1 Daudi amyimbili Bambu Chapanga lunyimbu lwenulu ligono lila peamgombwili kuhuma kwa vamakoko vaki, na kuhuma kwa Sauli.

Akayimba naa,

2 Bambu Chapanga ndi litalau langu,

ngome yangu na msangula wangu.

3 Chapanga wangu ndi litalau langu, pandu penikujihiha,

mwene ndi chingwamba changu, na makakala ga usangula wangu,

ngome yangu na pandu pangu pa kujihiha.

Msangula wangu, akunisangula kuhuma kwa vandu vevavili na luhonda.

4 Nikumkemela Bambu Chapanga mweiganikiwa kulumbiwa,

na nene nisanguliwa kuhuma kwa makoko vangu.

5 Mayuga ga lifwa gavi ganitindili,

mafuliku ga kuhalabisa gavi ganiyolili,

6 nyosi za litinda zanikungili,

mitegu ya lifwa yanikamwili.

7 Mukung'ahika kwangu, namkemili Bambu Chapanga,

namvembalili Chapanga wangu.

Kuhuma mu nyumba yaki ayuwini lwami lwangu,

chivembu changu chamuhikalili mu makutu gaki.

8 Mulima woha wandendimi na kunyugusika,

mikingisa ya kunani yikayugayuga,

vandendimi muni Chapanga ayomili.

9 Lyohi lahukili kuhuma mu meng'elu mwaki,

motu weutinisa wahumili mu mlomo waki,

makalakala ga motu gayakili mu mlomo mwenumo.

10 Abaywili kunani, akahuluka pahi,

lihundi lititu lavili pahi ya magendelu gaki.

11 Akwelili chiumbi chechivi na magwaba na akambuluka,

ambuluwiki ku nani na magwaba ga upepu.

12 Ajitindisili chitita pandi zoha,

ajigubiki mahundi gatitu ga hula ya kunani.

13 Ndava ya lumuli lwa kuvya kwaki,

mahundi gahegalili,

yikatonya hula ya maganga

na lumuli lwa mbamba.

14 Bambu Chapanga abulwimi kuhuma kunani,

lwami lwa mweavilikunani neju lwayuwaniki.

15 Ajugumili nduta akavapechenganisa vamakoko,

lumuli lwaki lukamulika na kuvajumbisa.

16 Makemba ga bahali gagubukuliwi,

na mikingisa ya mulima yikavya waka.

kwa kuywanga kwaki Bambu Chapanga

kwa lukeku lwelwahumili kwa makakala mu meng'elu zaki.

17 Chapanga akagolosa chiwoko chaki kuhuma kunani,

akanikamula kwa chiwoko chaki,

akanihuwula kuhuma pandu pepanyoliki mu manji gamahele.

18 Anisangwili kuhuma kwa vamakoko vangu vevavi na makakala,

vala vevanivengili.

muni vene vavii na makakala kuliku nene.

19 Vanizangili mu ligono lenavili mumang'aiso,

nambu Bambu Chapanga ndi mweanitangatili.

20 Aniletili, akanivika pandu pabwina,

anisangwili muni aganisiwi na nene.

21 Bambu Chapanga anikitili kuwanangana na chenayidakiliwi palongolo yaki,

animotisi ndava muni navili lepi nambudanu.

22 Muni niyidakili mihilu yaki Bambu Chapanga,

nikitili lepi gahakahu kwa kumleka Chapanga wangu.

23 Nikamwili malagizu gaki goha,

nalekili lepi kukamula mihilu yaki.

24 Palongolo yaki navii lepi mbudanu,

nijiyangalili nikoto kukita gahakahu.

25 Bambu Chapanga anipelili njombi kuwanangana na kuyidakiliwa kwangu palongolo yaki,

kuwanangana na ubwina wangu palongolo ya mihu gaki.

26 Kwa vevavili vasadikika ukujilangisa kuvya msadikika,

kwa vevangavya vabudanu ukujilangisa kuvya mwewangabuda.

27 Veve ndi mbwina kwa vevavi bwina,

nambu kwa vabudanu ukujilangisa kuvya veve walikoko wavi.

28 Mwene akuvasangula vevavi ngolongondi,

nambu akuvalola vevimeka na kuvagwisa.

29 Veve Bambu Chapanga ndi lumuli lwangu,

Bambu Chapanga wangu, mweukunilangasila mu chitita.

30 Kwa utangatila waku, ukunipela makakala ga kuvazangila vamakoko vangu,

na uhotola wa kukwela luwumba lwavi.

31 Chapanga akuvalongosa vandu mu njila yeyikamiliki,

goha geihaidila Bambu Chapanga ndi gachakaka,

mwene ndi chingwamba kwa voha vevakujihiha kwaki.

32 Ndi yani mweavi ngati Bambu Chapanga?

Yani mweavili litalau la pa kujihiha, nga Chapanga witu.

33 Chapanga ndi pandu pangu pepakangamili pa kujihiha,

na akugakita matendu gangu gakotoka kunung'unikiwa.

34 Akangamalisi magendelu gangu ngati ga hipalama,

na kunikita niyima bwina mu hitumbi.

35 Akuniwula kutovana ngondo,

mawoko gangu gahotolayi kupindisa upindi wa shaba.

36 Unipelili chingwamba chaku cha kunisangula,

utangatila waku ukunikita nivya namkulu.

37 Ukitili njila yangu yivya yipana,

muni magendeleu gangu gakotoka kutyelela.

38 Navalandili makoko vangu na kuvakomakesa,

nawuyili lepi mumbele mbaka penamalili kuvakoma voha.

39 Navakomakisi njwee, vahotwili lepi kuyima,

vagwili pahi pa magendelu gangu.

40 Wanipelili makakala ga kutovana ngondo,

wavakitili vamakoko vangu vafugama na kugundama mu magendelu gangu.

41 Wavakitili makoko vangu vang'anamuka na kutila,

na nene nikavakoma vala voha vevanivengayi.

42 Valondili utangatila,

nambu vapatili lepi mundu wa kuvasangula,

vakuvembili veve Bambu Chapanga nambu wavayangwili lepi.

43 Navabondibondili vakavya ngati lububu,

navalivatili ngati madakali ga munjila.

44 Wanisangwili kuhuma kwa vandu vangu vevanizangili,

unikitili nivya mtalalila wa milima,

Vandu venavili nangavamanya hinu vakunihengela.

45 Vayehe vibwela changali kujikwiha,

na pevayuwini ndu mambu gangu, vakaniyidakila.

46 Vayehe vadenyiki mitima,

vahumili mu ngome zavi kuni vindendemeka.

47 Bambu Chapanga avi mumi! Atopeswa litalawu wangu! Ulumbiwa Chapanga wangu,

litalawu la usangula wangu.

48 Mwene ndi mweakunilipisilila gahakahu kwa vandu vala vevanikitili gahakahu,

mwene ndi mweakuvavika vandu va milima hingi vavya pahi ya utalalila wangu.

49 Bambu Chapanga anisangwili kuhuma kwa vamakoko vangu,

aniyinwili panani ya vamakoko vangu,

na anisangwili kuhuma kwa vandu vevavi na luhonda.

50 "Hinu yati nikukulumba veve Bambu Chapanga,

pagati ya vandu va milima yati nikulilumba liina laku.

51 Bambu Chapanga akumpela uhotola ukulu nkosi mweamuhagwili,

akumlangisa uganu wewangamalika mwene mweamuhagwili,

Daudi na viveleku vyaki vyoha magono goha gangali mwishu."