1 Genaga ndi malovi gakumalikisila ga Daudi. Na ujumbi wa Daudi mwana wa Yese, mundu mweakitiwi kuvya mkulu na yula mweavi kunani, myimbaji wa nyimbu wa Izilaeli mwahaguliwi na Chapanga wa Yakobo.

2 Mpungu wa Bambu Chapanga ajovili kupitila nene,

malovi ganijova gihuma kwaki.

3 Chapanga wa Isilaeli ajovili,

Litalau la Isilaeli anijovili

"Mundu peakuvatalalila vandu kwa njila yeyidakiliwa kwa nene

Mwaitalalila cha kumtopesa Chapanga

4 Mwene ndi ngati lumuli lwa lukela,

ngati lilanga lelihuma lukela pangali lihundi

ngati lumuli peyimalika fula yeyimelesa mahamba pandima."

5 Wu vandu va munyumba yangu vahaguliwi lepi na Bambu Chapanga.

Ena akitili lilaganu la magono goha gangali mwishu na nene,

yati akulileka lepi lilaganu laki, yati akugakita mambu gangu ganihambila bwina pagati ya goha genikuganogela.

6 Nambu vandu vahakau, viwanangana na minga yeyitagiwa,

muni yihotoleka lepi kutola na chiwoko,

7 mundu mweakuhiyola iganikiwa kutumila lyuma amala kwa chaka cha mgoha.

Na mwene yati akuhiyocha balapala.

8 Genaga ndi maina ga manjolinjoli vakekesi veavili nawu Daudi, Yoshebi Bashebeti mweahumalili mu lukolo lwa Akimoni mweavili chilongosi wa vala vadatu, mwene akomini kwa mgoha waki, akakoma vandu miya nane kwa lukumbi lumonga.

9 Kangi mweagelekili pagati ya vala manjolinjoli vakekesi vadatu avili Eleazali mwana wa Dodo, wa lukolo lwa Ahohi. Ligono limonga, Eliazali avi pamonga na Daudi peavavaligili Vafilisiti vevakonganiki ku Pasi Damimu kutovana ngondo. Vaisilaeli vavatili Vafilisiti, 10 nambu Eliazali akangamili kutovana na Vafilisiti mbaka chiwoko chaki pechatotokili na kugogodala na kukamulana na upanga waki. Ligono lenilo Bambu Chapanga avakitili vahotola. Kangi Vaisilaeli vawuyili pandu peavili Eliazali na kutola vindu vyevavanyagili Vafilisiti vevakomiwi.

11 Mkekesi wa datu avili Shama mwana wa Agee kuhuma mulukolo lwa Halali. Vafilisiti vakakonganeka kwenuko ku Lehi, pandu pepavili na mgunda wa dengu zamahele, na Vaisilaeli vavatilili Vafilisiti. 12 Nambu Shama ayimili chakukangamala pagati ya mgunda wenuwo muni kuliyangalila, na mwene akavakoma Vafilisiti. Bambu Chapanga akapata uhotola uvaha.

13 Kangi, manjolinjoli vakekesi vadatu vala pagati ya vakulu selasini vakahelela lukumbi lwa mabenu, vakamuhikila Daudi mumbugu ku Adulamu. Lukumbi lwenulo Manjolinjoli ga Vafilisiti vavikili kambi yavi ku likemba la Lefaimu. 14 Lukumbi lwenulo Daudi avili ku ngome na manjolinjoli ga Vafilisiti gavii ku muji wa Betelehemu. 15 Daudi avii na njoto neju akajova, "Ngati ngepivya na mundu ngaanipela manji ga kunywa kuhuma mu chiliva cha Betelehemu chechivili papipi na limlyangu la Muji!" 16 Hinu, manjolinjoli vakekesi vadatu vala vakawuka, vakaholota pagati ya kambi ya manjolinjoli ga Vafilisiti vakahamba kunega manji ku chiliva cha Betelehemu, papipi na limlyangu la muji, vakamletela Daudi. Nambu Daudi akabela kunywa pahala paki akagayita palongolo ya Bambu Chapanga kuvya luteta lwa mnyweso. 17 Akajova, "Veve Bambu Chapanga, katu niganikiwa lepi kunywa manji genaga, manji genaga ngasi lepi ya vala vevajiyokisi wumi wavi!" Hinu Daudi anywili lepi manji genago. Mambu genago gevakitili manjolinjoli vakekesi vadatu vala.

