1 Yoabu mwana wa Seluya, amanyili kuya nkosi Daudi inogela neju kumuwona Abusalomu. 2 Hinu Yoabu amtumili mundu ahamba ku Tekoa muni amlondela mdala mweavi na luhala. Peamletili, akamjovela, "Yigisayi kuvya uvi mukuvembeneka. Walayi nyula za kuvembeneka, koto kunyala mahuta nambu ujikita ngati mdala mweakumvembenekela mundu waki mweafwili mu magono gamahele. 3 Kangi uhamba kwa nkosi ukamjovela genaga genikujovela." Hinu Yoabu akamjovela malovi ga kumjovela nkosi.

4 Hinu mdala mwenuyo wa kuhuma ku Tekoa akahamba kwa nkosi, akafugama na kugundama mbaka pahi cha utopesa palongolo ya nkosi, akamjovela, "Veve nkosi nitangatila."

5 Nkosi akamkota, "Chikung'aa kyani?"

Mdala yula akayangula, "Nene ndi nalipwela, mgosi wangu afwili. 6 Navi na vana vagosi vavili. Ligono limonga, pevavi ku lukongolo, vakatumbula kutovana. Ndava muni pavi lepi na mundu wa kuvalekenganisa, mwana wangu mmonga akamtova myaki akamkoma. 7 Hinu vandu voha va lukolo lwangu vaning'anamuki nene mtumisi waku, vigana nimuwusa kwavi mwana mweamkomili myaki muni vamkoma, ndava amkomi myaki. Hinu vakamkoma mwenuyu nivya lepi na muhali. Vakakita chenicho, yati viwusa neju huvalila yangu yeyisigali, na mngana wangu yati vakumlekela lepi lihina amala chiveleku pa mulima."

8 Nkosi akamyangula mdala yula, "Wuya kunyumba yaku, yati nikutangatila kumala lijambu laku."

9 Mdala yula kuhuma ku Tekoa akajova, "Mkulu wangu nkosi, malungamiku goha gavya ndava yangu na ndava ya valongo va dadi wangu. Hinu, veve nkosi na unkosi waku mkotoka kuvya mwemubudili."

10 Nkosi akamjovela "Mundu yoyoha mweakuyogopesa mleta kwa nene, na mwene yati iwuyila lepi kavili kukung'aha."

11 Mdala yula akamjovela, "Chondi nkosi, niyupila kwa Bambu Chapanga, Chapanga waku, muni mlongo wangu yula mweagana kulipisa ndava ya lifwa la mwana wangu, akotoka kukita lijambu lingi livaha la kumkoma mwana wangu yungi."

Nkosi Daudi akamjovela, "Nilapa kwa lihina la Bambu Chapanga mweavi mumi, yati kuvya lepi na mundu hati mmonga mweakumlemasayi mwana waku."

12 Mdala yula akamjovea, "Nikuyupa, nene mtumisi waku, leka nijova lilovi limonga kwaku nkosi."

Nkosi akamjovela, "Jova."

13 Mdala yula akamjovela, "Ndava kyani hinu ugana kukita uhakau uwu kwa vandu va Chapanga? Kuwanangana na cheujovili kuvala lijambu lenilo, ujihamwili wamwene ndava ugana lepi kumleka mwana waku awuyayi kuhuma kula kweatilalili. 14 Tete tavoha yati tifwa. Tete ndi ngati manji gegiyitika na gegiyoleka lepi. Bambu Chapanga ikoma lepi, nambu ikita njila muni yula mweavingiwi awuya kuhuma ku mahamilu. 15 Nene nibwelili kulongela na veve mkulu wangu ndava vandu vaniyogopisi. Hinu nene mtumisi waku naholalili kuvya, ‘Mbanga nikalongeli na nkosi, pangi nkosi yati ikita lijambu lenili lenimjovela nene mtumisi waki. 16 Muni nkosi yati akuniyuwanila na kunisangula kuhuma kwa mundu mweigana kunikomakesa nene na mwana wangu kuhuma mu uhali weatipeli Chapanga.’ 17 Nene mhengaji waku naholalili kuvya, ‘Lilovi laki mkulu wangu nkosi yati likunipela uteke mu mtima wangu, muni mwene mkulu wangu nkosi avi ngati mtumu wa Chapanga mweukugamanya gabwina na gahakau.’ Bambu Chapanga, Chapanga waku, avya pamonga na veve."

