1 Hinu kwavili na mundu muhakau ku Gileadi liina laki Sheba mwana wa Bikili wa likabila la Benjamini, hinu akapyula lipenenga na kujova, "Tivi lepi na chitu kwa Daudi, tivi lepi na pandu pitu popoha kwa mwenuyo mwana wa Yese. Nyenye vana va Isilaeli kila mmonga ahamba kunyumba yaki!" 2 Hinu vandu voha va Isilaeli vakamleka Daudi na kumlanda Sheba mwana wa Bikili. Nambu vandu va Yuda vasigalili kuvya vasadikika na vakamlanda nkosi Daudi kuhuma ku mfuleni Yolodani mbaka ku muji wa Yelusalemu.

3 Daudi peahikili ku nyumba yaki ya chinkosi ku muji wa Yelusalemu, akavatola vadala waki kumi va kuvala veavalekili vayangalila nyumba yaki, akavavika mu nyumba yimonga pahi ya ulonda, akavayangalila bwina nambu agoni lepi nawu. Hinu vadala venavo vavikiwi mugati mbaka ligono la kufwa kwavi, vatamili ngati valipwela.

4 Kangi nkosi akamjovela Amasa, "Vakemela vandu voha va Yuda vabwela penapa mu magono gadatu na wamwene uvyayi penapo." 5 Hinu Amasa akahamba kuvakemela vandu va Yuda. Nambu awuyili lepi mulukumbi lweajoviwi na Daudi. 6 Daudi akamjovela Abishai, "Hinu, Sheba mwana wa Bikili, yati akutiyokisa neju kuliku Abusalomu. Tola vatumisi vangu umlandalila Sheba muni akoto kuyingila mu miji yeyitindisiwi luwumba lwa maganga." 7 Abishai akawuka na Yoabu pamonga na valonda va nkosi na vakekesi voha. Venavo voha vawukili ku Yelusalemu vakahamba kumlonda Sheba mwana wa Bikili. 8 Pevahikili pa litalau livaha kwenuko ku Gibeoni, Amasa akahuma kuvapokela. Yoabu awalili ligwanada la manjolinjoli na panani ya ligwanda lenilo kwavili na mkungi wewakamulili kahaku kekavili chipula chivaha mu chiwunu chaki. Yoabu peahegelili, chipula chaki chaholomwiki, chikagwa pahi. 9 Yoabu akamjovela Amasa, "Wu, wilama mlongo wangu?" Yoabu akagakamula manjwemba ga Amasa na kumuhuta muni amkumbatila chauganu. 10 Nambu Amasa achiweni lepi chipula chechavili mu mawoko ga Yoabu. Hinu Yoabu akamuhoma nachu pa lutumbu na matumbu gaki gakaseyewukila kuvala na kugwa pahi, Amasa akafwa balapala changali Yoabu kumuhoma kavili.

Kangi Yoabu na Abishai mlongo waki vakayendelela kumlandalila Sheba mwana wa Bikili.

11 Mundu mmonga wa Yoabu akayima papipi na higa ya Amasa, akajova, "Yoyoha mweakumgana Yoabu na yoyoha mweakumgana Daudi, amulandayi Yoabu!" 12 Amasa afwili kuni atepatili ngasi yaki higa yoha pagati ya njila yikulu. Hinu kila mweapita penapo ayima kumlola. Nambu mundu mmonga peaweni kuvya vandu voha vabwelili na kuyima pandu penapo, akayiwusa higa ya Amasa pa njila, akayipeleka kudasi na kuyigubika kwa nyula. 13 Higa ya Amasa peyawusiwi pa njila, vandu voha vahambili na Yoabu kumlandalila Sheba mwana wa Bikili.

14 Sheba apitili mu makabila goha ga Izilaeli mbaka ku muji wa Abeli Beti Maaka. Vandu voha va pandu pepikemiwa Bikili vaganiswi, vakonganiki pamonga na kumlanda Sheba. 15 Manjolinjoli voha vevavili pamonga na Yoabu vakahamba kumzangila Sheba peavili mu muji wenuwo wa Abeli Beti Maaka. Vakatumbula kulundika ludaka pa muhana ya luwumba kuvya pandu pa kukwelela, kangi vakatumbula kubomola luwumba na kuugwisa pahi. 16 Kangi mdala mmonga mweavi na luhala ayuwaniki kuhuma mu muji, ijova, "Muyuwanila! Muyuwanila! Mumjovela Yoabu abwela nilongela nayu." 17 Yoabu akahamba papipi yake, mdala yula akamjovela, "Wu, veve ndi Yoabu?"

Yoabu akajova, "Ena! ndi nene."

Mdala yula akamjovela, "Niyuwanila nene mtumisi waku."

Yoabu akamjovela, "Nikuyuwanila."

18 Mdala yula akamjovela, "Penapo kadeni vandu vajovayi, ‘Muhamba mukayuwanila cheviyangula ku muji wa Abeli.’ Chenicho ndi vandu chevahotwili kumala mihalu yavi. 19 Nene ndi mmonga wa vala vevigana uteke na usadika pa Izilaeli. Hinu veve ugana kuhalabisa muji weuvi ngati mau pa Izilaeli. Ndava kyani ugana kuhalabisa muji wa Bambu Chapanga?"

20 Yoabu akamuyangula, "Katu muwumi wangu! Nigana lepi kuleta chitututu amala kubomola muji waku. 21 Geujovili gachakaka lepi! Nambu mundu mmonga kuhuma ku hitumbi ya Efulahimu mwaikemiwa Sheba mwana wa Bikili, atumbwili kung'namuka na kumbela nkosi Daudi. Mumuleta kwa nene, penapo ndi yati niwuka pa muji winu."

Mdala yula akamjovela Yoabu, "Mutu waki yati ujugumiwa kwaku kupitila luwumba."

22 Penapo mdala yula akahamba kulongela kwa luhala na vandu voha va muji cheviganikiwa kukita. Hinu vakamdumula mutu Sheba mwana wa Bikili, vakautaga kuvala kwa Yoabu. Hinu Yoabu akapula lipenenga kulangisa kuvya ngondo yimaliki. Vandu vakapechenganika kuhuma mu muji wenuwo wa Abeli, kila mundu akawuya ku nyumba yaki. Kangi Yoabu akawuya kwa nkosi Daudi, ku muji wa Yelusalemu.

23 Hinu Yoabu akavya mkulu wa manjolinjoli voha pa Isilaeli. Benaya mwana wa Yehoyada, avili mkulu wa valonda va nkosi. 24 Adolamu avili mweiyimamila vandu vevahenga mahengu ga kung'ang'aniswa. Yehoshafati mwana wa Ahiludi avili myandikaji wa kumbukumbu. 25 Shausha avili muyandikaji wa nkosi, Sadoki na Abiatali vavili vamteta vakulu. 26 Ila kuhuma ku muji wa Yaili avili mteta mweamuhengelayi Daudi mwene.