1 Hinu makabila goha ga Isilaeli gamuhambili Daudi ku Hebuloni, na kumjovela, "Lola, tete ndi tavalongo vaku va gogo mmonga. 2 Kadeni apo, Sauli peavili nkosi witu, veve ndi mwewavalongosa Vaisilaeli ku ngondo, na Bambu Chapanga ahaidili kuvya, ‘Yati ukuvayunga vandu vangu Vaizilaeli na yati uvya chilongosi wavi.’" 3 Hinu vagogo voha va Isilaeli vakamuhambila nkosi Daudi ku Hebuloni, na mwene akakita lilaganu navu palongolo ya Bambu Chapanga, kangi vakamnyala mahuta Daudi avya nkosi wa Isilaeli. 4 Daudi avili na miyaka selasini peavii atumbwili kutalalila, na atalalili kwa miyaka alubaini. 5 Ku Hebuloni kwenuko, avatalalili vandu va Yuda kwa miyaka saba na miyehi sita, na ku Yelusalemu avatalalili vandu va Isilaeli pamonga na vandu va Yuda kwa miyaka selasini na hidatu.

6 Ligono limonga nkosi Daudi na vandu vaki vahambili ku Yelusalemu kuvazangila Vayebusi vevavili vakolonjinji va mulima wenuwo. Nambu Vayebusi venavo vakamvevesa kuni vijova, "Yati uyingila lepi mu muji uwu, muni hati vangalola na vevavi na chilema yati vakupingalila." Vamjovili chenicho muni vaholalili kuvya Daudi ngahotwili lepi kuyingila mu muji wenuwo. 7 Nambu Daudi autolili muji wa Siyoni weutindisiwi luwumba lwa maganga, ndi wakemiwi muji wa Daudi.

8 Ligono lenilo Daudi avajovili vandu vaki, "Mundu yoyoha mweakuvatova Vayebusi, apitila mumkingisa wa manji muni akavabuna vevanavilema na vangalola muni mpungu wangu ukuvavenga." Ndi mana vandu vijova, "Vangalola na vevanachilema yati viyingia lepi mu nyumba ya chinkosi."

9 Daudi atamili mungomi yeniyo, na mwene aukemili muji wenuwo, "Muji wa Daudi." Daudi akamemesa ludaka pandu pepavii na likemba kutumbula kwelihumila lilanga kuhambila mgati ya muji. 10 Na mwene Daudi akayongaseka neju kuvya na makakala ndava muni Bambu Chapanga wa manjolinjoli ga kunani, avi pamonga naku.

11 Kangi, nkosi Hilamu wa ku Tilo atumili vajumbi kwa Daudi, mewa ampelekili mikongo ya mielezi na vafundi selemala na vajengaji vevamujengili Daudi nyumba ya chinkosi. 12 Hinu Daudi akamanya kuvya Bambu Chapanga amkangamalisi avya nkosi wa ku Isilaeli, na kuukita unkosi waki uvya uvaha ndava ya vandu vaki va ku Isilaeli.

13 Daudi peahumili ku Hebuloni na kubwela pa Yelusalemu, agegili vadala vamahele, mewa avii na vadala va kuvala vamahele vevamvelekili vana vamahele vagosi na vadala. 14 Genaga ndi mahina ga vana vagosi va Daudi vevavelikwi ku Yelusalemu, Shamua na Shobahu na Natani na Solomoni, 15 na Ibihali na Elishua na Nefegi na Yafia, 16 na Elishama na Eliada na Elifeleti.

17 Vasilisiti pevayuwini kuvya Daudi anyaliwi mahuta avya nkosi wa Isilaeli, vawukili vakahamba kumlonda muni vamkamulayi, nambu Daudi ayuwini kuvya vakumlonda, akahelela akahamba kujihiha mugati ya ngome. 18 Vafilisiti vahikili na kuvika kambi mu likemba loha la Lefaimu. 19 Hinu Daudi amkotili Bambu Chapanga, "Wu, nihambayi kuvazangila Vafilisiti? Wu, yati ukunitangatila nivahotola?"

Bambu Chapanga akamyangula Daudi, "Hamba ukavatova, muni chakaka yati nikukita uvahotola."

20 Hinu Daudi akahamba mbaka ku Baali Pelasimu, na kuvahotola Vafilisiti. Kangi akajova, "Bambu Chapanga apitili pagati ya makoko vangu ngati manji gamahele ga chihuku chegijumba." Hinu pandu pala pakemiwi Baali Pelasimu. 21 Vafilisiti vatilili vakahileka himong'omong'o yavi ya michapanga pandu penapo, ndi Daudi na vandu vaki vakahitola.

22 Vafilisiti vawuyili kangi na kuvika kambi mu likemba la Lefaimu. 23 Daudi amkotili Bambu Chapanga, na mwene akamyangula, "Kotoka kuvazangila kuhumila penapo peuvili, nambu uvatindila cha mumbele na kuvazangila kuhumila upandi wungi kulongolo ya mikongo ya mifalafalaji. 24 Pemuyuwanayi lwami ngati vigigi vya magendelu kuhuma kunani ya mifalafalaji yeniyo, penapo muhamba kanyata, muni wenuwo yati wivya ulangisu kuvya nilongolili palongolo yinu kuvatova manjolinjoli va Vafilisiti." 25 Daudi akitili ngati chealagizwi na Bambu Chapanga, na mwene akavatova Vafilisiti kuhuma ku Geba mbaka ku Gezeli.