18 Ndi nkosi akamyangula mdala yula, "Kotoka kunihiha lijambu loloha lenikukota."

Mdala yula akajova, "Jova nkosi wangu."

19 Nkosi akamkota, "Wu, uwungini lepi na Yoabu mulijambu lenili."

Mdala yula akajova, "Nilapa kwa veve mkulu wangu nkosi mweuvi mumi, mundu ihotola lepi kuyepa upandi kulyela amala kumangeya kuvala lijambu leujovili nkosi wangu. Yoabu mtumisi waku ndi mweanitumi. Mwene ndi mweanijovi malovi goha genikujovili nene mtumisi waku. 20 Yoabu mtumisi waku akitili chenicho ndava uliholalelayi kavili lijambu lenili. Nambu veve mkulu wangu uvii na luhala na umanyili kila chindu chechihengeka pamulima ngati vamtumu va Chapanga va kuanani."

21 Kangi nkosi akamjovela Yoabu, "Chabwina, yati nikita chaugana, hambayi ukamuwuyisa kunyumba msongolo Abusalomu."

22 Yoabu afugimi na kugundama mbaka pahi cha utopesa, akammotisa nkosi, akajova, "Lelu nene mtumisi waku, mkulu wangu nkosi. Nimanyili kuvya niyidakiliwi palongolo yaku, ndava veve bambu wangu nkosi uyidakili kuyupa kwangu." 23 Hinu Yoabu akawuka, akahamba ku Geshuli akamuwuyisa Abusalomu pa muji wa Yelusalemu. 24 Nambu nkosi akajova, "Abusalomu atama kutali na nene, atama kunyumba yaki. Akotoka kubwela kunilola." Hinu Abusalomu akatama kunyumba yaki, na mwene akonganeka lepi na nkosi Daudi.

25 Pamulima woha wa Izilaeli, kwavili lepi na mundu mwealumbiwa kuvya anyambili neju ngati Abusalomu. Kuhumila ku luwayu mbaka ku mutu kwaki, Abusalomu avi lepi na kasolo yoyoha. 26 Abusalomu aketayi manjwili gaki kila lukumbi peawini gitopela ku mutu waki. Kila peaketili na kupima, zavi na utopa ngati wa kilo zivili kulandana na chipimu cha chinkosi. 27 Abusalomu avii na vana vagosi vadatu na mwana mdala mmonga lihina laki Tamali. Tamali avi msikana wabwina.

28 Hinu Abusalomu atamili ku muji wa Yelusalemu kwa miyaka hivili changali kukonganeka na nkosi Daudi. 29 Kangi Abusalomu atumili ujumbi kwa Yoabu, kumuyupa ahamba kwa nkosi pahala paki, nambu Yoabu akabela kubwela. Abusalomu akatuma ujumbi mala ya pili nambu Yoabu abelili kubwela. 30 Hinu Abusalomu akavajovela vatumisi vaki, "Lola, Yoabu ana mgunda wa shayili papipi na mgunda wangu. Muhamba mukauyocha motu." Ndi vatumisi va Abusalomu vakahamba kuuyocha motu mgunda wa Yoabu.

31 Yoabu akahamba kunyumba ya Abusalomu akamkota, "Ndava kyani vatumisi vaku vauyochi motu mgunda wangu?"

32 Abusalomu akamyangula, "Lola nakuletili ujumbi, ubwela kuni muni nikutuma kwa nkosi ukamukotayi, ‘Ndava kyani aniwuyisi kuhuma ku Geshuli? Mbanga nganisigalili kwenuko.’ Hinu nitangatila nihotola kukonganeka na nkosi. Ngati nihokili, anikomayi!"

33 Hinu Yoabu akahamba kumjovela nkosi malovi genago goha. Nkosi akamkemela Abusalomu, na mwene akayingila kwa nkosi, akafugama na kugundama mbaka pahi cha utopesa palongolo ya nkosi, na nkosi akamkumbatila Abusalomu cha uganu.