1 Pagenago nkosi Nahashi wa Vaamoni afwili, na mwana waki mweakemiwi Hanuni akavya nkosi pahala pa dadi waki. 2 Nkosi Daudi akajova, "Yati nikumkitila gabwina Hanuni, mwana wa Nahashi ngati Dadi waki chanihengili." Hinu Daudi atumi vajumbi vakampolesa mtima Hanuni.

Ndi vajumbi va Daudi pavahiki mulima wa Vaamoli, 3 vakulu va Vaamoli vakamjovela mkulu wavi, Hanuni, "Uholalela kuvya Daudi cheavatumuli vandu vabwela kukupolesa mtima ndi amtopesa dadi waku? Wu, Daudi avatumi lepi vandu muni vakita umang'omesi mu muji muni vautolayi?"

4 Hinu Hanuni akavakamula vajumbi vala vevatumwi na Daudi, akavaketa kila mmonga manjwemba gaki upandi umonga, akapapula nyula zavi pagati mbaka pamadaku, kangi akavaleka vahamba. 5 Daudi peajoviwi lijambu lenilo, akatuma vandu vakakonganeka navu, muni vajumbi venavo vavi na soni neju. Na mwene nkosi akavajovela, "Mtama pa muji wa Yeliko, mbaka manjwemba ginu pegimela, ndi muwuya ku nyumba."

6 Vaamoni pevaweni kuvya vamuyomisi Daudi, vakakodi manjolinjoli va likabila la Alamu elufu ishilini vavigenda kwa magendelu kuhuma ku Beti Lehobu na ku Soba, mewa nkosi Maaka atolili manjolinjoli elufu yimonga, mewa kuhuma ku Tobu atolili manjolinjoli elufu kumi na zivili. 7 Daudi peayuwini lijambu lenilo, akamlagiza Yoabu ahamba na manjolinjoli vaki voha. 8 Vaamoni vawukili na kujitendekeha kwa ngondo pa limlyangu la muji wa Laba, muji wavi ukulu, na Vaalamu kuhuma Soba na Lehobu na vandu kuhuma Tobu na Maaka vajipangi ku lukongolo.

9 Yoabu peaweni kuvya ngondo yivaha kulongolo na mumbele, akavahagula manjolinjoli vakekesi neju va Izilaeli, akavavika vatovana na Vaalamu vevavi ku lukongolo. 10 Akamuhagula Abishai mlongo waki avalongosa manjolinjoli vangi vala vevasigalili, na mwene Abishai akavapanga vatovana na Vaamoni. 11 Yoabu akamjovela Abishai, "Ukawona Vaalamu vigana kunihotola ubwela kunitangatila, na nene nikawona Vaamoni vakuhotola yati nibwela kukutangatila. 12 Nambu mkangamala na titovana kwa makakala goha ndava ya vandu vitu na ndava ya miji ya Bambu Chapanga witu, na mwene Bambu Chapanga atikitilayi gala geakugawona gabwina kwaki."

13 Hinu Yoabu na vandu vaki vakahamba kulongolo kuvazangila Vaalamu, na vene Vaalamu vakatila. 14 Vaamoni pevaweni kuvya Vaalamu vatilili, ndi na vene mewa vamtilili Abishai na kuyingila mu muji. Hinu Yoabu akaleka kutovana na Vaamoni, akawuya ku Yelusalemu.

15 Nambu Vaalamu pevaweni kuvya vavahotwili lepi Vaisilaeli, vakakonganesa pamonga manjolinjoli vavi. 16 Nkosi Hadadezeli alagizi Vaalamu vevavi kumwambu ya mfuleni Efulati valetwa, vavapeleka ku Helamu kuni vilongoswa na Shobaki mkulu wa manjolinjoli ga Hadadezeli. 17 Daudi peayuwini makokoso genago, akonganisi manjolinjoli vaki pamonga, akayomboka mfuleni Yoludani akahamba mbaka ku Helamu, kula kwevajitendekili Vaalamu kutovana ngondo na Daudi, vakatumbula kutovana nayu. 18 Nambu Vaalamu vatilili palongolo ya Vaisilaeli. Daudi na vandu vaki vavakomili Vaalamu miya saba vevagendesa mutuka za ngondo na vakwela falasi elufu alubaini. Mewa vamlemisi Shobaki mkulu wa manjolinjoli vavi, akafwilila balapala. 19 Hinu vankosi voha vevavi vatumisi va Hadadezeli pevaweni vatoviwi na Vaisilaeli, vakayidakilana cha uteke na Vaisilaeli, na vakavya vatumisi va Vaisilaeli. Penapo Vaalamu vakayogopa na vavatangatili lepi kangi Vaamoni.