1 Bambu Chapanga akavayomela kangi Vaisilaeli, akamkulukisa Daudi kwa kumjovela, "Hamba kavavalanga vandu va Isilaeli na va Yuda." 2 Hinu nkosi akamlagiza Yoabu, na vakulu va manjolinjoli vevavii pamonga na mwene, "Muhamba mu makabila goha ga Isilaeli kuhumila ku Dani mbaka ku Beeli Sheba, mukavayandikisa vandu vevitovana ngondo muni nimanyayi vavili valinga."

3 Yoabu akamuyangula nkosi, "Bambu Chapanga, Chapanga waku, ayonjokesa manjolinjoli mala miya, na mihu ga nkosi, mkulu wangu, galola lijambu lenili. Nambu ndava kyani veve nkosi wangu ugana kukita lijambu ngati lenili?" 4 Nambu lilovi la nkosi lavili na makakala neju kwa Yoabu na vakulu va manjolinjoli. Hinu vakawuka palongolo ya nkosi, vakahamba kuvayandikisa Vaisilaeli voha vevamanyili kutovana ngondo.

5 Vakayomboka mfuleni Yolodani na kuvika kambi papipi na pandu pepikemiwa Aloeli, kusini ya muji pa ligema la kuhambila ku Gadi kangi vakahamba mbaka ku Yazeli. 6 Kangi vakahamba ku Gileadi ku mlima wa Tahitimu Hodeshi mu mulima wa Vahiti. Kangi vakahika ku Dani na kuhuma kwenuo vakatindila kuhamba Sidoni. 7 Kangi vakahika ku ngome ya muji wa Tilo, vakayingila mu miji yoha ya Vahivi na ya Vakanani. Kangi vakawuka na kuhamba kusini mu mlima wa Yuda mbaka ku Beeli Sheba. 8 Pevamalili kutindila mu mulima woha kwa miyehi tisa na magono ishilini, vawuyili ku Yelusalemu. 9 Yoabu akampela nkosi mvalangu wa vandu vevamanyi kutovana ngondo. Ku Isilaeli kwavili na vandu laki nane vanauhotola wa kutovana ngondo, na ku Yuda vandu laki muhanu.

10 Nambu Daudi peamali kuvavalanga vandu, ang'aiswi neju mumtima waki. Hinu Daudi akamjovela Bambu Chapanga, "Nibudili neju ndava ya gala genikitili. Nambu hinu nikuyupa veve Bambu Chapanga, unilekekesa nene mtumisi waku, muni nikiti lijambu la uhimu neju."

11 Chilau yaki Daudi peayimwiki, lilovi la Bambu Chapanga lamuhikili mlota Gadi, mweavili mlolaji wa Daudi, akajova, 12 "Hamba kamjovela naa Daudi, Bambu Chapanga ijova naa, ‘Yati nikupela mibunu hidatu, na veve uhagula mbunu umonga wenikukubuna veve.’" 13 Hinu Gadi akamuhambila Daudi na kumjovela, "Wu, kuvya na njala ya miyaka saba pa mulima waku? Amala veve uvatila vamakakoko vaku kwa miyehi hidatu kuni vakulandalila? Amala kuvya na matamu gahakahu pa mulima waku kwa magono gadatu? Holalela kangi unijovela nikamyangula mweanitumili."

14 Daudi akamyangula Gadi, "Nivi mu mang'aisu gavaha neju! Nambu mbanga nibuniwa na Bambu Chapanga muni mwene analipyana, kuliku kubuniwa na vandu." 15 Hinu, Bambu Chapanga akaveletela Vaisilaeli matamu, kuhumila lukela mbaka lukumbu lwelwaganikiwi. Vandu elufu sabini vafwili pa mulima woha kuhumila ku kasikazini ya Dani mbaka kusini ya Beeli Sheba. 16 Nambu mtumu wa Chapanga peagolwisi chiwoko chaki muni kuuhalabisa muji wa Yelusalemu, Bambu Chapanga akang'anamusa maholo gaki, akamjovela mtumu yula, mweavakomakesa vandu, "Leka yikolili!" Lukumbi lwenulo mtumu wa Chapanga ayimili papipi na luvanja lwa kupepetela nganu wa Alauna wa likabila la Vayebusi.

17 Daudi peamuwene mtumu yula mweakoma vandu, akamjovela Bambu Chapanga, "Lola, nene ndi mwenibudili na kukita uhakau wenuwu! Vandu venava vabudili lepi. Chondi nikuyupa neju unibuna nene na vandu va munyumba yangu."

18 Ligono lilolo Gadi akamuhambila Daudi akamjovela, "Kwelayi uhamba ukamjengela Bambu Chapanga pandu pa kuwusila luteta, ku luvanja lwa kupepetela nganu wa Alauna, wa likabila la Vayebusi." 19 Hinu, Daudi akakwela kuwanangana na lilovi la Gadi ngati Bambu Chapanga chealagizi. 20 Alauna pealolili upandi wa kunyasi akamuwona nkosi pamonga na vatumisi vaki vakumbwelela, ndi akawuka akahamba kufugama na kugundama mbaka pahi cha utopesa palongolo ya nkosi. 21 Kangi Alauna akamkota nkosi, "Ndava kyani mkulu wangu nkosi unibwelili nene mtumisi waku!"

Daudi akamuyangula, "Nibweli kugula luvanja lwaku lwa kupepetela nganu muni nimjengela Bambu Chapanga pandu pa kuwusila luteta muni utamu wenuwu weumala vandu uwukayi."

22 Alauna akamjovela Daudi, "Mkulu wangu nkosi, tola chochoha cheukuchiwona chabwina na umuwusila Bambu Chapanga luteta. Nene niwusa ngo'mbi izi ndava ya luteta lwa kutinyisa na vindu vyenivi vya kupepetela na mangolingoli ga ng'ombi gavya sagala. 23 Vyenivi vyoha nikupela veve nkosi. Nisadika Bambu Chapanga, Chapanga waku, yati ipokela luteta lwaku lwa kutiniswa."

24 Nambu nkosi akamjovela Alauna, "Lepi! Veve kotoka kunipela waka chindu chochoha. Nene yati nigula kwaku kwa mashonga gaki. Nihotola lepi kumuwusila Bambu Chapanga, Chapanga wangu, luteta lwa kutinyisa lwa vindu vyenipatili waka." Hinu, nkosi Daudi akagula luvanja lwa kupepetela nganu na ng'ombi kwa hipandi selasini ya madini ga feza. 25 Kangi Daudi akamjengela Bambu Chapanga pandu pa kuwusila luteta pa luvanja lwenulwo na kumuwusila luteta lwa kutinyisa na luteta lwa uteke. Hinu, Bambu Chapanga akayangula gala geayupili ndava ya mulima wa Izilaeli, na utamu ula wewavakomayi vandu va Izilaeli ukawuka.