1 Pagamaliki mambu genago, Daudi akamyupa Bambu Chapanga, akajova, "Wu, nihamba kuutola muji umonga wa miji ya Yuda?" Bambu Chapanga akamjovela, "Hamba!" Daudi akamkota, "Nihamba kuutola muji woki?" Bambu Chapanga akamyangula, "Hamba ukautola muji wa Hebuloni." 2 Hinu, Daudi akahamba ku Hebuloni, pamonga na vadala vaki vavili, Ahinoamu mweahumali ku mulima wa Yezeleli na Abigaili lipwela wa Nabali, mweahumalili ku muji wa Kalimeli. 3 Mewawa Daudi avatolili vandu vaki, pamonga na vandu va munyumba zavi, na vene vakatama mumiji yeyavili mumihana ya Hebuloni. 4 Ndi vandu va ku Yuda vamuhambili Daudi ku Hebuloni vakamnyala mahuta muni avya nkosi wavi.

Daudi peayuwini kuvya vandu va ku Yabeshi Gileadi ndi vevamzikili Sauli, 5 avatumili vandu ku Yabeshi Gileadi na ujumbi weujova, "Bambu Chapanga avamotisa muni mwalangisi usadikika kwa kumzika Sauli nkosi winu. 6 Hinu, Bambu Chapanga avalangisa uganu waki wangali na mwisu na usadikika waki kwinu. Na nene yati nikuvakitila mambu gabwina ndava ya genago gemwakitili. 7 Hinu mkangamala na muvya vakekesi! Nkosi winu Sauli afwili na vandu va ku Yuda vaninyalili mahuta nivya nkosi wavi."

8 Abineli mwana wa Neli, mkulu wa manjolinjoli va Sauli, avii amtolili Ishibosheti mwana wa Sauli na kumpeleka ku Mahanaimu. 9 Kwenuko, Abineli akamkita Ishibosheti kuvya nkosi wa ku Gileadi na ku Asheli na ku Yezeeli na ku Efulaimu na ku Benjamini na mulima woha wa Isilaeli. 10 Ishibosheti mwana wa Sauli avili na miyaka alubaini peatumbwili kuyitalalila Isilaeli, na mwene alongwisi kwa miyaka hivili. Nambu likabila la Yuda lamlandili Daudi ngati nkosi wavi.

11 Daudi avili nkosi wa likabila la Yuda kwa miyaka saba na miyehi sita, na mwene atalalili kuni itama ku Hebuloni.

12 Abineli mwana wa Neli pamonga na manjolinjoli va Ishibosheti mwana wa Sauli, vakawuka ku Mahanaimu na kuhamba ku Gibeoni. 13 Yoabu mwana wa Seluya na manjolinjoli va Daudi, na vene vakawuka kuhamba kukonganeka na Abineli na vandu veavili navu ku litanda lelivili ku Gibeoni. Msambi umonga wavii ku upandi umonga wa litanda na msambi wungi upandi wungi. 14 Abineli akamjovela Yoabu, "Valeka vasongolo vatovana palongolo yitu!" Yoabu akamyangula, "Ena."

15 Hinu manjolinjoli kumi na vavili vevahambili ndava ya Ehibosheti na likabila la Benjamini, vakomini na manjolinjoli kumi na vavili va Daudi. 16 Kila mmonga amkamwili mutu mundu mweitovana nayu, akamuhoma upanga mu luvau ndi vasongolo voha vavili vakagwa pahi, vakafwa. Pandu penapo pikemiwa Helikati Hazulimu mana yaki luvanja lwa upanga ku Gibeoni.

17 Kangi manjolinjoli voha vakatumbula kutovana, pandi zoha zivili vatovini chi makakala. Ngondo ya ligono lenilo yavili yivaha neju, nambu manjolinjoli va Daudi vambunili Abineli na manjolinjoli va Isilaeli. 18 Vana vadatu va Seluya, Yoabu na Abishai na Asaheli vavili penapo. Asaheli avii na uhotola wa kujumba ngati ngolombo. 19 Asaheli amvingisini Abineli changali kung'anamuka kumangiha amala upandi wa kulyela. 20 Abineli peanga'anamwiki na kulola mumbele na kumlola Asaheli, amjovili, "Wu, ndi veve Asaheli?" Mwene akamyangula, "Ena, ndi nene."

21 Abineli akamjovela Asaheli, "Kotoka kunijumbisa, ng'anamukila kumangenya amala upandi wa kulyela, umkoma linjolinjoli mmonga na utola vindu vyaki." Nambu Asaheli alekili lepi kumvingisana. 22 Abineli akamjovela Asaheli mala ya pili, "Leka kunivingisa. Ndava kyani ukuning'ang'anisa nikukomayi? Yati nivengana na Yoabu muhaja waku?" 23 Nambu Asaheli akabela kung'anamuka. Hinu Abineli akamuhoma Asaheli kwa mgoha mulutumbu na ukahumila kumgongo. Asaheli akagwa pahi, na kufwa bahopa. Vandu voha pavahikili pafwilili Asaheli vakayima.

24 Nambu Yoabu na Abishai vamlandili Abineli. Lilanga palatipamayi, vahikili ku chitumbi cha Ama, weuvili kwelihumila lilanga mwa Gia, ku njila yeyihamba kulukongolo lwa Gibioni. 25 Vandu va likabila la Benyamini vakonganiki pamonga na kuwungana na Abineli, na vene vakakwela panani ya Chitumbi tayali kwa ngondo. 26 Kangi Abineli akamkemela Yoabu, "Wu yati titovana magono goha? Wu ulola lepi mwishu waki uvya mvinisu? Tete tavalongo wu ndi ndali yati ukuvalagiza vandu vaku valeka kutivingisana?"

27 Yoabu akamjovela, "Nilapa kwa Chapanga mweavi mumi, kuvya ngaukotoka kujova lijambu lenilo, chakaka vandu vangu ngavayendalili kuvavingisana valongo vavi mbaka chilau lukela." 28 Hinu, Yoabu akapyula lipenenga na vandu vakaleka kuvavingisa vandu va Isilaeli, na ngondo yikamalika ligono lenilo.

29 Abineli na vandu vaki vagendili mu likemba la mfuleni Yoludani kilukilu. Vakayomboka mfuleni Yoludani, vakagenda muhi woha mbaka vakahika ku Mahanaimu.

30 Yoabu peawuyili kuhuma kumlanda Abineli, avakemili vandu voha, akamanya kuvya manjolinjoli kumi na tisa va Daudi pamonga na Asaheli vavii lepi. 31 Nambu manjolinjoli va Daudi vavakomili vandu miya zidatu na sitini va likabila la Benyamini vevavii pamonga na Abineli. 32 Yoabu na vandu vaki vatolili higa ya Asaheli, vauzikili mulitinda la vandu va munyumba yaki, lelivi ku Betelehemu. Kangi vagendili kilukilu, na kwapachili vahikili ku muji wa Hebuloni.