1 Ishibosheti mwana wa Sauli, peayuwini kuvya Abineli akomiwi ku Hebuloni, adenyiki mtima na vandu voha va Isilaeli vakavya na wogoyi. 2 Ishibosheti mwana wa Sauli, avili na vandu vavili vevavili vachilongosi va msambi wa kuzangila, mmonga akewa Bana na yungi akemewa Lekabu. Venavo vavi vana va Limoni, mundu wa likabila la Benjamini kuhuma ku muji wa Beloti, ndava munji wa Beloti mewa wavili pandu pa mulima wa vandu va likabila la Benjamini. 3 Vakolonjinji vevatama mu muji wa Beloti vatilalili ku Gitaimu, na vitama kwenuko ngati vayehe mbaka lelu.

4 Mvelekwa yungi wa Sauli avili Mefibosheti mwana wa Yonatani. Sauli na Yonatani dadi waki pevakomiwi, mwene avili na myaka muhanu. Mdala mweamulelayi peayuwini kuvala kufwa kwavi kuhuma ku muji wa Yezileeli, akamtola na kutila nayu. Nambu peakitayi kanyata kutila nayu, akamgwisa pahi mwana mwenuyo, akavya mweangahotola kugenda.

5 Lekabu na Baana vana va Limoni mweihumila ku Beloti, vakahamba ku nyumba ya Ishibosheti. Vahikili kwenuko muhi, Ishibosheti peavi apumulili ku nyumba yaki. 6 Mlonda wa limyangu mweapetayi nganu agonili lugono. Penapo Lekabu na Bana vakayingila mugati. 7 Pevahikili mugati mwenumo vamkolili Ishibosheti agonili tipitipi pa chitanda chaki, vakamkoma. Pevamali kumkoma, vakamdumula mutu na kuwuka nawu. Vakagenda kilukilu kupita mu likemba la mfuleni Yoludani. 8 Kangi vakatola mutu wa Ishibosheti na kumpelekela Daudi ku Hebuloni. Vakamjovela nkosi Daudi, "Wenuwu ndi mutu wa Ishibosheti mwana wa likoko waku Sauli mwealingili kukukoma. Bambu Chapanga akulipisili bambu wangu nkosi ndava ya Sauli na vachiveleku vaki."

9 Nambu Daudi akavayangula Lekabu na Baana, vana va Limoni wa ku Beloti, akajova, "Nilapa kwa Bambu Chapanga mweavi mumi mweanisangwili kuhuma kwa vamakoko vangu voha. 10 Mundu yula mweabwelili na kunijovela kuvya Sauli afwili, aholalili akunijovela mambu gabwina, namkamwili na kumkoma. Yeniyo ndi yavii njombi yenampelili ndava ya ujumbi waki weaholalili wabwina kwa nene. 11 Wu, mundu muhakau akamkoma mundu wabwina pa chitanda, mu nyumba yaki, chabwina lepi kwa nene kumlipisila ndava ya kuyita ngasi kwaki kwa kumkoma na kumuwusa pa mulima?" 12 Daudi akavalagiza manjolinjoli vaki vavakoma Lekabu na Baana. Vakavadumula mawoko gavi na magendelu gavi. Kangi vakayinjisa higa zavi mu mkongo pamuhana ya litanda ku Hebuloni. Nambu vatolili mutu wa Ishibosheti na kuzika mulitinda la Abineli ku Hebuloni.