1 Pegapitili magono gamahele, Abusalomu atolili mutuka za kuhutwa na falasi na vandu hamusini va kulongolela palongolo yaki. 2 Abusalomu ayovalili kuyimuka lukela na kuhamba kuyima pamuhana ya njila yeyihamba ku limlyangu la muji. Mundu yoyoha mweavi na muhalu na kugana kumpelekela nkosi ndava ya kuhamuliwa, Abusalomu amkemili mundu mwenuyo pamuhana na kumkota, "Uhuma muji woki?" Ngati mundu mwenuyo ngaajova ihuma muji nunuyu wa likabila la Isilaeli, 3 Abusalomu ngaamjovili, "Muhalu waku ndi wachakaka neju. Nambu kawaka mundu yoyoha mweiyima pahala pa nkosi kukuyuwanila." 4 Kangi Abusalomu ngaayendalili kujova, "Ngati nene nganivya muamula wa Vaisilaeli! Nene nganimukitili uhamula weukumpela haki yaki." 5 Mewa mundu yoyoha mweamuhambili na kugundama cha utopesa palongolo yaki, Abusalomu ngaamukamwili kwa mawoko gaki na kumkumbatila. 6 Chenicho ndi cheakitili Abusalomu kwa Vaisilaeli voha vevabwelili kwa nkosi ndava ya kugana uhamula. Ndava ya kukita chenicho, Abusalomu akavakita Vaisilaeli vamahele vamganayi mu mitima yavi.

7 Peyapitili miyaka mcheche, Abusalomu amjovili nkosi, "Chondi leka nihamba ku Hebuoni kutimilisa chilapu changu chenamvikili Bambu Chapanga, 8 muni nene mtumisi waku penatamili ku Geshuli ya ku mulima wa Alamu, namvikili Bambu Chapanga chilapu, najovili, ‘Ngati Bambu Chapanga yati akaniwuyisayi ku Yelusalemu, yati nikumfugamila mwene ku Hebuloni.’"

9 Nkosi akamjovela, "Hamba cha uteke" Abusalomu akawuka na kuhamba ku Hebuloni. 10 Nambu Abusalomu atumili vajumbi chimfiyu mu makabila goha ga Isilaeli, akavajovela, "Pemuyuwana lwami lwa lipenenga, mjova, ‘Abusalomu akitiwi kuvya nkosi wa ku Hebuloni!’" 11 Abusalomu peahambili ku Hebuloni, alongosini na vandu miya zivili veavagongolili kuhuma ku Yelusalemu, na vene vahambili kwa ubwina, vamanyili lepi chindu chochoha cheagana kukita Abusalomu. 12 Abusalomu peawusa luteta lwa kutinyisa, atumili ujumbi kwa Ahitofeli wa ku muji wa Gilo mweamtangatilayi nkosi Daudi kuhamula mambu. Penapo uhakau wa Abusalomu wayonjosiki kupata makakala na vandu vealandini nawu vayonjosiki neju.

13 Mjumbi akabwela na kumjovela nkosi Daudi, "Mitima ya vandu va Isilaeli hiwungini na Abusalomu."

14 Hinu, Daudi akavajovela watumisi vaki vevavili pamonga na mwene ku Yelusalemu, "Mubwela titilayi kanyata, ngati chatikiti lepi chenicho, kawaka mundu mwailama, Abusalomu yati ibwela peapa na kumkoma kila mundu pa muji!"

15 Nambu vatumisi vaki voha vakamjovela, "Tete tavatumisi vaku, bambu witu nkosi, tivili bwina kukita lijambu loloha leugana." 16 Hinu nkosi akawuka pamonga na vandu va munyumba yaki na vatumisi vaki voha, nambu akavaleka vadala vaki va kuvala kumi vaiyangalila nyumba ya chinkosi.

17 Nkosi akawuka pamonga na vandu vaki voha. Nambu pevahikili patali chidogo, pa nyumba ya mwishu wa muji, vakayima. 18 Vatumisi voha va nkosi, pamonga na Vakeleti na Vapeleti vevavili valonda vaki, pamonga na Vagiti miya sita vevamlandi nkosi Daudi kuhuma ku muji wa Gati, vapitili palongolo ya nkosi Daudi, 19 nkosi Daudi peamuwene Itai, kuhuma ku Giti akamkota, "Ndava kyani hati veve ulongosini pamonga na tete? Wuya ukatama pamonga na nkosi Abusalomu. Muni veve kuni wamuyehe mewa ndi mjumbaji kuhuma ku mulima winu. 20 Veve wabwelile kuni jana ndu. Wu, lelu nikukitayi uvya wamundu wa kulyungalyunga na tete kuni namwene nimanyili lepi kwenihamba? Wuya kunyumba pamonga na valongo vaku. Mwene Bambu Chapanga yati akukukitila uganu waki na ubwina waki."

