudi akamkota, "Mambu gavii wuli kwenuko?"

Mundu yula kamjovela, "Manjolinjoli vitu vatili ngondo na vamahele vakomiwi. Mewawa Sauli pamonga na mwana waki Yonatani vakomiwi."

5 Daudi akamkota msongolo yula, "Umanyi wuli kuvya Sauli na Yonatani mwana waki vakomiwi?"

6 Msongolo yula akamuyangula, "Nangipu yene penavili kuchitumbi cha Giliboa. Namuweni Sauli ayegamili mgoha waki kuni vakwela falasi va vamakoko vaki vevamjumbisayi na mutuka zavi vamuhegalili neju. 7 Sauli peang'anamwiki kulo mumbele, aniwene, akanikemela. Na nene nikamuyidakila, ‘Ena mkulu, nivii apa!’ 8 Mwene anikotili ‘Veve ndi wayani?’ Nikamuyangula, ‘Nene ndi Muamaleki.’ 9 Penapo akanijovela, ‘Hegelela unikoma muni nilemiswi neju na mvinisu ndi uvaha neju, nambu nakona nivii mumi.’ 10 Penapo ndi nikamuhambila, nikamkoma, ndava namanyili kuvya akagwayi pahi yati ihotola lepi kuvya mumi. Ndi nikatola njingwa ya chinkosi yeyavili kumutu waki na bangili yeawali muchiwoko chaki, vyoha nikuletili veve, bambu wangu."

11 Daudi akapapula nyula zaki cha ungolongondi. Hati vandu vevavi pamonga na Daudi vakakita chichocho. 12 Vakavembeneka na vakavemba ndava ya kukomiwa kwa Sauli na Yonatani mwana waki, na ndava ya Vaisilaeli, vandu va Bambu Chapanga. Vakajihinisa changali kulya mbaka kimihi muni vandu vamahele vavii vakomiwi kungondo.

13 Daudi akamkota msongolo yula mweamletili ujumbi, "Uhumalili kwoki?"

Mwene akayangula, "Nene ndi Muamaleki, nitama pamulima waku ngati muyehe."

14 Daudi akamkota, "Ndava kyani veve wayogwipi lepi kumkoma mundu mweahaguliwi na Bambu Chapanga kwa kunyalwa mahuta?" 15 Kangi, Daudi akamkemela mmonga wa vasongolo vaki akamjovela, "Mkoma mundu uyu!" Msongolo yula akatola upanga akamuhoma na kumkoma Muamaleki yula. 16 Daudi akajova, "Ujiletili lifwa laku wamwene, muni ujovili wamwene kwa mlomo waku kuvya, ‘Nimkomili mundu mweahaguliwi na Bambu Chapanga kwa kunyalwa mahuta.’"

17 Daudi ayimbili lunyimbu lwa kuvavembenekela Sauli na Yonatani mwana waki. 18 Daudi akalagiza vandu va ku Yuda vawuliwa lunyimbu lwenulo, na lunyimbu lwenulo luyandikwi mu chitabu cha Yashali. Daudi ayimbili lunyimbu lwenulo naha.

19 Veve Isilaeli, vandu veukujimekela na ukuvahekelela,

vakomiwi pa chitumbi chaku,

Lola vakekesi chevawili!

20 Lijambu lenilo mkotoka kuvajovela vandu va muji wa Gati

amala mu senda za Ashikeloni.

Ngati lepi naha, vadala vafilisiti yati viluluta,

vasikana va vandu venavo vangadumula jandu yati vihekelela.

21 Nyenye vitumbi vya Giliboa,

mkotoka kuvya na mbetu amala fula kwinu.

Amala migunda yinu magono goha hikotoka kupambika chindu chochoha.

Muni kwenuko chingwamba cha mkekesi chagwili pahi,

chingwamba cha Sauli chatopiswi lepi.

22 Ndava ya ngasi ya vandu vevakomiwi,

na ndava ya higa za vala vakekesi,

Yonatani avii mundu mweilunga bwina kwa upinde waki,

upanga wa Sauli wakomili vandu vamahele

lukumbi lwoha zakomili vandu vamahele.

Chakaka zakomili vakekesi.

23 Sauli na Yonatani,

vaganiwi na vandu na kuvahekelela.

Pevavili mumi, vatamili pamonga na pevafwili, vafwi pamonga.

Vavili yeywa kuliku namanyanga, vana makakala kuliku lihimba.

24 Nyenye vadala va Isilaeli mumvembela Sauli!

Avawaliki nyenye nyula zidung'u zabwina za mashonga gamahele,

atotalili mampambu ga zahabu mu nyula zinu.

25 Lola vandu vakekesi chevafwili!

Vafwili pevavi mukutovana ku ngondo.

Yonatani afwi ku hitumbi.

26 Nivi ngolongondi ndava yaku, mlongo wangu Yonatani.

Magono goha waniganili neju,

uganu waku kwa nene wavi uvaha neju,

kuliku mdala cheakumgana mgana waki.

27 "Lola vakekesi chevafwili,

na vindu vyavi vya ngondo vyasigalili changali lihengu."