18 Abishai mlongo waki Yoabu, mwana wa Seluya, avii mkulu wa manjolinjoli vakekesi selasini. Mwene avatovi vandu miya zidatu kwa mgoha waki na akavakoma kwa ligono limonga, akamanyikana ngati vala manjolinjoli vakekesi vadatu. 19 Abishi avi mwaimanyikana neju pagati ya manjolinjoli vakekesi selasini, na akavya chilongosi wavi, nambu avi lepi pagati ya manjolinjoli vakekesi vadatu vala.

20 Benaya mwana wa Yehoyada, kuhuma ku muji wa Kabizeeli, avi linjolinjoli mkekesi na akitili mambu gamahele gavaha. Avakomili manjolinjoli vakekesi kuliku voha kuhuma ku Moabu. Mewa mulukumbi lwa balafu neju ayingili mulilindi na kukoma lihimba mwenumo. 21 Mewa alikomili Mmisili mmomga mweavili mtali na mweakulupali, pamonga kuvya Mmisili avi na mgoha mumawoko, Beyana amhambili na chibonga akamyaga mgoha wula, na kumkoma Mmisili kwa mgoha waki mwene. 22 Beyana, mwana wa Yehoyada akitili genaga, na amanyikini pagati ya manjolinjoli vakekesi vadatu vala. 23 Hinu atopiswi kuliku vala manjolinjoli vakekesi selasini, nambu avikiwi lepi pagati ya manjolinjoli vakekesi vadatu vala. Daudi amkitili avya mkulu wa valonda vaki mwene.

24 Asheli mlongo waki Yoabu, avi mmonga manjolinjoli vakekesi selasini. Manjolinjoli vangi vakekesi va Daudi vavii, Elihanani mwana Dodo wa ku Betelehemu, 25 Shama na Elika voha vahumalili ku Halodi 26 Helesi kuhuma ku muji wa Paliti na Ila mwana wa Ikeshi kuhuma ku Tekoa, 27 Abiezeli kuhuma ku Anatoti na Mebunai kuhuma ku Hushati, 28 Salumoni kuhuma ku Ahohi na Mahalai kuhuma ku Netofahi, 29 Helebu mwana wa Baana, kuhuma ku Netofati na Itai mwana wa Libai kuhuma ku Gibea mu pandu pevavii Vabenyamini, 30 Benaya kuhuma ku Pilatoni na Hidai kuhuma ku vikapela vya papipi na Gaashi, 31 Abialiboni kuhuma ku Alaba na Azimaweti wa kuhuma ku Bahulimu, 32 Eliaba kuhuma ku Shaaliboni na vana va Yasheni na Yonatani, 33 na Shama kuhuma ku Halali na Ahimu mwana wa Shalali kuhuma ku muji wa Halali, 34 na Elifeleti mwana wa Ahasibai kuhuma ku Maaka na Eliamu mwana wa Ahitofeli kuhuma ku Gilo, 35 na Hezilo kuhuma ku Kalimeli na Paalai kuhuma ku Alabi, 36 na Igali mwana wa Natani kuhuma ku Soba na Bani kuhuma ku Gadi, 37 Seleki kuhuma ku Amoni na Nahalai kuhuma ku Beeloti, mweagegayi vindu vya ngondo vya Yoabu mwana wa Seluya, 38 Ila na Galebu va kuhuma ku Yatili, 39 na Ulia wa likabila la Hiti. Voha kwa pamonga vavi manjolinjoli vakekesi va ngondo selasini na saba.