21 Nambu Itai akamyangula nkosi, "Nilapa kwa liina la Bambu Chapanga mweavii mumi na kwa veve nkosi wangu, popoha peuhamba, yikavya kwa lifwa amala kwa kuvya mumi, nene mtumisi waku yati nihamba na veve."

22 Hinu Daudi akamjovela Itai, "Chabwina! hamba kulongolo." Hinu Itai, mweahumalili ku Giti, akapita mwene na vandu vaki voha pamonga na vana vaki. 23 Daudi peapitayi pamonga na vandu vaki, vandu vangi voha vevasigalili pa Yelusalemu vakavemba kwa lwami luvaha. Nkosi Daudi akayomboka likemba la Kidiloni pamonga na vandu voha, vakahamba kulukongolo.

24 Sadoki na mwene avili penapo, na Valawi voha vevagegili Lisanduku la Lilaganu la Bambu Chapanga, vakalihulusa pahi na mwene Abitali akawusa teta ya kutinyiswa mbaka vandu voha pevamali kuwuka pa muji wa Yelusalemu. 25 Kangi nkosi Daudi akamjovela Sadoki, "Tola Lisanduku la Lilaganu la Bambu Chapanga uliwuyisayi ku muji wa Yelusalemu. Ngati Bambu Chapanga yati akuniyidakila, yati akuniwuyisa, na nene nikuliwona kangi Lisanduku lenili la Bambu Chapanga na kupawona pandu penapa peitama. 26 Nambu ngati Bambu Chapanga yati iganiswa lepi na nene, anikitila chochoha cheiwona kuvya chabwina kwaki." 27 Nkosi Daudi amjovili kavili mteta Sadoki, "Mtola mwana waku Ahimaasi pamonga na Yonatani mwana wa Abiatali muwuya ku muji cha uteke. 28 Nene yati nilindila ku mitandu uko ku lukongolo mbaka penipokela makokoso kuhuma kwinu." 29 Hinu Sadoki na Abiatali vakawuyisa Lisanduku la Lilaganu la Bambu Chapanga ku Yelusalemu na vene vakatama kwenuko.

30 Nambu Nkosi Daudi akayendelela na lugendu, akakwela chitumbi cha Mizeituni kuni ivemba. Awalili lepi hilatu, na agubiki mutu waki na nyula kulangisa kuviniswa. Na vandu voha vevavili pamonga na mwene vakagubika mitu yavi, vakakwela chitumbi kuni vivemba. 31 Lukumbi lwenulo Daudi ajoviwi kuvya Ahitofeli avili pamonga na vamakoko vevajiwungili na Abusalomu. Ndi nkosi Daudi akayupa akajova, "Veve Bambu Chapanga nikuyupa, ng'anamusa makokoso ga Ahitofeli gavya uhimu."

32 Nkosi Daudi peahikili panani ya chitumbi, pandu pa kumfugamila Bambu Chapanga, mundu mmonga liina laki Hushai kuhuma ku Aliki, abwelili kumpokela, kuni apapwili nyula zaki na kujiyitila lububu ku mutu waki kulangisa kuvya avii na mvinisu. 33 Nkosi Daudi akamjovela, "Ngati ukahamba pamonga na nene, yati ukuning'aha nene. 34 Nambu ngati ukawuyayi ku Yelusalemu na kumjovela Abusalomu, ‘Veve nkosi, nene yati nivya mtumisi waku ngati chenavili mtumisi wa dadi waku kadeni.’ Kwa kukita chenicho yati ukita maholo ga Ahitofeli gakotoka kutimila. 35 Mteta Sadoki na Abiatali yati vivya pamonga na veve kwenuko ku Yelusalemu. Chochoha cheuyuwana kuhuma mu nyumba ya nkosi vajovela mteta Sadokina na Abiatali. 36 Vana vavi vavili, Ahimaasi mwana wa Sadoki na Yonatani mwana wa Abiatali, vavii pamonga na vene kwenuko. Chochoha cheuyuwanayi, vatuma vabwela kunimanyisa."

37 Hinu Hushai, mkozi wa nkosi Daudi, akawuya ku Yelusalemu lukumbi Abusalomu peayingilayi mu muji wenuwo.