1 Pa genago, Ahitofeli amjovili Abusalomu, "Niyupa nihagulayi vandu elufu kumi na vavili, niwuka navu kumlandalila Daudi kilu iyi. 2 Yati nimzangila peivya atotokili na adenyiki mtima. Na nene yati nikumuyogopesa, na vandu vaki voha yati vitila. Yati nimkoma nkosi ndu, 3 na kuvawuyisa vandu vangi voha kwaku ngati mdala cheihamba kwa mngana waki. Na vandu voha veukuvagana yati vitama cha uteke." 4 Chenicho cheajovili Ahitofeli chawonikini kuvya chabwina neju kwa Absolamu na vagogo voha va Vaisilaeli.

5 Kangi Abusalomu akajova, "Mewawa mkemelayi Hushai, mweihumila ku Aliki timuyuwanila na mwene cheijova." 6 Hushai peabwelili, Abusalomu akamjovela, "Chenichi ndi cheajovili Ahitofeli, wu tikitayi ngati cheatijovili? Ngati lepi, tijovela cheuwona veve."

7 Hushai akayangula, "Cheajovili Ahitofeli kwa hinu ndi chabwina lepi." 8 Veve umanyili njwee kuvya dadi waku Daudi na vandu vaki chevavii vakekesi na hinu ndi vakali ngati chinyama chechikemiwa dubu chechinyagiwi vana vaki kudahi. Mewa umanyili kuvya dadi waku ndi linjolinjoli mweayovalili kutovana ngondo, ihotola lepi kutama pamonga na manjolinjoli vaki kilu yoha. 9 Hata hinu amalili kujihiha mu mbugu amala pandu pangi. Ngati yati itumbula kuvazangila manjolinjoli vaku, yoyoha mweiyuwana mambu genago yati ijova manjolinjoli vamahele vevakumlanda Abusalomu vakomiwi. 10 Hata mundu mkekesi mweangayogopa ngati lihimba, yati iyogopa ndava kila mundu ku Isilaeli amanyili kuvya dadi waku ndi linjolinjoli likulu na kuvya vandu vevavii pamonga naku ndi vandu vakekesi. 11 Hinu chenikujovela nene ndi ichi, uvakemelayi Vaisilaeli voha pamonga vevavii ku Dani yeyivii ku kasikazini mbaka vevavii ku Beeli Sheba yeyivii upandi wa kusini, vevavii vamahele ngati msavati wa kumbwani na veve wamwene uhamba pamonga navu ku ngondo. 12 Ndi petikumzangila Daudi popoha peavili, na kumgwilila ngati mbetu cheugwa pandima. Kawaka mundu mweisigalila mumi yikavya mwene amala vandu vaki. 13 Ngati yati itilalila ku muji wowoha, vandu voha va ku Isilaeli yati vileta nyosi na kuutindisila muji woha na kuuhuta mbaka kunyasi, chikoto kusigalila chindu chochoa hati liganga lidebe ku chitumbi chenicho.

14 Abusalomu na vandu voha va ku Isilaeli vakajova, "Cheajovili Ushai ndi chabwina kuliku cheajovili Ahitofeli." Muni Bambu Chapanga aganayi kuvya gala mambu gabwina geavajovili Ahitofeli gakotoka kuhumalila, muni amkomakesa Abusalomu.

15 Kangi Hushai akavajovela vamteta Sadoki na Abiatali kuvya, "Ahitofeli avajovili vagogo voha va Isilaeli vakitayi aga na aga nambu nene nivajovili vakita naha na naha. 16 Hinu mukita kanyata mupeleka ujumbi kwa Daudi, mumjovela naa, ‘Kilu iyi ukoto kugona ku mitandu ku lukongolo, nambu uyomboka mfuleni Yoludani, ngati lepi nkosi pamonga na vandu voha vevavili pamonga na mwene yati vizangiwa na kukomiwa.’"

17 Yonatani mwana wa Abiatali na Ahimaasi mwana wa Sadoki vajihihili pa chinyepa cha Enilogeli pavala ya Yelusalemu, muni vakoto kuwonekana paviyingila mu muji. Mtumisi mmonga wa chidala akalihamba kuvajovela mambu gegahumalili, na vene vakalihamba kumjovela nkosi Daudi. 18 Nambu msongolo mmonga avaweni, msongolo mwenuyo akahamba kumjovela Abusalomu. Ndi Yonatani na Ahimaasi vakawuka kanyata, vakahamba kujihiha mu nyumba ya mundu mmonga uko ku Bahulimu. Mundu mwenuyo avii na chiliva mu uwa yaki, na vene vakayingila mu chiliva chenicho na kujihiha. 19 Mdala wa mkolonyumba yeniyo akatola chigubiku na kugubika chiliva chenicho, kangi akatandika mpasa na kuyanikila mabenu panani yaki. Kawaka mundu mweamanyili chindu chochoha. 20 Manjolinjoli va Abusalomu pevahikili kwa mdala mwenuyo, vakamkota, "Vavi kwoki Ahimaasi na Yonatani?"

Mdala yula akavayangula, "Vayombwiki kumwambu ya kapela."

Manjolinjoli vakahamba kuvalonda nambu vavaweni lepi. Ndi vakawuya ku Yelusalemu. 21 Vatumisi va Absolamu pevawukili, Yonatani na Ahimaasi vahumili mu chiliva, vakahamba kwa nkosi Daudi na kumjovela, "Wukayi, uyomboka mfuleni hinu naa, ndava muni Ahitofeli amjovili Abusolamu mpangu uhakau kukuvala veve." 22 Ndi Daudi na vandu vaki voha vakatumbula kuyomboka mfuleni Yoludani. Pekwachili, vandu voha vavii vamali kuyomboka mfuleni Yoludani.

23 Ahitofeli peawene kuvya cheavajovili vakitili lepi, akakwela lipunda laki, akahamba kunyumba yaki uko ku muji waki. Peahikili kwenuko, avikili bwina mambu ga munyumba yaki, kangi akajiyinjisa. Akafwa na akazikiwa mu litinda la dadi waki.

24 Hinu Daudi akahika ku muji wa Mahanaimu, lukumbi Absolamu na Vaisilaeli viyomboka mfuleni Yolodani. 25 Lukumbi lwenulo, Abusolamu amvikili Amasa kuvya mkulu wa manjolinjoli pahala pa Yoabu. Amasa avi mwana wa Yeteli, kuhuma mu lukolo lwa Ishimaeli. Nyina waki akemiwi Abigali msikana wa Nahashi, na mwenuyo Nahashi avii mlumbu waki Seluya, nyina waki Yoabu. 26 Abusalomu pamonga na manjolinjoli va Isilaeli vavikili kambi yavi mu mulima wa Gileadi.

27 Daudi peahikili ku Mahanaimu, akonganiki na Shobi mwana wa Nahashi wa kuhuma ku muji wa Laba mu mulima wa Vaamoni, Makili mwana wa Amieli kuhuma ku Lodebali, pamonga na Balizilai kuhuma ku Gileadi ku muji wa Logelimu. 28 Vandu venava valetili mipasa na nkeve na viviga na nganu na shayili na uhembe na mandulutulu na mandondo na nandala, 29 na wuchi na mavele gegagandiswi na mambelele na mahuta ga hinyama kuhuma mu mifuya yavi. Vindu vyenivyo vyoha vamuletili Daudi na vandu vevavili pamonga na mwene. Ndava vajovili, "Vandu venava vananjala, vatotokili na vananjoto uko ku lukongolo."